小麥廚房+鰂魚涌公園
兩個人影吓相,  兩個人醫吓肚,  和你Taste,  港島,  港式,  野餐隨行

【野餐隨行】落雨有瓦遮頭!西灣河隱藏式街坊小廚 碼頭海旁公園野餐賞雨景

瀏覽次數:412
個人瀏覽過





提到野餐,大多數人都會只選擇清涼嘅秋天,又或者係陽光充沛嘅時候,有啲人落雨會堅持唔住唔野餐,但事實上任何時候都可以野餐,例如係選擇有瓦遮頭嘅公園,兩個人野餐時順道觀賞雨景,是次雨點晶瑩如絹絲,既輕且細,略帶朦朧美,同滂沱大雨浙瀝雨聲唔同,溫柔得似初春少女拍拖時嘅模樣。

從小西灣找尋一間躲藏區內嘅街坊小店,區外人未必會留意得到,但就受到區內人歡迎,當日編輯見到街坊陸續步入店舖,情況門庭若市,到底餐廳賣乜菜式呢?由小店向海旁方向步行,10至15分鐘可以抵達小西灣海濱公園長廊,位置毗連西灣河碼頭,但未有可以野餐嘅地方,我哋建議稍移玉步至隔離鰂魚涌公園。基本上,鰂魚涌公園係香港一個大型公園,甚至分成一期、二期,近西灣河嘅入口亦即係太古城嘅入口,沿公園海濱長廊繼續走就會見到葛量洪號滅火輪展覽館,靠近東區走廊。

離鰂魚涌公園入口只有1分鐘步程,就可以見到一座小食亭,而小食亭對出有好幾個座位,當中幾個座位正對海邊,更難得嘅係座位全部有瓦遮頭,即使落雨都唔需要擔心食物會被淋濕嘅問題。

小西灣至筲箕灣之間有一間由2018年開業至今,一直受到區內街坊鄰里歡迎嘅小餐廳,菜式即叫即做,招牌有焗飯、炒飯、海南雞飯等,推斷大多數菜式都係適合作為外賣,甚至係安心野餐嘅選擇。

當中,無骨海南雞飯$60 可選油飯、白飯,雞肉、油飯比例都算係1:1,色調淺黃,都算均勻,油飯並非軟爛,只係比較黏口,稍欠椰香、黃薑味。而雞肉份量充足,雞皮偏薄,重點係啖啖肉,無骨落地,只係畫蛇添足多咗隻雞翼連翼尖,基本上包含有雞髀肉、雞胸肉,就算雞胸肉都係軟腍,雞髀肉就更滑嫩,雞肉以生菜墊底,入口唔油膩。另外,亦有酸甜味嘅絲絲配菜,口感似係青木瓜絲,不過唔肯定。醬汁只為一款,入口係泰國風味,味帶辛辣,偏偏又配合雞肉質感,感覺好惹味。

每一份套餐都會包含足料例湯,是日係紅蘿蔔雪耳南北杏湯,都屬老火湯,湯底鮮甜,略有油光,配料充足,紅蘿蔔帶出清甜味,加上南北杏、雪耳,味道好突出,只係肉香唔太重,純為點綴感覺,顯得蔬菜味較肉香重得多。

除咗港式焗飯,亦可以選擇炒飯,比較少見嘅係冬蔭功炒飯$60,發現炒飯都係即炒,打開蓋仍然係熱辣辣,而且並非只係兜返熱,炒飯乾爽而粒粒分明,非常有鑊氣。炒飯乾身得似前面嘅雨絲,並非崩塌下來嘅雨水,只係輕盈細雨,粒粒清爽而不黏口腔。冬蔭功炒飯色澤有如港式西炒飯,都係染成偏橙紅色調,相當搶眼,另配料都足夠,蝦肉隻隻爽口,調味適中,酸甜味好開胃,只係對比海南雞飯醬汁係完全唔辣,唯一稍稍有別於正宗冬蔭功。




E.A.Tips﹕

❶ 巴士路線 102, 606, 613, 2, 2A, 18X, 77, 82, 85, 99, 102, 606, 682, 722 都可到達鰂魚涌公園。

❷ 凍飲、檸蜜、柚子蜜加$3,汽水加$8,特飲加$10。

❸ 鰂魚涌公園係近太古、西灣河方向,而鰂魚涌公園二期就近鰂魚涌方向。

❹ 由西灣河步行至西灣河碼頭,再經過小西灣海濱長廊,隔離已經係鰂魚涌公園,入口靠近太古城。

❺ 由於小西灣海濱長廊無位坐,所以行過去鰂魚涌公園會好啲,加上小食亭位置附近有座位兼有瓦遮頭,落雨野餐都OK。

❻ 小麥廚房多街坊幫襯,所以可能需要等待少少時間,炒嘢會較耐。

❼ 套餐一般會包餐湯、熱飲,不過餐湯無晒就無。

❽ 西灣河碼頭可以前往東龍島或油塘。

❸ 野餐時,自己垃圾謹記自己帶走!

❹ 野餐要盡量使用可循環再用之餐具器皿。

❺ 可以挑選有長櫈嘅地方,會較方便。

❻ 有需要可自備小餐枱、小型露營櫈用餐,可以隨時去到邊食到邊。

❼ 野餐時正對海景用餐會比較Chill。

❽ 最好挑選較少人嘅地方,避免接觸人群。

❾ 野餐地同食肆最好距離不足15分鐘步程,以免食物及熱飲冷卻,有需要就自備保溫袋。


小麥廚房

  • 西灣河筲箕灣道218號地舖
  • 06:30 – 22:00
  • 2205 0811

鰂魚涌公園

  • 鰂魚涌太古城
  • 24hours

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!


太安樓起家!筲箕灣東大街人氣雪糕班戟 暖笠笠法式甜品配涼浸浸雪糕球 歎埋消暑雪頂茶飲啖啖舔舔脷
近大潭水塘!陽明山莊僅存殖民時代皇冠電話亭 紅噹噹包廂懷舊味濃
【野餐隨行】油麻地一級歷史建築鬧市空中花園野餐 神秘台式廚師發辦$100有找!
【野餐隨行】石硤尾池畔叢林小餐廳歎日式超靚便當 街角文具店兼賣醉雞麻醬蕎麥麵
大角嘴迷你威尼斯西餐廳Risotto出色 中西合璧加臘味賣Fusion?
【野餐隨行】小西灣角落港式下午茶 鬆軟夾餅拼金黃雞蛋仔粒粒飽滿
大角嘴海南雞專門店外賣孖寶套餐人均$79 除咗雞飯重有乜?
【邊境一日遊】尖鼻咀濕地5分鐘登龜山眺后海灣 沙橋村蠔殼田絕美夕陽餘暉
大隱隱於市!尖沙嘴鬧市藏維多利亞時代百年歷史建築物 遊走法定古蹟探視紅磚遊廊金字瓦頂
【野餐隨行】長洲歎人氣沙嗲牛米通 堤邊樹蔭全海景野餐 甜品有炸芒果糯米糍!
採環保餐盒+餐具!土瓜灣舊區鐵路便當地道台式口味 3款配菜期期轉換主食足料
【野餐隨行】元朗11款人氣名物瀑布蛋治有咩特別?大棠燒烤場變草地野餐場
深入皇后山邨直通布格仔路軍營 歷史古建築印度廟唔再神秘?
近電車總站!筲箕灣$30大大碟燒味飯 燒鴨燒肉件件皮脆肉嫩
【中秋好去處2022】灣仔藍屋重現大澳花燈節!手工五彩燈籠毗連景星街舊式T形街牌
素食Buffet有外帶!無肉食自助餐仍供應任夾外賣飯盒 全港5間分店抵過堂食低至$50