[sig_post_pv label=””] 個人瀏覽過
平時有去體育館做運動嘅朋友，未知有否留意以下呢間小店呢？今次記者於柴灣體育館發現呢間匿藏喺體育館內，非常神秘嘅餐廳，價錢相宜，值得拍拖去醫吓肚。
小店位置比較隱秘，需要步上一樓，並非出Lift直達，重需要經過幾個活動室，並且行到末端先會見到呢間日式定食屋。甫坐低，店員都會細心介紹有咩好食，最後食完只用咗200蚊左右埋單，兩個人人均只係$100！
第一樣想試就係鰻魚飯，京都風蒲燒鰻魚箱飯$98配麵豉湯，飯量好充足，食完好飽肚。鰻魚唔係細細條，至少打橫舖晒個飯盒，醬汁唔算鹹，味道唔錯，有啲黏稠感，鰻魚燒得恰到好處，魚質軟嫩，無燒燶到。
店員推介入秋鍋物，今次最鍾意試新嘢，揀咗一個最平嘅鍋物和風牛肉鍋 $68，湯底有豬骨、鰹魚、醬油、麵豉、辛辣任揀，揀咗鰹魚湯底。除咗肥牛就係雜菜鍋，湯底幾清，食完鰻魚飯再食呢個鍋清清哋就好舒服。雜菜鍋有娃娃菜、小棠菜、京蔥、洋蔥、豆腐、芋絲等等，配菜多過10款，啲菜好清甜，不過舊豆腐更軟滑可口。
加咗$28有招牌貓飯、麵豉湯、前菜、沙律，貓飯本身有木魚、紫菜、牛油同日本醬油。店員有提過醬油要逐少落，唔夠先再落，但第一下唔小心落多咗，結果就食到底會愈食愈鹹。入口木魚味好重，鍾意木魚陣味嘅人會鍾意，佢單買好平，糧尾食佢都唔錯，不過小編就唔太鍾意木魚陣味。
小食有紫芋甘栗餅、南瓜可樂餅，每款都只係$20，南瓜入口細綿，紫芋甘栗比較香甜，入面好似芋泥咁軟淋淋，有一粒粒栗子喺入面，加咗栗子多咗層次，有咬口。不過，小編反而覺得南瓜好食啲，可能質感更軟綿，磨成蓉更幼細，南瓜香甜味比較重，配脆炸呢種方式，好似香甜啲好食啲。
E.A.Tips﹕
(1) 小店每晚截單時間為20:30。
(2) 於柴灣體育館上一樓行到最盡頭就見到，門口有啲乒乓波枱。
悠 定食屋
地柴灣怡順街6號柴灣體育館1樓
星期一全日休息；星期二至日12:00 – 21:30 
9441 0951
