【野餐隨行】太子韓式多士保持高水準龍蝦灣郊遊徑俯綠蛋島無敵海景 2小時登大嶺峒大坑墩連綿山頭

[sig_post_pv label=””] 個人瀏覽過

野餐隨行系列一般會於同區找尋野餐點，今次編輯決定破格少少，選擇跨區野餐，於太子購買人氣韓式多士之後，乘搭巴士前往清水灣，然後正對海景野餐，再上行至龍蝦灣郊遊徑，路段簡單，適合拍拖兩個人輕鬆郊遊。

太子有一間受年輕人歡迎嘅人氣韓式多士外賣店Tic Tac Toast，門口以粉藍色為主調，室內有七彩馬賽克磁磚牆，室內註明所有食材嘅產地，餐牌可見主打三文治厚多士，餡料豐富，有唔少選擇，口味眾多，包括日本飛驒和牛、封門牛柳、軟殼蟹牛油果醬、冬陰功雞扒、手撕豬肩肉青蘋果、日式鰻魚紫菜、泡菜黑毛豬、素食大啡菇等，即叫即烘烤製作，價錢可能會比一般多士貴。

先乘搭一程巴士由太子到將軍澳，再轉乘一程小巴，車程約需1小時，於大坳門迴旋處落車後，依循龍蝦灣路向下行，沿海旁一直走，20分鐘直達龍蝦灣石刻。沿樓梯步行到底，就會見到龍蝦灣石刻，只有寥寥幾位釣魚客站於海邊位置。

而龍蝦灣石刻於1983年被古物古蹟辦事處列為香港法定古蹟，古代刻鑿嘅石刻紋飾圖案加形怪狀，現代人確實難以理解，不過龍蝦灣石灣似乎比黃竹坑石刻等淺色。以石刻旁邊作野餐點，人流唔多，可享無敵大海景，左邊為橋咀島、滘西洲、吊鐘洲，右邊則為綠蛋島，可享西貢海景，另亦可以選擇前行多少少到龍蝦灣石灘野餐。

打開紙盒，封門牛柳多士$55 牛肉質感軟腍，嫩滑而有牛味，脂肪唔多，肉味濃郁，入口唔會韌，封門牛柳即係牛隔膜肉，配搭生菜、蕃茄，再加上蜜糖芥末醬，封門牛柳無膩感，生菜、蕃茄只係為多士加添清爽感覺。至於大蝦帶子芒果多士$55 賣相一流，雖然蝦肉、帶子唔大隻，份量唔多，但芒果片幾香甜，配搭大片爽脆生菜、微甜蕃茄帶清新感覺。

韓式多士其實即係鐵板多士，以牛油將麵包煎得香噴噴，兩份多士都以烘烤過嘅麵包夾住餡料，麵包煎香後呈金黃色，即使由太子前往清水灣需要1.5小時車程加步程，麵包靜置一段時間都仍然保持水準，多士以能夠循環再用嘅紙盒盛載，可以一直保持多士狀，唔會被夾扁，麵包鬆軟，連同餡料就偏厚身，味道仍舊保持，相當難得。

野餐過後，折返龍蝦灣路，繼續直行到底，不出10分鐘就會到達龍蝦灣郊遊徑入口。龍蝦灣本身位處清水灣半島，西面為相思灣、香港科技大學，位於釣魚翁至清水灣沙灘之間，前臨牛尾海，郊遊徑連接大嶺峒，龍蝦灣海水清澈，一直都吸引潛水客探索海底珊瑚群、海葵群。

龍蝦灣道盡頭會見到清水灣騎術學校及教育中心，內有一個馬術訓練場，能夠近距離望馬匹，訓練場背後亦可到達龍蝦灣風箏場，內有大草地，只係2至3分鐘步程，可回望剛才龍蝦灣石灘、牛尾洲，另一端可仰望龍蝦灣郊遊徑大嶺峒。

折返原路，兜個圈就可以上行龍蝦灣郊遊徑，呢個方向會先上行大嶺峒，然後下行至清水灣郊野公園。郊遊徑有好幾個小平台能夠觀景，沿途都係全海景觀，上行20分鐘左右可以回望剛才嘅風箏場，亦可眺望吊鐘洲，不過龍蝦灣郊遊徑全程都係低矮灌木，少見遮蔭位。

郊遊徑頭段可能有少少陡峭，但上行約10分鐘就可以於龍蝦灣郊遊徑俯瞰山腳綠蛋島，當中亦有一段小山路可以爆林落正對綠蛋島嘅龍蝦灣石灘，事實上本身大嶺峒地質係火山岩。再前行10分鐘又可以到達另一個賞景位，位置仍然可以回望綠蛋島。綠蛋島本身又叫爛排，由於從上而下俯視半圓形小島似足一隻荷包蛋形狀，中央蛋黃位置又剛好為植被，呈現綠色蛋黃，可愛非常，所以就被現代人稱作綠蛋島。登上龍蝦灣郊遊徑，就係最典型觀賞綠蛋島風景嘅位置。

再步行約5至10分鐘，就可以直上大嶺峒山頂，最高點海拔高約291米，原來大嶺峒原名叫餓死雞山，由山腳到山頂距離大概只係走2個嘉頓山。山頂位置近360度風景一覽無遺，包括將軍澳、小棕林、火石洲、清水灣等，甚至係東龍島、果洲群島不過綠蛋島已經被山峰遮擋，而附近可見一個三角形狀嘅大石頭，有幾分似一舊日式飯糰。

前行3分鐘則可以登上龍蝦灣郊遊徑三角測量站，位置係大嶺峒觀景台，當中有一個好出名嘅龍蝦灣懸崖排隊打卡位，但其實好似無必要企上去影，小平台已經可享絕美山海景，青山綠水風景優美。

之後下行10分鐘左右，清水灣高爾夫球場清晰可見，沿路可以折返龍蝦灣郊遊徑山腳，到達清水灣樹木研習徑，可以前往大坑墩觀景台。穿過燒烤場，亦可以前往大坑墩風箏場，大草地方向亦有另一個觀景台，大坑墩基本上係山腰位置，海拔高約100多米，連接車路，大坑墩公園大草地可觀望布袋澳、青洲、清水灣、果洲群島、東龍島，亦可見香港三尖之一、海拔高344米嘅釣魚翁，甚至港島柴灣、小西灣。最後，經清水灣就折返大坳門迴旋處，步程約15至20分鐘，就可以返回巴士站。

延伸閱讀﹕坑口出發！登廟仔墩上洋山征服「三尖」釣魚翁環瞰360度山海景俯清水灣將軍澳

E.A.Tips﹕

❶ 太子小店可能需待等待一段時間，因為即叫即整。

❷ 一款多士加$15，可以多2款小食，加$10就可以轉蛋包飯配茄汁。

❸ 飲品均為杯裝，如果自備水杯或水樽，可以減$3。

❹ 有台灣黃肉西瓜汁、鳳梨汁，套餐價$22。

❺ 巴士路線796C可以從太子直達將軍澳，車程約45分鐘。巴士路線91,91A 可由鑽石山前往大坳門，小巴路線103,103M,16 均可以由將軍澳或寶林直達大坳門，巴士車程約45分鐘，小巴車程就15至20分鐘。

❻ 由大坳門落車，無論走龍蝦灣路定清水灣道，邊個方向都大概要走20分鐘，先可以到達龍蝦灣郊遊徑，建議走龍蝦灣路前往，由清水灣道折返，呢個方向兩段都係下行馬路，咁就毋須走上行嘅馬路路段。

❻ 愛護環境，記得自己垃圾自己帶走。

❼ 於大坳門起步前往龍蝦灣，建議先走龍蝦灣路，然後再行龍蝦灣郊遊徑，因為大多數都會從大坑墩出發。

❽ 迴旋處附近有公廁、士多，行到大坑墩亦有公廁、燒烤場。

❾ 郊遊徑多泥路，最好穿著防滑行山鞋。

❿ 記得帶齊充足糧水。

❿ 郊遊徑全程都多曝曬位，最好穿著長袖衫褲，準備防曬用品。

❿ 部份位置會有蚊蟲，最好帶備防蚊用品。

❿ 唔建議揸車，因為龍蝦灣路為單程路，有對頭車會好麻煩，亦有唔少自私車主將車輛停泊於避車處。而另一邊廂，清水灣道方向進入大坑墩雖然有停車場，但車輛眾多，而且不時會有抄牌情況。

❿ 大坑墩方向入口嘅樓梯級較狹窄，而龍蝦灣路方向入口嘅樓梯級就比較寬闊。

❸ 野餐時，自己垃圾謹記自己帶走！

❹ 野餐要盡量使用可循環再用之餐具器皿。

❺ 可以挑選有長櫈嘅地方，會較方便。

❻ 有需要可自備小餐枱、小型露營櫈用餐，可以隨時去到邊食到邊。

❼ 野餐時正對海景用餐會比較Chill。

❽ 最好挑選較少人嘅地方，避免接觸人群。

❾ 野餐地同食肆最好距離不足15分鐘步程，以免食物及熱飲冷卻，有需要就自備保溫袋。