石圍角店麥當勞叔叔
兩個人影吓相,  新界,  焦點熱話,  神秘之地,  限定活動

全港最後一個麥當勞叔叔!石圍角獨立全幢舊式McDonald’s限時追蹤 傳統冬菇亭變美式快餐店即將裝修絕跡香港

瀏覽次數:3031
個人瀏覽過





月前,本港麥當勞餐廳已經宣佈3間分店即將會於短時間內重新裝修,包括葵盛東商場、石圍角商場、利東商場,呢間美式餐廳內經典麥當勞叔叔雕塑像、一眾角色油畫都會於裝修後絕跡香港,以新形象再次面世,唯獨山頂分店可以獲得保留。不過,當中葵盛東商場、利東商場分店極速進行裝修翻新,完成後麥當勞叔叔已經被消失,大家可以唔使再去,目前只剩低石圍角商場McDonald’s擁有全香港最後一個麥當勞叔叔雕塑像,但之後一樣會被消失,想拍拖兩個人懷緬吓就真係要盡快影相留念啦!

麥當勞餐廳來自美帝,官方原先命名為Ronald McDonald,帶動全球美式速食文化,麥當勞叔叔形象、知名度有指僅次於聖誕老人,而喺香港又叫M記。麥當勞叔叔(Ronald McDonald)於1963年初次登場,由已於2009年離世嘅拉脫維亞人Michael Polakovs創作,樣貌狀似一個馬戲團小丑人物,頭頂有火紅爆炸頭,身上穿有鮮黃工作服,一雙襪紅白相間,襯返工作服內嘅衫,腳上踩住大紅短靴,係一個陪伴70後、80後、90後小朋友成長嘅重要人物角色,以往麥當勞餐廳更有一個1:1麥當勞叔叔、一眾角色嘅油畫置於餐廳內,舊式M記可以算係橫跨至少30年嘅香港人共同回憶。

現時本港麥當勞餐廳嘅裝修風格都採取時尚摩登為主,令傳統舊式風格嘅麥當勞餐廳已經少之又少,本來都重有4間,不過利東商場、葵盛東商場內嘅麥當勞餐廳於宣佈裝修後已極速裝修翻新完畢,而山頂麥當勞餐廳雖然獲得保留,但其實只係儼如一個麥當勞博物館,裝潢、地板都為新式設計,四個主要角色人物被縮小並困於展覽箱內,油畫既已消失,1:1麥當勞叔叔亦已經離席。

除咗麥當勞叔叔,其他經典角色有小飛飛(Birdie the Early Bird)、漢堡神偷(Hamburglar)、滑嘟嘟(Grimace),角色人物都略帶滑稽,連同麥當勞叔叔係餐廳4大吉祥物。小飛飛頭上紮起孖辮,身穿粉紅色工人褲,係一個充滿活力嘅小女孩;滑嘟嘟就更搶眼,皆因由頭到腳全身蕃薯紫,為人天真兼慢手慢腳;至於漢堡神偷就身穿黑白間條衫,以黑色眼罩遮住半個樣,背後有斗蓬,鍾意混入大家庭內偷食物,雖然以前睇落係反派、奸仔,但現時喺香港望落就似係劫富濟貧嘅英雄。以往4個角色會出現於麥當勞大家庭合照油畫、告示板或門口嘅開心樂園餐玩具展板,仍有記憶嘅你一定會記得開心樂園餐附送嘅玩具,甚至係4個角色人物嘅公仔、紀念品。

至於石圍角商場分店則變成目前唯一舊式麥當勞餐廳,因為石圍角麥當勞仍然未有裝修動工,雖然無利東商場、葵盛東商場分店都有嘅經典油畫,但就有1:1麥當勞叔叔,並非如利東商場分店嘅雕塑像為站立姿勢,而係同葵盛東商場分店雕塑像一樣係坐於長櫈上。麥當勞叔叔有一個揮手嘅手勢,以前睇係「Hello」,係歡迎客人嘅意思,但現今嘅麥當勞叔叔於門口舉起揮手嘅手勢,就如同「Goodbye」,感覺係「Say Goodbye to Hong Kong」。

如果細心啲再留意吓,會發現餐枱、金屬櫈、人字木紋階磚地板都仍舊係最傳統嘅舊式風格,而更細心嘅你,應該會留意到大門口紅底黃字嘅塑膠招牌亦係由舊時保留至今,而非現時新式嘅黑底白字。

更值得留意嘅係,石圍角麥當勞分店前身其實係舊式冬菇亭大排檔,呢種舊式冬菇亭係舊式公共屋邨內嘅食肆設施,純粹係頂端望落似冬菇,所以叫冬菇亭。現時可見石圍角麥當勞外圍仍然係有舊式風格,而石圍角麥當勞就係本地已經極罕有嘅獨立全幢麥當勞,到底之後係全幢裝修,抑或係純粹內部裝修兼清走麥當勞叔叔呢?

目前,仍未知道石圍角分店裝修翻新嘅日期,所以大家想找尋全香港碩果僅存嘅麥當勞叔叔,尤其係想影相留念就要盡快前往啦!




E.A.Tips :

❶ 石圍角邨石圍角商場麥當勞分店已經係最後一間仍然未裝修嘅傳統麥當勞,葵盛分店、利東分店已經裝修,其實石圍角分店亦只係未裝修,但暫時未清楚裝修日子,所以要影就要快啦!

❷ 石圍角邨石圍角商場分店為24小時營業。

❸ 石圍角分店其實都係只淨低麥當勞叔叔,無晒壁畫,不過地板、枱櫈都重係舊式。

❹ 山頂分店雖然仍然保留,但其實只係一間新裝修嘅麥當勞,另加4隻舊式代表公仔,不過全部被困圓筒形玻璃箱內,似足博物館,準睇唔準掂。

❺ 叫大家去懷念吓舊時美式餐廳影吓相留念,無叫大家去食,自己諗啦。






石圍角邨石圍角商場麥當勞分店

  • 荃灣石圍角邨石圍角商場平台324號舖
  • 24hours
  • 2415 6879

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!


太安樓起家!筲箕灣東大街人氣雪糕班戟 暖笠笠法式甜品配涼浸浸雪糕球 歎埋消暑雪頂茶飲啖啖舔舔脷
近大潭水塘!陽明山莊僅存殖民時代皇冠電話亭 紅噹噹包廂懷舊味濃
【野餐隨行】油麻地一級歷史建築鬧市空中花園野餐 神秘台式廚師發辦$100有找!
【野餐隨行】石硤尾池畔叢林小餐廳歎日式超靚便當 街角文具店兼賣醉雞麻醬蕎麥麵
大角嘴迷你威尼斯西餐廳Risotto出色 中西合璧加臘味賣Fusion?
【野餐隨行】小西灣角落港式下午茶 鬆軟夾餅拼金黃雞蛋仔粒粒飽滿
大角嘴海南雞專門店外賣孖寶套餐人均$79 除咗雞飯重有乜?
【邊境一日遊】尖鼻咀濕地5分鐘登龜山眺后海灣 沙橋村蠔殼田絕美夕陽餘暉
大隱隱於市!尖沙嘴鬧市藏維多利亞時代百年歷史建築物 遊走法定古蹟探視紅磚遊廊金字瓦頂
【野餐隨行】長洲歎人氣沙嗲牛米通 堤邊樹蔭全海景野餐 甜品有炸芒果糯米糍!
採環保餐盒+餐具!土瓜灣舊區鐵路便當地道台式口味 3款配菜期期轉換主食足料
【野餐隨行】元朗11款人氣名物瀑布蛋治有咩特別?大棠燒烤場變草地野餐場
深入皇后山邨直通布格仔路軍營 歷史古建築印度廟唔再神秘?
近電車總站!筲箕灣$30大大碟燒味飯 燒鴨燒肉件件皮脆肉嫩
【中秋好去處2022】灣仔藍屋重現大澳花燈節!手工五彩燈籠毗連景星街舊式T形街牌
素食Buffet有外帶!無肉食自助餐仍供應任夾外賣飯盒 全港5間分店抵過堂食低至$50