大窩口邨黃花木棉

【賞花地圖2022】赤紅變鮮黃!大窩口邨驚現激罕黃花木棉 受氣候土壤變化轉色超搶眼

[sig_post_pv label=””] 個人瀏覽過





踏入初春,代表又到咗賞花嘅時候,本來編輯今年並無打算追花,亦唔想寫香港賞花2022追蹤地圖,但近日於大窩口發現一棵非常罕見嘅黃花木棉樹,樹上朵朵鮮黃木棉掉落,色調極搶眼,無論樹形定花形都同現時隨處可見嘅紅花木棉樹相似,原來黃花木棉係極罕有嘅品種,只係受氣候、土壤等環境影響轉色,黃棉確實比紅棉更值得拍拖兩個人去駐足觀賞。

大紅色木棉向來吸引唔少人前往影吓相,例如係石崗軍營及雷公田村附近,到處鮮艷橙紅,紅得似火炬,但現時紅棉栽種地方日益增多,令香港處處火紅一片,艷紅木棉變得唔再矜貴。木棉本身原產自爪哇、印度等地,後來被陸續引進馬來半島、印度尼西亞、華南、台灣、香港,生長快速,係台中縣縣花及高雄市市花。最近,編輯於大窩口邨發現一棵獨特而罕見嘅黃花木棉樹,樹幹高約20米,乍看樹頂滿佈金黃花朵,連旁邊巴士站頂都被染成鮮黃色,花朵長得燦爛,極為搶眼。

你以為黃花木棉係新品種?事實上,黃花木棉同紅花木棉嘅花朵形態一模一樣,花形、樹幹並無分別,只係顏色有異,本身通常為赤紅色,但內裏基因包含鮮紅品種之餘,亦有橘黃、黃色,而黃色感覺高雅又顯眼,既顯生機勃勃,亦令馬路旁邊增添幾分獨特氣質。

據悉,黃花木棉本身含有一種「花色素苷」嘅物質,會隨天氣或氣候環境變化,甚至土壤、周邊環境都可能對黃花棉有影響,尤其係陽光充足嘅地方,因為黃花木棉樹喜愛生長於陽光充足、較熱同較乾嘅地方。而黃花木棉如同滿天飛舞嘅棉絮,更大特色係相對紅花木棉可以抵禦UV紫外光,而且更堅韌,感覺更加堅毅不屈。

生長於大窩口邨富貴樓對出嘅黃花木棉樹,每條深褐色枝條都連上朵朵黃花,令路邊黃花綻放,配合蔚藍天空更為搶眼,相當茂盛。編輯碰到一位居住大窩口邨嘅街坊,女士提到此處本身有3棵同一類別嘅樹,但現時只剩低1棵,情況變得更為罕有。




E.A.Tips :

❶ 黃木棉位置為大窩口邨富貴樓對出巴士站旁邊,靠近小山坡,對上為大窩口足球場。

❷ 記得自己垃圾自己帶走。

❸ 賞花時保持極低聲量,唔好騷擾邨民。

❹ 愛惜樹木,唔好破壞樹幹。

❺ 花朵會好惹蟻,謹記要特別小心,避免螞蟻攀上手背。

❻ 2至4月皆為木棉嘅開花期。








大窩口邨富貴樓

  • 新界葵青葵涌大廈街43號

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!