【野餐隨行】葵廣外選擇！葵芳微舖驚喜食樂原條鰻魚飯 中葵涌公園前牧牛場石屋登二級歷史建築

[sig_post_pv label=””] 個人瀏覽過

提到葵芳美食地帶，唔少人只會諗到葵涌廣場，但事實上葵廣以外重有好多值得拍拖兩個人選擇，有留意eatwo嘅讀者一定知道，以往編輯曾提過好幾間葵廣以外嘅食店，今次再推介一間街坊價午餐小店，然後帶大家到葵芳後花園野餐，因為每一區都應該要有至少一個野餐點。

葵芳信芳街近葵芳街街市亦有一間微舖，由2018年起為街坊提供平價午餐飯盒，表面望落平平無奇，原來質素唔差，份量亦夠充足。店內招牌貨為炒滑蛋、牛角酥、鰻魚飯、香濃即磨咖啡等。

由小店起步，穿過葵芳廣場，前往大連排道方向，可以上行至中葵涌公園。該公園位置隱蔽，附近皆為工廠大廈，但園內又被茂密樹木遮擋，變成一個葵芳第二空間。公園人流唔算多，大多只係晨運人士，但公園依山而建，園內綠樹成蔭，設施齊全，環境舒適，極為清幽寧靜。公園內有一個野餐區，只需一直向上步行，依循指示牌就會搵到。

呢個神秘公園稍為清冷，內有一個野餐區，雖然叫野餐區，但事實上係無大草地，反而係一地碎石，不過就置有幾張枱櫈，可以直接坐上去明正言順地食飯。

香煎雞扒蛋蓋飯$42，可選粟米汁、燒汁、咖哩汁、黑椒汁，燒汁雞扒似乎係比較配合同穩陣，雞扒同白飯分隔，白飯頂端舖上一隻煎蛋，賣相不俗，雞扒軟腍，白飯軟硬適中，燒汁濃稠度恰好，唔會太鹹，而煎蛋略有洋蔥香，只係略嫌欠缺蔬菜作配料，令飯盒唔夠均衡。

必試之選一定係原條蒲燒鰻魚飯$68，大大條鰻魚，份量幾重，鰻魚舖滿飯盒，單單賣相已經夠吸引，魚質嫩滑，魚肉軟腍，而醬汁亦夠濃稠，白飯黏滿蒲燒醬汁，鹹中帶甜，非常惹味，撈飯一流。

中葵涌公園一端為葵芳，而頂端則可連接青山公路，園內有一個日晷，而日晷係舊式公園都會有嘅產物，日晷係一座可以根據太陽位置而推斷每日時間嘅建築，要睇嘅係太陽嘅高度、方位。簡單啲嚟講，以今次為例，影子喺日晷上羅馬數字2至3之間，代表當日時間係2點至3點左右，日晷的確係一個好實用嘅發明。

更特別之處，係中葵涌公園其實有逾50年歷史，皆因公園前身為曾氏瑞峰牛場及梁發牛奶廠，60年代時共有2個牧牛場，據《葵青－舊貌新顏．傳承與突破》顯示，2個牧牛場都為家族經營，瑞峰牧場由曾氏經營，而梁發牛奶廠就係梁發牧牛場，後者被稱為「由楊氏經營的不知名牧場」，有指鮮奶係會供應俾牛奶公司、九龍維記鮮奶，所以中葵涌公園又叫做「牛房公園」。

石屋為一座平房，從外觀察古色古香，石屋樓高兩層連天台，係瑞峰牧場主人住宅，地下一層當時為工人飯堂，只係於70年代左右結業，後來將土地歸還政府，公園內亦可見一個栩栩如生嘅石製牛雕像，純粹係前拓展署購置用作紀念牧牛場，不過現時小石屋就係康文署公園辦事處。建築物恍如一間小石屋，並由未獲得歷史評級到近日（10日）終於獲得古諮會歷史評級，目前係一幢香港二級歷史建築物。

E.A.Tips﹕

食樂

• 葵芳信芳街4號地下3號舖

• 星期一至六07:00 – 15:00、星期日08:00 – 15:00、公眾假期08:00 – 15:00、公眾假期前夕07:00 – 15:00

• 2683 1189

中葵涌公園

• 葵涌大連排道 /葵涌新葵街

• 24 hours

• 2424 7201

Δ 版權為E.A.Two 兩個人醫吓肚所有，歡迎轉貼連結，勿全篇文章轉載

Δ 如果覺得我哋嘅介紹啱睇，就Like吓我哋Facebook / Follow吓我哋Instagram啦！