蟹膏似糞便？旺角車仔麵式日式丼飯 自選3餸每款$18起

平時兩個人食日式丼飯，通常都係餐牌有咩配搭就食邊款，旺角就有一間丼飯專門店容許客人自選魚生刺身配搭，搖身變成3餸丼飯，情況恍如港式車仔麵，自選刺身後，一碗丼飯價錢同平時拍拖去食正常丼飯差唔多，CP值都算高，更特別之處係蟹膏似足一坨糞便，到底味道係好係壞？

大勝丼基本上係旺角區內嘅人氣丼飯，位置正正喺信和中心隔離嘅旺角新城，相當方便，大門口有大紅色和風燈籠，室內有本土佈置，不過就算只係外賣丼飯，都拍得住堂食嘅丼飯。

本身餐牌內有唔少魚生丼飯，而更特別之處係有自選丼飯，如同港式車仔麵模式，每一份大勝自選丼都可以揀白醋飯$10 或赤醋飯$18，本身亦有味噌湯、甜品，加$20配蟹籽沙律、前菜、沒油精飲料，而刺身由$18起，都算係豐儉由人。

是次挑選自家製玉子燒$20/二切、油甘魚$28/二切、蟹膏$38/一份30g，原來重有海膽$78/一份，以油甘魚為例，刺身唔算太厚，都算肥美新鮮，至少無雪藏味，油甘魚質感細滑，油份適中，甘香味美，而玉子燒雖然不過不失，蟹膏就反而係最大驚喜！打開蓋之後，發現蟹膏如同一坨糞便，賣相極差，有欠美觀，但蟹膏份量的確超多，鹹味適中，而且係鹹中略帶清甜味，唔會只係偏濃味，即使一啖飯加一啖蟹膏，都夠晒撈飯。

如果始終難以選擇嘅話，亦可以揀選外賣自取套餐，每一份都配有味噌湯、甜品、無酒精飲品，都係罐裝飲品嚟，甜品就係一粒雪米糍。比如係角切魚生丼$88，包含三文魚、油甘魚、吞拿魚、蟹籽、蛋、青瓜，米飯同樣為珍珠米，醋飯微酸，拌有飯素，但飯粒比較硬，總有啲美中不足。

值得一讚嘅反而係最唔起眼嘅味噌湯，並非只係溝水出嚟，內有日式油揚、白蘿蔔片，有別於平時嘅海帶豆腐湯，味道唔算鹹，係自己調製同熬煮過，味道同坊間有分別。