歌手傅珮嘉主理!灣仔人氣台灣菜尚青商號荃灣開分店 同光榮冰室做鄰居

歌手傅珮嘉主理!灣仔人氣台灣菜尚青商號荃灣開分店 同光榮冰室做鄰居

灣仔有一間熱門台灣菜自從開設後都受到歡迎,包括獨家牛燥飯、台灣牛肉麵、台式便當、麻辣鴨血、台式茶飲等菜式,近月業務擴張,正式於荃灣開設分店試業,落戶於光榮冰室隔壁,拍拖兩個人想食都唔需要再去灣仔同人逼啦。

尚青商號本身由歌手傅珮嘉(又名傅又宣)及其台藉丈夫以夫妻檔主理,由銅鑼灣三星牛肉麵改為開設尚青商號,食店從灣仔開到荃灣,但就由2層樓變1層地舖,而尚青於台語中有最新鮮嘅意思,裝潢亦走文青簡約風格,似台灣舊式嘅小屋,充滿台灣味。

麵食有湯麵、拌麵可擇,台灣牛肉麵固然係招牌作之一,湯底可選紅燒、麻辣、蕃茄口味,牛肉類別亦可揀半筋半肉或牛肉,甚至埔里花雕牛肉麵。而拌麵當中除咗蔥油、蒜香拌麵,亦可以試一試酒香椒麻牛肉絲乾拌麵$58,可選擇配幼麵或手工寬麵,麵底配菜有韭菜、芽菜、溏心蛋。而牛肉絲伕牛腩切出嘅肉絲,有少少乾柴,但又有少少係軟嫩。

幼麵比寬麵較為爽口彈牙,口感幾札實,只要都條唔好放多過30分鐘先食,基本上都唔會變形。麵條配搭椒麻醬汁後,每條麵條都黏附椒麻醬,香辣帶麻,辛辣味唔重,反而只係滲出陣陣酥麻感,少量麻香比辛辣味更刺激,層次比辣度高更豐富,比死辣更過癮,麻辣同椒香味有餘韻。

台灣便當就有9款可以選擇,包含有台灣鐵路便當、牛三寶便當,亦有魯肉便當、台式焢肉飯便當$54。當中焢肉飯肉香滿滿,焢肉肥瘦層層相間,肉質算軟腍,無乜油膩感,但唔係入口即融嘅肉質。醬汁鹹中帶甜,撈飯食夠惹味。

每款拌麵、便當麵配有2款是日小菜、半隻溏心蛋,蛋黃溏心,有少少滷味,另外包含酸菜、醃蘿蔔、白菜、雲耳,配菜味道一般,其他小食有滷味、炸物、麻辣鍋等,價錢相宜。而每份套餐都有一杯冬瓜茶或烘焙烏龍茶,冬瓜茶冰度頗高,甜度唔高,相對平時嘅冬瓜茶比較清甜,而鳥龍茶亦同樣冰度頗高,僅有微微烘焙香味。

E.A.Tips :

❶ 荃灣店位置為光榮冰室隔離。

❷ 荃灣為新店,而灣仔舊店地址為灣仔蘭杜街4號文熙大廈地鋪。

❸ 店舖無加一服務費。

EATWO
Miss A

尚青商號

荃灣兆和街16號和盛樓地下5號舖
11:30 – 21:00
3797 3800