珍記大廚小食+841石硤尾配水庫遊樂場+459龍翔道觀景台
九龍,  兩個人影吓相,  兩個人醫吓肚,  和你Taste,  港式,  神秘之地,  野餐隨行

【野餐隨行】石硤尾驚現時光倒流價飯餐!10分鐘攀登配水庫遊樂場野餐 龍翔道清靜秘地觀九龍市景

瀏覽次數:230
個人瀏覽過





石硤尾向來係一個食肆少、影相地亦少嘅小區,最為人熟悉嘅只有石硤尾公園,想拍拖兩個人野餐嘅話,的確可以前往石硤尾公園,但編輯更推介先前往白田邨一間小店按喜愛揀選時光倒流價飯餐,再到離公園不遠嘅配水庫遊樂場,海拔較高而人流較少,空間十足,可以放心野餐。

位處石硤尾白田邨白田購物中心嘅珍記大廚小食,店內面積細小,老闆娘珍姐一腳踢,以為食物選擇唔會太多,但從餐牌可見種類甚豐富,包括飯餐、粉麵餐、港式小食,每款小食只係介乎$5至$30,除咗魚蛋、燒賣、茶葉蛋,炸物為最受歡迎嘅小食,包括煎釀三寶、魷魚鬚、鹽酥雞等,當中又特別以食雞聞名,包含炸雕髀、蔥油雞扒。

招牌飯餐通通只係$35至$38,望見價錢嚇咗一跳,以平常坊間食餐飯嚟講,今次絕對係時光倒流價!其中叉燒滑蛋飯$35 於白飯表面放上叉燒炒滑蛋奄列,滑蛋軟滑,叉燒偏瘦,但份量充足,一盒飯至少有5至6大舊叉燒,而滑蛋表面又加添蔥花,略帶輕微蔥香,頹飯都可以有水準,只係白飯為隔夜飯稍有遜色,或者原因係剛開舖。

避風塘豬扒飯$35 則非常香口,打開蓋已聞到香噴噴,豬扒表面舖滿大量炸蒜粒粒,鹹中帶少辣,僅有微辣感,夠惹味。而豬扒已切開小塊,方便食用,豬扒肉質尚算軟腍,至少唔乾柴、唔嚡口,醃製香味中夾雜濃濃蒜香味。

每份飯餐都屬窮人恩物,份份包熱飲,的確平靚正,而凍飲就加$3,$20特飲加$10,例如檸茶撞蜜桃梳打,有2片檸檬,蜜桃、紅茶味唔重,只為解渴。

由白田邨向龍翔道方向上行,經過石硤尾公園後,就會到達石硤尾配水庫遊樂場,位置毗鄰澤安邨。配水庫遊樂場內有超大草地,地方空曠,只係現時無人打理,草皮愈來愈少,有沙漠化嘅感覺,青蔥草地頓變荒蕪沙地。草地原為棒球或壘球運動之用,旁邊有小型足球場、籃球場,大草地以600米緩跑徑圍繞,比平常運動場400米緩跑徑更長。

假如嫌配水庫遊樂場無乜景觀,可以稍移玉步經龍翔道旁前往一個半廢棄觀景台,不單人流稀少,而且可俯視山腳九龍半島風景,甚至遠眺香港島。該觀景台以往經常為電視劇或電影拍攝場地,相信長櫈、涼亭都令大家有一定印象。

秘地位處黃大仙至葵涌之間,躲藏於龍翔道一旁,既可眺望九龍仔公園、舊啟德機場全貌、維多利亞港,亦可俯視九龍塘畢架山花園一帶,而背後則為獅子山、筆架山。不過,現時觀景台嘅景觀基本上並非遼闊,皆因有大量樹木遮蔽風景,未有人定期修剪樹木,亦無適當護養。




E.A.Tips﹕

❶ 巴士路線2B, 2E, 2F, 86, 86A, 86C, 87B, 886, 214都可到達南昌街;而巴士路線2B, 2F, 86C, E22亦可到達歌和老街;巴士路線33,38,40,42c,86, 87b,214,290,61x, 62x,69c,252x, 258d,259d,268c,269c,於豐力樓落車,2分鐘步程可達龍翔道眺望處,有24小時免費停車場,可自駕。

❷ 受護環境,記得自己垃圾自己帶走,或扔於垃圾桶內,唔好選留公園或遊樂場內。

❸ 石硤尾配水庫遊樂場同石硤尾公園都有洗手間,後者更有補給點,龍翔道眺望處亦有洗手間。

❹ 而天橋就毗鄰龍翔道巴士站,由石硤尾配水庫遊樂場步行到天橋腳程約10至15分鐘。

❺ 不過兩個地方都會有蚊。

❻ 由小店步行至石硤尾配水庫遊樂場,步程約15分鐘,如果唔想行太遠,可以選擇較近嘅石硤尾公園。

❼ 小店內有自家製辣醬同醬料可以無限添加。

❸ 野餐時,自己垃圾謹記自己帶走!

❹ 野餐要盡量使用可循環再用之餐具器皿。

❺ 可以挑選有長櫈嘅地方,會較方便。

❻ 有需要可自備小餐枱、小型露營櫈用餐,可以隨時去到邊食到邊。

❼ 野餐時正對海景用餐會比較Chill。

❽ 最好挑選較少人嘅地方,避免接觸人群。

❾ 野餐地同食肆最好距離不足15分鐘步程,以免食物及熱飲冷卻,有需要就自備保溫袋。


珍記大廚小食

  • 石硤尾偉智里1-3號白田購物中心地下84號舖
  • 11:00 – 00:00

石硤尾配水庫遊樂場

  • 石大窩坪龍翔道
  • 24hours
  • 2741 4044

龍翔道眺望處

  • 九龍塘龍翔道
  • 24hours

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!


太安樓起家!筲箕灣東大街人氣雪糕班戟 暖笠笠法式甜品配涼浸浸雪糕球 歎埋消暑雪頂茶飲啖啖舔舔脷
近大潭水塘!陽明山莊僅存殖民時代皇冠電話亭 紅噹噹包廂懷舊味濃
【野餐隨行】油麻地一級歷史建築鬧市空中花園野餐 神秘台式廚師發辦$100有找!
【野餐隨行】石硤尾池畔叢林小餐廳歎日式超靚便當 街角文具店兼賣醉雞麻醬蕎麥麵
大角嘴迷你威尼斯西餐廳Risotto出色 中西合璧加臘味賣Fusion?
【野餐隨行】小西灣角落港式下午茶 鬆軟夾餅拼金黃雞蛋仔粒粒飽滿
大角嘴海南雞專門店外賣孖寶套餐人均$79 除咗雞飯重有乜?
【邊境一日遊】尖鼻咀濕地5分鐘登龜山眺后海灣 沙橋村蠔殼田絕美夕陽餘暉
大隱隱於市!尖沙嘴鬧市藏維多利亞時代百年歷史建築物 遊走法定古蹟探視紅磚遊廊金字瓦頂
【野餐隨行】長洲歎人氣沙嗲牛米通 堤邊樹蔭全海景野餐 甜品有炸芒果糯米糍!
採環保餐盒+餐具!土瓜灣舊區鐵路便當地道台式口味 3款配菜期期轉換主食足料
【野餐隨行】元朗11款人氣名物瀑布蛋治有咩特別?大棠燒烤場變草地野餐場
深入皇后山邨直通布格仔路軍營 歷史古建築印度廟唔再神秘?
近電車總站!筲箕灣$30大大碟燒味飯 燒鴨燒肉件件皮脆肉嫩
【中秋好去處2022】灣仔藍屋重現大澳花燈節!手工五彩燈籠毗連景星街舊式T形街牌
素食Buffet有外帶!無肉食自助餐仍供應任夾外賣飯盒 全港5間分店抵過堂食低至$50