MUM日常野菜料理
兩個人醫吓肚,  和你Taste,  素食

毗連窩子!佐敦酒店搬到新蒲崗 精緻一汁三菜素食料理人均$100

瀏覽次數:116
個人瀏覽過





新蒲崗西式咖啡店窩子向來係人氣店,由平日到假日都可見人龍,但事實上唔少人只顧熱門食店,忽略咗其他可以一試嘅小店,例如同區一間極有水準嘅小春日和已經支持唔住結業,編輯期望讀者拍拖兩個人可以多留意一啲真小店,分散投資,而窩子隔離有一間以素食為主嘅日式料理店,價錢相若,似足定食版嘅素菜雖然清淡,全素之下亦能飽足。

原址位處佐敦酒店Food Court嘅MUM日常野菜料理,近月搬到新蒲崗,由鬧市轉移到小區,呢種家庭式素食店似乎更適合於小區開設店舖。小店菜式有別於傳統素食,從餐牌已經可以睇到狀似新派素食,Crossover「一汁三菜」日式料理,結果原味野菜食材頓變日本定食,一份、兩份日常定食精緻得令人忍唔住要相機食先!

室內裝潢陳設簡單,以日本小店為藍本,略有日式風味,既有木枱櫈,亦有高枱櫈,落地玻璃可望街景,其實有幾分似香港嘅打卡咖啡店。每一份日常定食都包括飯、湯、茶,再以$100自選3款餸菜,又或者以$125自選4款餸菜,全部以木盤盛載,木盤上有6至7個碗或杯,視乎3款定4款餸菜,價錢其實幾貴,但總算配合到日本菜嘅精緻美觀條件。

主食基本有16款,有熱葷亦有冷盤,包括素肉、素魚、素菜,以其中6款餸菜為例,本菇茶杯蒸係6款餸菜當中較高水準,蒸蛋滑溜非常,蛋香十足,特別加入醬油、菇菌,令頂端菇菌鹹中帶甜味,配合蒸蛋後較坊間一般茶碗蒸香甜;南瓜薯餅外脆內軟,南瓜蓉軟綿綿,質感細密,啖啖唔油膩,略有香甜。

野菜天婦羅包括炸南瓜、冬菇、秋葵等,粉漿屬正常水平,唔太厚,但又唔算薄,表皮鬆脆,略帶鹽花,味道略鹹;反而蘿蔔冬菇車麩關東煮比較遜色,湯底淡身,對大根最重要嘅係湯底,軟腍無渣但未能吸附湯汁,而冬菇軟腍,另一舊貌似豬腩肉紋理嘅物體其實就係車麩,軟身而有豆香,似麵筋。

至於一小碟嘅甘平牛蒡,有如前菜沙律,牛蒡味道清淡,配搭紅蘿蔔絲,經調味後酸中帶甜,無負擔之餘亦幾醒胃;而信田卷就係一份3件嘅蔬菜卷,以腐皮包裹,內有紅蘿蔔、粟米荀、豆角、菇菌等,豆香中帶爽脆感,腐皮包裹得如同福袋。

每一份都包含五穀雜炊飯正氣黃薑飯、味噌湯、麥茶,當中,唯獨可以令人飽肚嘅係兩款米飯,五穀雜炊飯以五種米飯混合,包含白米、紅米、糙米、黑米、薏米,再加入藜麥、鷹嘴豆等,較清淡,飯粒軟綿;而正氣黃薑飯則較前者香口,飯粒呈鮮黃色,內有薑絲,帶有黃薑味,但比坊間海南雞飯嘅黃薑飯淡身。

麥茶只為正常發揮,而味噌湯內有海帶、豆腐,亦加入紅蘿蔔、白蘿蔔、菇菌、豆皮等,較坊間一般味噌湯清淡,唔會只有鹹味,配料足料豐富,編輯認為呢碗自家製味噌湯比任何一款主食餸菜更出色!




E.A.Tips﹕

❶ 小店位處人氣店窩子旁邊。

❷ 店內全為素食。

❸ 蕨餅加$18,轉烏冬加$18,轉微糖有機豆乳加$12。

❹ 加配昆布甘露煮$10,加配福神潰$10,加配雪梨泡茶$18。

❺ 只需先到櫃檯點餐、付款,然後返回座位,自然有店員將食物送上。

MUM 日常野菜料理

  • 新蒲崗仁愛街34號地下B號舖
  • 12:00 – 21:00
  • 5400 7869

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!


免加2蚊!太子親民居食屋靠近雷生春 日式料理丼飯套餐外賣抵過堂食
流浮山海鮮街酒家林立藏殖民時代皇冠郵筒 海味場旁眺后海灣日落觀60年歷史神秘建築物
【野餐隨行】九龍城人氣泰國菜皮蛋炸蝦餅x潮州粉麵上等牛坑腩 賈炳達道公園野餐大玩Crossover
西貢外賣限定英式炸魚薯條專門店 最高人氣係邊款小食?
經偽鳥居登長洲最高點北眺亭 關公忠義亭附近躲藏超隱秘殖民時代懷舊T形街牌/皇冠郵筒
【野餐隨行】牛頭角消失的後山?鱷魚山81米高隱蔽小公園眺海景 歎近50年老牌上海菜館米芝蓮正宗滬菜
後生仔主理!旺角女人街$50海南雞飯 4款口味有咩揀?
【野餐隨行】元朗人氣壽司丼飯店係驚喜定驚嚇?公園大草地野餐望姆明小屋百鳥塔
旺角點心專門店外賣自取!$56一個人點心拼盤唔使怕選擇現分歧
娛苑起步!142級樓梯登元朗後山豬黃嶺 超矮標高柱眺望雞公嶺淋坑山
樂富唯二!茶餐廳中伏食物多?尋隱藏三和砵仔蒸飯水準不俗
東梅古道起步登昂坪救援徑現代棧道 一隅400米高近距離下瞰香港赤臘角機場宛如觀景台
【野餐隨行】天水圍新北江商場消暑刀削麵 實試公園湖邊草地旁用餐到底有咩問題?
離潮流特區僅3分鐘步程!旺角砵蘭街越南河內料理必食牛柳粉 牛湯濃郁菜式地道
【土瓜灣半日遊】前馬頭圍大廈朝聖193 Cafe!香港花見小路/日系粉紅橋打卡 牛棚藝術公園探索牲口棚遺跡【野餐隨行】
免搭船!穿梭大橋徒步過海往返香港仔鴨脷洲 360度探視珍寶海鮮舫最後景象