小夏威夷徑+少女峰+鴨仔山
兩個人影吓相,  兩個人醫吓肚,  台灣菜,  和你Taste,  手搖茶飲,  新界,  野餐隨行

【野餐隨行】寶林屋邨商場尋日台小食 登小夏威夷徑野餐 清涼路線穿梭港版少女峰鴨仔山

瀏覽次數:139
個人瀏覽過





將軍澳行山路線嚟講,小夏威夷徑你一定有去過,即使兩個人接住走少女峰、鴨仔山,2小時內都可以完成。今次編輯重點並非行山,而係帶大家拍拖野餐,小夏威夷徑離將軍澳寶林嘅商場不遠,買完嘢食再上山野餐,上游望瀑布景,下游則可從高點俯視將軍澳景色,比平常郊外或街邊野餐點更好風景。

位於寶林嘅小夏威夷徑,係一道晨運路線,全程為瀝青路,小徑寬闊易行,由慧安商場穿過寶翠公園,於寶林北路對面沿寶康路前行,直到盡頭迴旋處,就可以一步步登上小夏威夷徑,直上瀑布位置亦毋須30分鐘。

事實上,小夏威夷徑係一道有逾百年歷史嘅古道,本來係小夏威夷游泳場,後來變堤壩遺址,2000年先演變成郊遊徑。由瀝青路接駁石砌路徑,小徑綠樹成蔭,亦可見溪流,景觀自然。小夏威夷瀑布其實好小,中上游瀑布簡而精,絲絲流水有層次地傾瀉而下,水源貌似源源不絕,而中下游位置則可享將軍澳寶林景色,盡頭為懸崖,於一旁就地野餐環境不俗,到處溪流、石澗,不過可能要忍受間中有人排隊於小夏威夷瀑布下游中間大石上打卡所帶嚟嘅喧囂。

慧安商場內有4間小食店可供選擇,包括魚木日台美食、瀧茶、祥記美食、螢火蟲小食,當中編輯挑選以台灣及日式小食為主嘅魚木,水準果然不俗,據悉玉子燒為每日限量小食,的確小店玉子燒$17係蛋香味重,蛋皮嫩滑,而且質感厚實,表面有海苔、木魚等,但要留意一定要盡快食用,否則玉子燒就會出水,只係略嫌唔似煎出嚟嘅玉子燒,比較淡味。

招牌小食既有玉子燒,亦有章魚燒,至於其他小食重有鹽酥雞$17、大阪燒$20等,前者過咗陣淨返微微外脆,而內裏仍然鬆軟,炸粉唔算多,雞肉唔嚡口,調味適中,後者則有木魚點綴,醬汁十足,

除咗小食,亦有飯麵可供選擇,據稱滑蛋鰻魚飯係必食之選,其中亦有招牌滷肉飯$46,一份飯量極充足,而滷肉為豬腩肉,肉量滿滿,的確超有肉感。滷汁香甜,醬汁亦足夠撈飯,大多都算肥瘦均勻,質感軟腍,不過部份腩肉就比較肥膩。

來自對面瀧茶嘅菊韻星空$24,係一杯以菊花、杞子、檸檬、蝶豆花茶等混合而成嘅茶飲,入口酸中帶甜,色調如同星空,反覆搖勻後呈紫紅色,令茶底融和。另外亦有其他手調台式飲品同水果茶,每杯茶飲價錢相近,都算可以接受。

離開小夏威夷徑,無需10分鐘就可以折返分岔路口,直行可返回寶康路,左邊為通往蓮苑臺瀑布,而右邊則可前往魷魚灣村、少女峰。大概15分鐘會見到另一個分岔路口,一端可以上行前往海拔高約432米高嘅鷓鴣山,另一端可以落山通往魷魚灣村,再前行10分鐘亦可到另一個分岔路口,同樣可以返回路面。

只不過繼續前行5分鐘可以前往通往少女峰嘅分岔路口,依循清晰樓梯上行,10分鐘即可到達少女峰山頂位置。瑞士少女峰海拔高度有4158米,而位於將軍澳嘅港版少女峰海拔則只有約195米,能夠俯首清水灣、牛尾海,以及香港科技大學,眺望橋咀島、滘西洲,甚至西貢東面群山,香港少女峰可以輕鬆登頂,風景怡人。

若然繼續前行,可以向清水灣方向落山,但如果原路折返,則可以再向鴨仔山方向走。少女峰、鴨仔山路段基本上已完美接駁,沿途一直佈滿綠樹,相當清涼舒服,而且斜度唔高,走個15分鐘已經可以到達鴨仔山東南方向落山路段。

鴨仔山本身海拔只有約152米高,只因山形狀似鴨仔而得名,不過狀似鴨頭同鴨頸部份已經被平整。鴨仔山內有標高柱,離魷魚灣村不遠,景觀與少女峰相近,山勢雖然唔高,但景觀開揚,除咗橋咀島、滘西洲、牛尾海,亦可望吊鐘洲,只係山徑較少女峰低,但就可以同時望向另一端將軍澳寶林至坑口市景。

由鴨仔山休憩公園步行至鴨仔山公廁,可以前往坑口方向落山,5至10分鐘可以到山腳寶寧路,最後你會發現,坑口方向其中一個鴨仔山入口處係位於天橋底,正對厚德邨,只要穿過厚德邨就可以折返東港城。




E.A.Tips﹕

❶ 可以先買嘢食,直接從彩虹乘搭通往西貢嘅小巴路線1A,於井欄樹落車,然後步向小夏威夷瀑布;亦可乘搭巴士路線93A,93K,93M,98A, 98B,98C,296M,N293 於寶林邨落車,又或者乘搭290,290A,290B, 290X,293S,N290於富麗花園、慧安園落車,買完嘢食再步上小夏威夷徑。

❸ 野餐時,自己垃圾謹記自己帶走!

❹ 野餐要盡量使用可循環再用之餐具器皿。

❺ 小夏威夷徑上現時有枱櫈,可以用餐,會較方便。

❻ 有需要可自備小餐枱、小型露營櫈用餐,可以隨時去到邊食到邊。

❼ 野餐時正對瀑布景或市景用餐會比較Chill。

❽ 最好挑選較少人嘅地方,避免接觸人群。

❾ 野餐地同食肆最好距離不足15分鐘步程,以免食物及熱飲冷卻,有需要就自備保溫袋。

❼ 打卡時要注意安全,量力而為。

❽ 石澗濕滑,要穿上防滑鞋,小心為上。




魚木日台美食

  • 將軍澳毓雅里9號慧安商場地下A14號舖
  • 12:00 – 20:00
  • 5597 2119

螢火蟲小食

  • 將軍澳慧安商場A134舖

祥記美食

  • 將軍澳毓雅里9號慧安商場地下A5號舖
  • 10:00 – 22:30
  • 2191 1933

瀧茶

  • 將軍澳毓雅里9號慧安商場地下A48號舖
  • 星期一12:30 – 19:00、星期二全日休息、星期三至日12:30 – 19:00
  • 5406 0317

慧安商場

  • 魷魚灣毓雅里9號
  • 07:00–23:00
  • 2727 0487

小夏威夷徑

  • 寶林

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!


免加2蚊!太子親民居食屋靠近雷生春 日式料理丼飯套餐外賣抵過堂食
流浮山海鮮街酒家林立藏殖民時代皇冠郵筒 海味場旁眺后海灣日落觀60年歷史神秘建築物
【野餐隨行】九龍城人氣泰國菜皮蛋炸蝦餅x潮州粉麵上等牛坑腩 賈炳達道公園野餐大玩Crossover
西貢外賣限定英式炸魚薯條專門店 最高人氣係邊款小食?
經偽鳥居登長洲最高點北眺亭 關公忠義亭附近躲藏超隱秘殖民時代懷舊T形街牌/皇冠郵筒
【野餐隨行】牛頭角消失的後山?鱷魚山81米高隱蔽小公園眺海景 歎近50年老牌上海菜館米芝蓮正宗滬菜
後生仔主理!旺角女人街$50海南雞飯 4款口味有咩揀?
【野餐隨行】元朗人氣壽司丼飯店係驚喜定驚嚇?公園大草地野餐望姆明小屋百鳥塔
旺角點心專門店外賣自取!$56一個人點心拼盤唔使怕選擇現分歧
娛苑起步!142級樓梯登元朗後山豬黃嶺 超矮標高柱眺望雞公嶺淋坑山
樂富唯二!茶餐廳中伏食物多?尋隱藏三和砵仔蒸飯水準不俗
東梅古道起步登昂坪救援徑現代棧道 一隅400米高近距離下瞰香港赤臘角機場宛如觀景台
【野餐隨行】天水圍新北江商場消暑刀削麵 實試公園湖邊草地旁用餐到底有咩問題?
離潮流特區僅3分鐘步程!旺角砵蘭街越南河內料理必食牛柳粉 牛湯濃郁菜式地道
【土瓜灣半日遊】前馬頭圍大廈朝聖193 Cafe!香港花見小路/日系粉紅橋打卡 牛棚藝術公園探索牲口棚遺跡【野餐隨行】
免搭船!穿梭大橋徒步過海往返香港仔鴨脷洲 360度探視珍寶海鮮舫最後景象