荃灣人氣新式大排檔旗艦店與時並進改良舊餸菜吸斯文客人？

瀏覽次數：136

個人瀏覽過

大牌檔係本土一種重要飲食文化之一，歷史可追塑至19世紀中期，一直以來係街頭露天熟食檔，以平靚正兼鑊氣十足聞名，但現時正宗大排檔逐漸式微，由地踎茶檔一步步演變為紳士淑女都可以前往嘅變種大牌檔，衛生情況明顯唔同，甚至由地舖變樓上舖，當中位於荃灣嘅楚撚記大牌檔旗艦店就係近年極有人氣嘅樓上大牌檔，可以拍拖兩個人去醫吓肚，只係到底係咪重有麻甩味呢？

事實上，舊式大牌檔原本只係以木板、鐵皮包圍，形成半開放式設計，頂端有帆布，枱櫈多為摺枱、摺櫈，而摺櫈則被戲謔為十大武器之首。大排檔於50至60年代為全盛期，只係後來因社會經濟發展而式微。據悉，楚撚記為安安飲食集團旗下食肆，其姊妹店包括安安燒、Woft、火鍋撚、尚上下夏台式火鍋等，大家可以放心坐大呢個飲食集團。

以楚撚記大排檔為例，所有格局明顯唔同，環境乾淨企理，枱櫈亦唔再係摺枱、摺櫈，不過色調仍以綠色為主，加上紙皮石地板、霓虹燈牌，室內增添復古風格，加上接連播放那些年本地歌曲，懷舊味濃厚。與昔日大排檔最唔同之處，係可以於冷氣間用餐，而非裝有大風扇嘅室外露天街頭熟食檔，夏天唔需要再忍受汗流浹背嘅用餐環境，冬天亦唔需要忍用寒風凜冽嘅天氣，但雞蛋裏挑骨頭嚟講，其實咁重係咪香港大排檔呢？

大排檔嘅食物向來重視鑊氣，食品選擇眾多，小炒一般極為出色，大受草根階層歡迎，一邊飲酒吹水，一邊用餐，唔會被人側目，麻甩味十足，太斯文反而會顯得格格不入；而楚撚記大排檔則受到一眾中產人士歡迎，太粗魯反而唔太適合，未有帶嚟無拘束嘅用餐環境，所以地踎食客較少，斯文食客較多，純粹係一個幫助平常唔會去大排檔嘅客人感受吓大排檔嘅出品，當然仍然唔夠正宗大排檔嘅風味。

人氣菜式數之不盡，包含楚撚記脆皮燒BB、黑松露蓮藕墨魚餅、椒鹽鮮魷、楚撚記小炒皇等，而菠蘿拔絲咕嚕肉(梅頭)$99都係招牌菜之一，色澤鮮艷，賣相相當精緻，而味道酸甜，相當開胃。除咗有一粒粒菠蘿，以及梅(脢)頭製嘅咕嚕肉，脢頭肉質爽口，旁邊矗立咗一卷菠蘿拔絲，配合焦糖，偏硬身，焦糖略帶香甜味，如同焦糖脆脆，伴上咕嚕肉幾有新鮮感。

而金沙蛋黃九肚魚$86 有別於一般椒鹽九肚魚，雖然同樣脆炸，外脆內軟，魚肉依舊滑溜，但鹹蛋黃碎依附表層，九肚魚上嘅並非椒鹽，令九肚魚表層帶有鹹蛋黃香味，不過編輯認為九肚魚終究配搭椒鹽會比較合適同可口。

至於香爆黑椒牛仔骨煲$98 則份量適中，牛仔骨都啖啖肉，而且肉質軟嫩，唔會太嚡口，醬汁濃厚，略嫌比較黏稠，煲內更有紅黃椒、洋蔥、辣椒等配料，不過入口唔辣，男女老幼都適宜享用。

上湯濃郁嘅鮮人蔘濃湯時蔬$78 份量唔少，湯汁濃而入味，金銀蛋配搭蔬菜，唔會過鹹，菜湯內有紅棗，鹹中帶有香甜味，健康清淡，更伴有人蔘，令客人感覺菜式更高貴，可以養生，而人蔘屬地踎大排檔比較難有嘅菜式。

食大排檔少不了靚仔白飯$12/碗，但更特別之處係楚撚豬油撈飯$20/碗，以砵盛載，白飯底可自行加添青蔥、芫荽、豉油、豬油，份量隨意，撈勻就係香軟嘅豬油撈飯，豬油滲透白飯內，啖啖充滿油香，非常邪惡，但對於唔少新生代嚟講係幾有特色。

內有幾款自家製飲品，亦有楚撚記桂圓龍眼手工啤，包括竹蔗茅根紅蘿蔔馬蹄水$28/杯，配料可見馬蹄、紅蘿蔔同一支茅根，竹蔗味香甜，至少話俾客人知並非加工製造，係足料飲品。現時每位客人更可免費享蕃薯糖水一客，不過編輯唔記得拍攝，每碗蕃薯糖水都有兩三舊大蕃薯，糖水重薑味，薑湯入口僅微甜，可以鮮膩。