喜喜草原 Hei Hei Savanna
兩個人影吓相,  新界,  神秘之地

錦田全新營地正對雞公嶺近農莊羊群 實試萬呎草場汽車露營新手體驗

瀏覽次數:964
個人瀏覽過





近兩年,本地人被困於香港,不知不覺興起露營熱潮,露營用品店愈開愈多,香港人一窩蜂湧入港九新界露營地點,經常出現營貼營嘅情況,真正喜愛露營嘅人,反而難以享受露營。編輯今次就找尋到一個位處錦田、於11月下旬開業嘅全新私人露營地,至於適唔適合拍拖兩個人去露營,當然係一如以往率先去實測一次啦!

位於元朗錦田逢吉鄉嘅喜喜草原 Hei Hei Savanna,於11月尾試業,位置正對雞公嶺,靠近林村郊野公園,露營時可享山巒景緻,同時可以觀賞日落景觀,前一日欣賞醉人夕陽,翌日旭日東升,雖被稍為遮擋,但亦算優美。

營地有逾萬呎獨立草原,遍地翠綠,空曠得有如郊外露營,只係設施並唔多,現時相當簡陋,內有營帳露營體驗、汽車露營體驗,可以一嘗車中泊,都算係新手露營嘅選擇。營內可以選擇普通紮營區,需要自行動手搭帳;另外,亦可以選擇汽車露營區,可以自己揸車去營地,將一輛車輛停泊於自己營區內。每一個營區都有人數限制,每一格空間唔太大,平日人少嘅話會比較舒服,一旦周末假日露營,隨時會出現營貼營情況。

位置靠近農莊、狗場,不時可見有羊群、狗隻穿梭,雖然望見羊群感覺離開市區,遠離繁囂,如同台灣鄉郊地方,但狗隻似乎無主人看管, 唔少四處遊走,比香港人更自由自在。不過,雖然多隻狗隻會隨時步入營地,甚至營區內,感覺有危險度,而且朝早不時有狗吠聲,似乎影響環境,但狗隻完全沒惡意亦非常善良,只要稍加示意便自動會離開你所屬範圍。據悉,有幾隻狗係場主所有,故不時兩邊來回走動。

場地管理員為人友善,多數都願意協助同接受意見。營地內有洗手間、沖涼房,洗手間數目上只有4格,而每2格沖涼房共用1個熱水爐,但目前只有2格沖涼房,似乎比較少,平日人流唔多,尚算乾淨企理,而洗碗盤、垃圾桶亦算整潔,起碼有替換。

如果以兩個人價錢嚟睇,該營地可算係比較昂貴嘅營地選擇,但若然係多於兩個人,比如四至五個人,價錢就比較抵玩,人均僅百零蚊。

小編講吓嘢﹕

編輯雖然怕狗,但並非完全反對狗隻進入營地,營地內幾隻狗都唔係好似元朗村狗咁兇惡,至少對營友無攻擊性,只係會令人嚇一嚇,但當示意請狗隻離開時,佢哋亦唔會再向前行。而當狗隻嗅到美食香味,會不時走到營區內,貌似尋求食物,所以編輯幾乎可以肯定,今日之前好大可能有營友將食物餵向狗隻,每次有食物香氣傳出,似乎狗隻都會走到營區博一博有無嘢食。事實上,有好多懶有愛心、貌似愛狗嘅人,都會見到狗隻就大嗌「好得意呀」,然後再將自己嘅食物分予狗隻,編輯想提醒大家,狗隻食嘅係狗糧,唔應該將人類嘅食物送入狗隻口中,如果無狗零食喺身,就唔好餵食,勿將自己嘅食物餵俾狗食。只要睇睇「愛狗之人」向狗隻餵食啲咩,就知道當事人係咪真正嘅愛狗之人。




E.A.Tips :

❶ 拉落去Like EATWO Facebook 就自然會知道價錢同位置。

❶ 留意有分自攜營帳/租用營帳露營體驗、汽車露營體驗,汽車露營價錢有機會同營帳露營相差唔遠,可能會更抵。

❷ 可於Holimood預訂營帳露營、汽車露營,由2021/12/07至2022/01/31,星期一至四日子均可享8折優惠。

❸ 注意入營時間為14:00後,而退營時間則為12:00前。

❹ 以兩個人為例,Zone A營帳露營面積約有400呎,Zone B營帳露營面積約800呎,而Zone C汽車露營面積則有約500呎。

❺ 如果人數超出每個Zone嘅人數限制,會額外多收$200/晚,營帳最多可加2人,汽車最多可加6人。

❻ 營帳露營可擺放兩個標準營帳加一個天幕,汽車露營就可擺放一架車加4人營帳加天幕。

❼ 汽車露營可以停泊一輛車輛,而營帳露營如要使用正門停車場,則每輛車收$150/晚,私家車、電單車均為同價,需於預訂時提供車牌號碼。

❽ 場內可租借燒烤爐$300(包括爐、網、鉗、炭)、yoga mat$30/塊、2人印第安營套餐$1065/晚,而2人租營套餐則為$735(包括營、充氣地墊、煮食爐頭、GAS、營燈、砧板、水袋、營釘、鎚、睡袋、Led頭、餐枱組合),但兩者都需要早3日預訂,露營用品都係自備啦。

❾ 場地歡迎小型至中型寵物入場,但每隻會另加$80,謹記主人要好好看管寵物,不過營地未完全有寵物設施,暫時官方都唔建議攜同入場,最好等12月之後。而編輯都係嗰句,如果唔係會同寵物玩樂,最好唔好攜同寵物入場,因為你永遠唔知動物幾時會騷擾到其他人!

❿ 注意營地內可以使用小型氣體爐具,但就唔可以使用炭火或柴火,謹記要使用防火墊。

❿ 營地內有唔少蚊、蠓,記得拎定滅蚊燈,做足防蚊措施。

❿ 營地內有洗手間、沖涼房、雪櫃可以使用,但就得兩格。

❿ 如果要取消,官方唔會退錢,所以要諗清楚先好Book,不過如果係惡劣天氣問題,如一號波會繼續租借,三號波或以上則可取消同更改至3個月內日子。

❿ 預訂之後會有電郵確認,內有取匙電話,到時只需憑電郵到營區辦理登記手續。

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!


長假期後人氣熱點頓變空蕩蕩巨石陣 30分鐘從炮台山日式庭園登北角後山新手路線紅香爐峰
【野餐隨行】鰂魚涌香港人高水準兩餸飯最平$32 闖北角清靜海邊公園野餐近汽車渡輪碼頭
新田加州花園保留罕見赤紅色殖民時代電話亭 英式小庭園探索圓柱形皇冠郵筒/貴族風時鐘
【野餐隨行】黃大仙近30年騎呢《西遊記》公園野餐 本土自家製熱狗店推分店限定優惠
大圍舊式茶樓客香邨現已恢復24小時營業 火鍋店616班底接手保留經典糯米包/魚翅餃
非來自台灣?本土製牛肉麵旺角/長沙灣有得食 外賣自取折後$50有找
近屯門碼頭!屯門蝴蝶灣泰國冬蔭功蝦湯奶白變橙紅 估吓一碗有幾多隻蝦?
鑽石山出發勇闖石礦場!山中秘道探索高聳東南亞樹屋 上中下三條路線直抵城市後山入口
【野餐隨行】登紅燈山觀九龍半島!何文田勝利道姊妹店廚房打通 兄弟邦x鮮丼家一舖兩用賣日式丼飯
太子人氣車仔麵湯底鹵汁混腩汁 16款麵底任揀必試低卡蒟蒻麵
薄扶林榕樹小徑驚現獨特樹洞仙境!一條路線走過殖民建築玫瑰邨+歷史古蹟伯大尼教堂/舊牛奶公司牧場
「食街」搵食遊!西貢巷弄7間夏日必去本土小食店 離碼頭僅2分鐘步程
全港7間兩餸飯專門店良心地圖!港九新界遍地開花間間平靚正低至$32!(最新消息﹕5月鰂魚涌有新店)
近天澤商場!天水圍後山矮過嘉頓山 秘道闖淋坑山賞北方黃昏景【野餐隨行】
【野餐隨行】鴨脷洲海邊歎有料車仔麵 前臨南區純白燈塔眺東博寮海峽3支煙囪 30分鐘輕鬆走完小玉桂山
月前旺角設分店齊齊叫雞!上水鳳鳴居足料無味精雞湯麵濃郁可口 醉雞嫩滑+10款湯底回頭率極高