近兩年，本地人被困於香港，不知不覺興起露營熱潮，露營用品店愈開愈多，香港人一窩蜂湧入港九新界露營地點，經常出現營貼營嘅情況，真正喜愛露營嘅人，反而難以享受露營。編輯今次就找尋到一個位處錦田、於11月下旬開業嘅全新私人露營地，至於適唔適合拍拖兩個人去露營，當然係一如以往率先去實測一次啦！
位於元朗錦田逢吉鄉嘅喜喜草原 Hei Hei Savanna，於11月尾試業，位置正對雞公嶺，靠近林村郊野公園，露營時可享山巒景緻，同時可以觀賞日落景觀，前一日欣賞醉人夕陽，翌日旭日東升，雖被稍為遮擋，但亦算優美。
營地有逾萬呎獨立草原，遍地翠綠，空曠得有如郊外露營，只係設施並唔多，內有營帳露營體驗、汽車露營體驗，可以一嘗車中泊，都算係新手露營嘅選擇。營內可以選擇普通紮營區，需要自行動手搭帳；另外，亦可以選擇汽車露營區，可以自己揸車去營地，將一輛車輛停泊於自己營區內。每一個營區都有人數限制，每一格空間唔太大，平日人少嘅話會比較舒服，一旦周末假日露營，隨時會出現營貼營情況。
位置靠近農莊、狗場，不時可見有羊群、狗隻穿梭，雖然望見羊群感覺離開市區，遠離繁囂，如同台灣鄉郊地方，但狗隻似乎無主人看管， 唔少四處遊走，比香港人更自由自在。不過，多隻狗隻會隨時步入營地，甚至營區內，感覺有危險度，而且朝早不時有狗吠聲，似乎影響環境。據悉，有幾隻狗係場主所有，故不時兩邊來回走動，如果營地可以注意一下，例如於營地加設圍欄就會較好。
據了解，營地係來自鄧姓原居民嘅地方，現時交由管理多個營地嘅Holimood代為處理及經營，而Holimood場地管理員為人友善，多數都願意協助同接受意見。營地內有洗手間、沖涼房，洗手間數目上只有4格，而每2格沖涼房共用1個熱水爐，但目前只有2格沖涼房，似乎比較少，平日人流唔多，尚算乾淨企理，而洗碗盤、垃圾桶亦算整潔，起碼有替換。
如果以兩個人價錢嚟睇，該營地可算係比較昂貴嘅營地選擇，但若然係多於兩個人，比如四至五個人，價錢就比較抵玩，人均僅百零蚊。
小編講吓嘢﹕
編輯雖然怕狗，但並非完全反對狗隻進入營地，營地內幾隻狗都唔係好似元朗村狗咁兇惡，至少對營友無攻擊性，只係會令人嚇一嚇。而當狗隻嗅到美食香味，會不時走到營區內，貌似尋求食物，所以編輯幾乎可以肯定，今日之前必定有營友將食物餵向狗隻，每次有食物香氣傳出，似乎狗隻都會走到營區博一博有無嘢食。事實上，有好多懶有愛心、貌似愛狗嘅人，都會見到狗隻就大嗌「好得意呀」，然後再將自己嘅食物分予狗隻，編輯想提醒大家，狗隻食嘅係狗糧，唔應該將人類嘅食物送入狗隻口中，如果無狗零食喺身，就唔好將自己嘅食物餵俾狗食。只要睇睇「愛狗之人」向狗隻餵食啲咩，就知道當事人係咪真正嘅愛狗之人。
E.A.Tips :
❷ 可於Holimood預訂營帳露營、汽車露營，由2021/12/07至2022/01/31，星期一至四日子均可享8折優惠。
❸ 注意入營時間為14:00後，而退營時間則為12:00前。
❹ 以兩個人為例，Zone A營帳露營面積約有400呎，Zone B營帳露營面積約800呎，而Zone C汽車露營面積則有約500呎。
❺ 如果人數超出每個Zone嘅人數限制，會額外多收$200/晚，營帳最多可加2人，汽車最多可加6人。
❻ 營帳露營可擺放兩個標準營帳加一個天幕，汽車露營就可擺放一架車加4人營帳加天幕。
❼ 汽車露營可以停泊一輛車輛，而營帳露營如要使用正門停車場，則每輛車收$150/晚，私家車、電單車均為同價，需於預訂時提供車牌號碼。
❽ 場內可租借燒烤爐$300(包括爐、網、鉗、炭)、yoga mat$30/塊、2人印第安營套餐$1065/晚，而2人租營套餐則為$735(包括營、充氣地墊、煮食爐頭、GAS、營燈、砧板、水袋、營釘、鎚、睡袋、Led頭、餐枱組合)，但兩者都需要早3日預訂，露營用品都係自備啦。
❾ 場地歡迎小型至中型寵物入場，但每隻會另加$80，謹記主人要好好看管寵物，不過營地未完全有寵物設施，暫時官方都唔建議攜同入場，最好等12月之後。而編輯都係嗰句，如果唔係會同寵物配樂，最好唔好攜同寵物入場，因為你永遠唔知動物幾時會騷擾到其他人！
❿ 注意營地內可以使用小型氣體爐具，但就唔可以使用炭火或柴火，謹記要使用防火墊。
⓫ 營地內有洗手間、沖涼房、雪櫃可以使用，但就得兩格。
⓬ 如果要取消，官方唔會退錢，所以要諗清楚先好Book，不過如果係惡劣天氣問題，如一號波會繼續租借，三號波或以上則可取消同更改至3個月內日子。
⓭ 預訂之後會有電郵確認，內有取匙電話，到時只需憑電郵到營區辦理登記手續。
