藍澄灣出發走南端秘道 小堤壩低攝昂船洲大橋賞藍巴勒海峽 帶你睇青衣楓葉真實情況!

帶你睇青衣楓葉真實情況!藍澄灣出發走南端秘道 小堤壩低攝昂船洲大橋賞藍巴勒海峽

秋季係觀賞楓葉嘅季節,本地有唔少楓葉勝地,各區紅葉片片,當中青衣公園就係其中之一,唔少人狗衝前往賞楓,但實際上係咪值得跨區前往觀賞呢?今次編輯帶大家探索最真實嘅情況,然後再順道帶大家拍拖兩個人找尋青衣南一處賞景秘地,觀望昂船洲大橋,毋須每次只拍攝青馬大橋、汀九橋,影相亦需要小驚喜嘛!

青衣公園每逢秋冬季都以楓葉同被稱為落羽松嘅落羽杉聞名,大型公園內有以歐陸式設計,配搭人工湖嘅湖畔風景,吸引唔少人專程前往打卡,已經唔再係一個小眾紅葉景點。園內湖畔種植數棵落羽松,不過現時仍為青綠色,未轉變為紅色,大概要等待一至兩個月先會有媲美流水響水塘嘅紅噹噹落羽松風景。

於瀑布湖上行,經小路進入小山丘,內有一個小樹林,然後先會見到小平地種有兩至三棵楓香,內有約兩棵高大楓樹同一棵細小楓樹,對比欣澳、烏蛟騰等楓葉地帶,其實稍為遜色。樹頂楓葉有一半仍為綠色,尚未轉紅,而部份則已經從淡黃轉為橙紅,甚至暗紅,地上只有少數紅葉掉落。

然而,大楓樹上楓葉比烏蛟騰高,而細楓樹卻又比欣澳楓葉少,楓香林面積亦比元朗大棠面積細,而且少見陽光滲入,背景全為樓景,難以捕捉最美紅葉風景,一度被有心人冠以「加拿大楓葉湖景」嘅青衣公園紅葉,只不過係有名無實。

如果對青衣公園楓葉景失望,其實都唔緊要,編輯帶大家遊吓青衣南,探索鮮為人知嘅角落,一樣會有驚喜。先從青衣公園步行到海旁,於青衣渡輪碼頭沿海濱長廊前行至藍澄灣方向,腳程約20分鐘,途中可見青荃路、青衣南橋,觀賞來往藍巴勒海峽嘅商務貨船,亦可眺望目的地昂船洲大橋,對岸則為一直拒絕開放嘅葵涌公園。

於藍澄灣對出迴旋處,可以挑選兩條路線前往昂船洲大橋橋底位置,編輯先沿小巴路線步行,經青衣路前往中石化油站,步程為30分鐘,然後轉入青尚路,再進入青尚里,直行到橋底迴旋處再需要15分鐘,至於點樣進入防坡堤海邊,就要自行諗辦法啦,貼士係跟隨釣魚客步行,的確有小閘口可以穿過草叢進入。

雖然釣魚客會橫越防波堤,坐於用作防止大浪衝擊嘅工字珍弱波石上釣魚,不過青尚路防圾堤其實有一定危險度,路段狹窄,步行有一定難度,所以一定要量力而為,最好企喺路上安全地方拍攝。

昂船洲大橋係一座雙塔斜拉橋,大橋離海面約73.5米,橋塔則近300米,都比青馬橋高,而大橋有逾千米長,為全球跨度最長嘅斜拉橋,亦係首個以不銹鋼、混凝土結構嘅大橋,橋身橫跨藍巴勒海峽,屬於8號幹線一部份,連接青衣9號貨櫃碼頭、昂船洲,然後可以直接前往港島方向,同時係九龍前往大嶼山嘅捷徑。

大橋風景優美,防波堤可觀賞大橋全景,橋底亦可觀望日夜景色,係攝影冷門好去處,睇得多青馬大橋、汀九橋,不如試吓睇吓昂船洲大橋?從橋底抬頭仰望,橋面有如劃破長空,可見大橋景色甚壯觀,可以同時眺望維港、藍巴勒海峽、貨櫃碼頭,無論日間定黃昏、黃昏定夜景,畫面全部盡收眼底,相當震撼,值得前往影吓相。

青衣向來人口稠密,你大概醒唔起南端會有一個好地方,青尚路防坡堤可觀望昂船洲大橋,而位置背靠三支香,地方偏僻又荒蕪,非常隱蔽,唔少電影、電視劇都曾於以此為取景地,包括荷里活電影《Pacific Rim》、HKTV劇集《警界線》、港產電影《竊聽風雲》等,實在係有景睇又少人嘅好地方。

小堤壩基本可以有兩邊路口進入,毋須要橫越防波堤,於第一個路口折返原路,即可走到第二個路口,對行人嚟講會比較安全。黃昏時份,背後夕陽嘅昏黃光線為橋身添上色彩,令畫面更為奪目,亦係吸引眼球嘅風景,即使只係於長堤上放空發呆,亦不失為週末一個好活動。

由防波堤折返至青尚路,沿剛才提及嘅另一段路返回藍澄灣,只需依循青衣航運路,一條路線步行約20分鐘,即可以返回藍澄灣對出迴旋處,路段遍佈街燈,而且相對安全,無需要山長水遠就可以拍攝震撼風景,所以編輯建議來回都走青衣航運路,而非小巴路線。

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好,
了解更多E.A.Two 資訊

E.A.Tips :

❶ 巴士路線 409K, 41, 41A, 88 皆可到達青衣公園。

❷ 小巴路線88M可以到達青尚路中石化油站,上車位置為葵芳新都會廣場或青衣,終點站為西草灣船塢,眼見經過藍澄灣,再經過環保署處理化學廢物設施後,只需同司機講於中石化油站落車,依循青尚路步行約15至20分鐘,見迴旋處後向右邊青尚里走,就可以到達昂船洲大橋橋底。

❸ 由青衣城步行至青衣公園,只需穿過一道天橋,另有其他入口亦可進入青衣公園。

❹ 青衣公園同時有落羽松,現時青衣公園落羽松仍為綠色,要等待轉紅色就需要再等待一至兩個月。

❺ 青衣公園內嘅紅葉並非處於正常瀝青路旁邊,而係瀑布湖斜上嘅地方,需要從行人路轉入小樹林。

❻ 青衣楓葉/紅葉其實唔多,只有1至2棵高大楓香同一棵小楓香,而且環境同背景一般,靠近屋邨,較其他地方遜色。

❼ 謹記唔好採摘楓香上嘅紅葉,想影相就執地上已經掉落嘅楓葉啦。

❽ 前往昂船洲大橋既可以乘搭小巴路線,亦可以步行而至,於青衣公眾碼頭前行至盡頭藍澄灣,會經過青衣滅火輪消防局、青衣工業中心、和記電訊大廈,其後於小路前往青衣路、青沙公路迴旋處,可沿小巴路線88M走青衣路,再轉入青尚路,然後前往昂船洲大橋橋底;或者走青衣航運路,直接前往昂船洲大橋橋底。

❾ 如果步行而至,建議於藍澄灣對出迴旋處轉入青衣航運路,只需一直前行到盡頭方向,就可以到達昂船洲大橋橋底。

❿ 青尚路防坡堤有如小堤壩,其實就係青衣昂船洲大橋橋底。

⓫ 要步出青尚路防坡堤就需要自己諗辦法,皆因青尚路盡頭有鐵絲網圍封,但唔少釣魚客都從唔同小閘口走入,穿過草叢就可以步入防坡堤。

⓬ 注意防波堤極近海邊,狹窄而危險,絕對需要量力而為!

⓭ 昂船洲大橋位置並非正對日落,因為日落位置近右邊方向,可以於防坡堤右邊拍攝日落景。

⓮ 特別注意路段會有唔少大型貨櫃車出入,必須小心個人安全,假日會比較適宜步行。

⓯ 沿途極度荒蕪,並無補給點同洗手間,需於藍澄灣前先作補給。

EATWO
Miss A
藍澄灣出發走南端秘道 小堤壩低攝昂船洲大橋賞藍巴勒海峽 帶你睇青衣楓葉真實情況!

青衣公園

青衣青敬路60號
05:30–23:30
2435 0533/2804 2600

藍澄灣出發走南端秘道 小堤壩低攝昂船洲大橋賞藍巴勒海峽 帶你睇青衣楓葉真實情況!

青尚里防波堤

青衣青尚里昂船洲大橋橋底
24hours 電話