【3低本地遊】土瓜灣舊區內有歷史悠久十三街 書店Cafe藝術文化半日遊
土瓜灣係香港一個小型舊區，比較有名嘅地方係土瓜灣十三街，而土瓜灣區內歷史悠久，係高密度住宅區域，最近又因地下鐵路沙中線而受到關注，唔少人都找尋土瓜灣好去處。但事實上，土瓜灣雖然充滿歷史痕跡，但景點並唔多，只寥寥幾個，不過都係拍拖兩個人閒遊之選嚟嘅。
第一站﹕都市空間 Urban Space
要數區內餐廳，必有呢間以書店同Cafe混合嘅小店，食物水準唔算好高，不過就係一個可以感受慢活嘅空間，只要俾錢買本書，就可以坐低慢慢睇書兼用餐，就算唔買書都可以慢慢坐低用餐，係一個以書相聚嘅好地方。
第二站﹕牛棚藝術村
所謂嘅土瓜灣十三街，其實位處馬頭角，只係十三條街道組合而成，屬擁多年歷史嘅舊區，街道上大多係車房、樓齡逾50年嘅舊樓。十三街包括有木廠街、馬頭角道、龍圖街、鳳儀街、鴻運街、蟬聯街、鵬程街、駿發街、燕安街、鹿鳴街、鶴齡街、麟祥街、鷹揚街，全為直街道，而非橫街，如果你能夠細心留意吓，不難發現每一道街道名都有一隻動物，其實都有吉祥之意。
十三街近牛棚藝術村，而牛棚藝術村本來其實係一個牛隻中央屠宰中心，廿年前先改為藝術村，現時係香港二級歷史建築。該建築物以紅磚建成，一地矮牆，有如北海道嘅金森紅磚倉庫，內有一個個長水泥槽，更有鐵鏈、鐵環、水井、牲口棚等，可用作餵牛之用。而牛棚藝術村已經變成一個藝術地帶，不時會有工作坊舉行，而背後亦有一個新開嘅牛棚藝術公園，雖然係一個休憩空間，但同樣充滿歲月痕跡。
第三站﹕海心公園
土瓜灣其實原稱土家灣，甚至土家環，因為早期逐地流行客家話，都係讀音問題，另一方面亦有指土瓜灣本身係一個海灣，叫海心島，島嶼狀似土瓜，即蕃薯，所以就叫土瓜灣，不過現時公認嘅都係叫土瓜灣。而土瓜灣區為臨海地段，靠近九龍城、啟德機場跑道，而海心公園就係來自海心島。
步向海旁，會發現一個小公園，於公園盡頭方向走去，不單可以見到出名嘅魚尾石，亦可發覺下道髹上粉紅色調嘅浪漫粉紅橋，當中更有一個粉紅涼亭延伸出海面，配合海濱風景，值得影吓相。
第四站﹕茶．原點
行到口渴，可以前往土瓜灣盡頭方向找尋一間台式茶飲店，茶飲以健康同創意為主，將台式茶飲同港式飲品混合，亦有其他甜品可擇，可以一試。
Budget（以兩個人計算）﹕
午餐﹕都市空間 ——————————– $209
牛棚藝術村 ————————————- $0
海心公園 —————————————- $0
下午茶﹕茶．原點 —————————— $56
總數 ——————————————— $265
