【3低本地遊】海景環抱！小島上山慢活遊 尋鴨脷洲大街高水準西餐廳
鴨脷洲係香港仔對岸嘅一個小島，風景怡人，最出名係兩者之間嘅香港仔避風塘，街渡船程僅約2分鐘，係出入最方便嘅交通工具。小島嶼被海景環抱，風景令人心曠神怡，係拍拖兩個人閒遊嘅好地方，今次行程簡單直接，只係一個鴨脷洲半日遊嘅選擇。
以人口密度嚟講，其實面積只有1.3平方公里嘅鴨脷洲係全世界第二高嘅島嶼，實在係意想不到。而鴨脷洲最有名嘅應該係鴨脷洲大街，畢竟地方細小，空間唔多，大街為區內主要道路之一，同時係最早期嘅道路，亦係最早有人定居之處。
第一站﹕AP Coffee
鴨脷洲大街內有一間小型咖啡店，比大街上其他食店新式，為典型文青咖啡店，有少量輕食，例如貝果、牛角包、鬆餅、撻、蛋糕、多士、三文治、熱狗，可以充當早餐，即使水準一般，配搭咖啡亦算不俗，
鴨脷洲曾一度翻譯為Aberdeen Island，區內最出名嘅係鴨脷洲邨、利東邨等，亦有唔少中產住宅如南灣、海怡半島、深灣軒、南區．左岸等，至於中文名稱，顧名思義島嶼形狀狹長，似足鴨脷，所以就叫鴨脷洲。
第二站﹕小玉桂山
鴨脷洲玉桂山上曾建有英軍遺留啂鴨巴甸炮台（Aberdeen Battery），不過玉桂山稍花體力，亦係一個聞名嘅山丘。事實上，鴨脷洲除唨玉桂山，亦有一座小玉桂山，係玉桂山嘅副峰，路段簡單，只係環繞區內而走，全程為瀝青路，係區內晨運徑，難度極低。小玉桂山風景卻又不輸玉桂山，小小山頭已可環瞰180度海灣，包含海洋公園、東博寮海峽、鴨脷洲大橋、連島沙洲鴨脷排，更有一個迷你停機坪可以打吓卡。
延伸閱讀﹕小玉桂山連接利東海怡 15分鐘輕鬆登頂環瞰180度海灣
第三站﹕寶膳餐廳
由小玉桂山繞過一圈折返鴨脷洲大街，可以找尋一間水準甚高嘅西餐廳。小店門面唔太突出，但內裏其實係一間有情調嘅西餐廳，有午市及晚市提供，以午市套餐為例，價錢由$66至$98都有，套餐唔過$100，比現時隨處可見嘅西式咖啡店更抵食，價錢同剛才大街上另一間咖啡店差唔多，但飽肚兼極高水平。
E.A.Tips﹕
❷ 玉桂山同小玉桂山為兩個地方，鴨脷排可連接玉桂山，而小玉桂山只係一座小山丘，可以完全環繞一週步行。
