賞楓系列﹕烏蛟騰九担租村(紅葉村落)
兩個人影吓相,  新界,  神秘之地

【秋季紅葉2021】10分鐘步入紅葉村落!巨型楓樹滿佈楓葉 矗立大埔烏蛟騰九担租村

瀏覽次數:476
個人瀏覽過





日前,編輯帶大家到過欣澳楓香林,探索秋季紅葉秘地,位置係一個未被人群佔據嘅樹林空地,若然大家嫌走得太遠,今次就帶大家去靠近市區嘅大埔烏蛟騰睇紅葉,而且係一棵巨型楓樹,高大而宏偉,拍拖兩個人由落車到紅葉村落,步程只需10分鐘!

延伸閱讀﹕【秋季紅葉2021】欣澳秘密海邊樹林賞楓 10棵楓樹毋須爭位 片片紅葉媲美元朗大棠楓香林

紅葉勝地位處九担租村內,而九担租村位於大埔烏蛟騰東南面,雖然有人寫成九擔租村,但Google地圖等資料皆顯示為九担租村。該村落靠近烏蛟騰村,九担租村嘅歷史可追塑至清朝,而上世紀60年代以前,本身係烏蛟騰一條小村莊,村民以務農為生,細心觀察可見草地泥土稍為鬆軟。九担租村早年嘅村民只能靠小艇出入大埔,後來70年代過後已經逐漸人去樓空。近年,九担租村因種植楓香而受到行山客歡迎,唔少人專程前往九担租村並到楓香林打卡。

大埔烏蛟騰內嘅紅葉村落位處九担租村風水林,雖然已經係一個被公眾知曉嘅楓香地帶,但對比元朗大棠總算係未到達人山人海嘅地步。只需沿印洲塘郊遊徑走,路段望落貌似迂迴,其實只有一條路線,全為瀝青路,而且全為平路,完全零難度,不足10分鐘即可到達烏蛟騰內嘅楓香林。

大埔 烏蛟騰 楓葉村落 【點擊路線影片】

只需要由休憩亭入口起步,穿過小橋後步行到分岔路口,依循三椏村或三椏涌方向走,於第二個分岔路口轉向右邊,然後會見到路牌寫有九担租,沿小徑而走會見到草地背後嘅九担租村,繼續於小徑前行一小段路,穿過竹林、小澗,就會見到左邊為佈滿紅葉嘅楓香,步入草地小徑,一塊塊紅葉即映入眼簾。

事實上,九担租村嘅楓香樹已經有好多年歷史,現場可見楓葉高約10米,係村內嘅風水樹,與村落並存,所以該位置又叫九担租村風水林,因為楓香有吉祥意思。現時,村內楓香只有一棵,不過係一棵巨型楓香,旁邊全為綠樹,令楓香上片片紅葉更為突出。

九担租村楓香數目雖然較少,但楓香較巨型,而紅葉亦較紅,都算係值得一遊嘅楓香林。唔少人都會從下而上仰拍楓葉,但其實唔用航拍都可以從俯視角度拍攝楓葉,皆因巨型楓樹背後有一道小山坡,可從上而下觀望楓樹,望吓不一樣嘅楓香景色,整個畫面都佈滿楓葉,串串通紅,整個畫面唔似身處香港。

紅葉需要配合黃昏夕陽光線,於金黃色映照之下,先會更顯通紅,橙紅色楓葉於夕陽光線照耀之下,畫面更顯壯麗!烏蛟騰紅葉雖然比元朗大棠楓香林數目少,位置亦不如欣澳楓香林般人跡罕至,但總算係一個唔算麻煩嘅賞楓勝地。


E.A.Tips :

❶ 乘搭275R巴士路線或20R小巴路線都可以到達大埔烏蛟騰,車程同樣約為30分鐘。不過,巴士路線只會於星期日及公眾假期行駛,而且每班次為10至20分鐘;而小巴路線亦甚疏落,每班次大約30分鐘至1小時,最好預先查看班次時間表,來往大埔墟公共運輸交匯處至烏蛟騰總站。如果乘搭小巴路線20C則可到達大美督,可以選擇步行1.5小時到烏蛟騰或乘搭的士進入烏蛟騰,但以距離計價錢約需$50。

❷ 如果係巴士路線到烏蛟騰總站落車,只需穿過公眾停車場,就可以步入盡頭入口;而小巴路線落車後,則需要經過祠心路,前行到盡頭方向,公眾停車場左邊就係入口。

❸ 由入口步行到分岔路口,只需選擇三椏村或三椏涌方向,因為另一邊係通往新娘潭或涌尾或船灣淡水湖,然後前行亦有九担租路牌,繼續循綠色欄杆前行,不久後即見大草地,轉左切入小徑就會到達九担租紅葉村落嘅楓香林。

❹ 路段靠近民居,謹記保持安靜,唔好打擾居民生活。

❺ 如果步行進入烏蛟騰,要留意新娘潭路嘅行人路較狹窄,小心車輛經過,

❻ 謹記自己垃圾自己帶走,並且受護環境,唔好採摘紅葉,山野小物勿帶回家中。

❼ 部份楓葉可能較近人群,而楓香背後則有小山坡,可以從上觀看,但要小心個人安全。而山坡後面其實係村落祖墳,謹記唔好騷擾先人。

❽ 可以於地上執拾掉落嘅楓葉拍攝,會更有效果呢。

九担租

  • 大埔烏蛟騰九担租村

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!


鄰近車公廟!沙田大圍廢校轉化綠色空間 環保博物館將藝術融入生活
全港3間分店!復古裝潢還原屋邨走廊賣懷舊點心 老馮茶居不如用一款點心單飛?
藜麥紅白米飯配滋補燉湯 大角嘴$48健康港式便當
荃灣清靜秘密花園 大會堂劇院咖啡店歎下午茶
大角嘴街坊刺身壽司專門店 丼飯全日供應最平$40
元朗錦田路邊大排檔毗連公園街市 超高水準街坊醉雞麵/海南雞飯回頭率高
荃灣人氣新式大排檔旗艦店 與時並進改良舊餸菜吸斯文客人?
石崗軍營賞楓!雷公田起步遊200年歷史甲龍古道 直搗川龍家樂徑眺青馬/昂船洲大橋【秋季紅葉2021】
大角嘴高水準台式手工芋圓店月底將結業 滿$100送2件芒果糯米糍
【年糕巡禮2022】新年最黃賀年糕點完整名單!近50間港九新界實體店連網店年糕蘿蔔糕即刻預訂!
野餐隨行【大嶼山及離島篇】有View有草地!全港100個近鬧市近食肆安心野餐點 梗有一個喺左近!
野餐隨行【港島篇】有View有草地!全港100個近鬧市近食肆安心野餐點 梗有一個喺左近!
野餐隨行【新界篇】有View有草地!全港100個近鬧市近食肆安心野餐點 梗有一個喺左近!
野餐隨行【九龍篇】有View有草地!全港100個近鬧市近食肆安心野餐點 梗有一個喺左近!
荔枝角程班長台灣美食宣佈即將結業 台灣味牛肉麵營業至3月!
露營地全禁?赤徑藏荒廢小教堂!西貢東100%瀝青路穿越鹹田灣+西灣沙灘