【區區有💛】日式定西式？牛頭角工業區3間Cafe 入座清靜歎杯Latte

瀏覽次數：536

個人瀏覽過

觀塘咖啡店有如恆河沙數，一街之隔嘅牛頭角則明顯較少，不過數量其實都唔算少，今次編輯先帶大家去其中3間牛頭角區內嘅咖啡店，有2間位處工廈之內，1間則位於商廈內，亦可以拍拖兩個人週末去Chill吓！以人均計算，3間咖啡店價錢相若，同樣$120至$130埋單，價錢上可圈可點。

（1）侘寂咖啡

第一間係離觀塘較接近嘅侘寂咖啡，位處工廈之上，屬樓上舖，其實亦係西九文化區內侘寂珈琲・喫茶嘅分店。有別於西九分店，牛頭角分店嘅對象並非遊客，環境似乎比較清靜，貫徹寂靜主題，店內打造成日式茶室模樣，既有榻榻米房，亦有油紙格仔門、日式矮枱、字畫等，食物、飲品都以日式為主，西式為副。一杯Coffee Latte有香濃咖啡味，柔滑而無乜烘焙後嘅苦澀味，奶香味比咖啡味重，每杯都有拉花圖案。

延伸閱讀﹕牛頭角日式榻榻米咖啡室低調工廈樓上舖感受寂靜美侘寂到底代表乜？

（2）Coffee Slave

第二間係離第一間不遠嘅Coffee Slave，顧名思議係啡奴勝地，店內以年輕人主導，主打精品咖啡，係3間當中唯一係地舖嘅咖啡店。菜式以西式為主，大多選擇都係意粉，不過不失。而咖啡款式比食物多，既有黑白咖啡，亦有唔少特別調製嘅咖啡，當中加錢較少嘅有Fresh Ginger Latte，有拉花圖案，於鮮奶咖啡內加入薑粒、薑汁、蜜糖，咖啡香中帶有輕微辛辣感。如果咖啡係削胃，生薑係暖胃，如此配搭可於心理上打個平手。

延伸閱讀﹕牛頭角啡奴勝地工廈中交流咖啡文化

（3）樂感 Lagom Kaffe

第三間係離上述兩間較遠嘅Lagom Kaffee 樂感，基本上單單牛頭角至觀塘就有兩間分店，而呢間咖啡店亦係油麻地桔梗嘅姊妹店。咖啡店地方偌大，可見室內有一個孤形大窗，外望剛才步行上樓嘅街道，而且樓底夠高，完全零壓逼感，只係3間當中人流較多。同樣，該店菜式都以意粉、All Day Breakfast等為主，更有唔少Fusion菜式，不過份量就係3間當中最少。至於咖啡烘焙上就貌似最有資源，皆因有自家烘焙咖啡豆，咖啡亦有拉花圖案，Latte幼滑，略帶有Nuts香味，夾雜於咖啡香當中，苦澀味較重，亦相對較醒神。