西貢 ⇔ 馬鞍山 400米 昂坪大草原
Cafe 咖啡店,  兩個人影吓相,  和你Taste,  新界

西貢出發!經菠蘿輋上昂坪大草原滑翔傘勝地 馬鞍山400米高地俯西貢海尋秋茫打卡

個人瀏覽過





秋季芒草:菠蘿輋大水井昂坪馬鞍山

西貢與馬鞍山之間穿插好幾條行山路線,當中馬鞍山郊遊徑係拍拖兩個人熱門路線之一,行得冷門路線多亦會想間中行吓熱門路線,大多數人都會選擇由馬鞍山出發,然後以西貢為終點,但編輯則認為該方向人流過多,反而以西貢起步,再以馬鞍山為終點則走得較舒服。

由西貢市中心起步,經油麻莆街走向普通道,穿過村屋,會見到有小路樓梯上躉場路,經過躉場上村、躉場下村再前往菠蘿輋,沿途會經過西貢配水庫。其後會接駁菠蘿輋路,菠蘿輋本來的確曾經係種植鳳梨嘅梯田,而鳳梨又叫菠蘿,而梯田亦等同輋田,所以就叫菠蘿輋,然後只需直行到對面北港凹路就可以前往已被易名昂坪新村嘅闕氏鄉村,以及黃竹山新村、茅坪新村。

一直沿北港凹路直行,中途會經過強記士多、紅花村公廁、北港凹配水庫,亦有一間少有簡約、僅以淡粉紅色為主調加上以黑白色油漆寫上字樣嘅村公所,名為茅坪村公所。其後,勿走昂坪新村方向,只需走黃竹山新村方向,然後會到達大水井,後面會見到有心人寫有紅色大字「麥理浩徑行山路」,即可以走上馬鞍山郊遊徑。

從西貢步行到馬鞍山郊遊徑入口,路段皆為瀝青路,但斜圾唔少,躉場路依山望水,可以回望西貢市中心風景,甚至沙下、大網仔方向,腳底下村屋尤如一顆顆小積木,由西貢市中心走約30分鐘先會去到郊遊徑山路入口。

基本上,馬鞍山郊遊徑係一道熱門路線,中午前大多係年紀較大嘅行山人士晨運,加上少量一家大細行山客,而中午過後則會愈來愈多年輕一輩上山,路段人流幾乎無休止。不過,該路段由馬鞍山前往西貢方向會較多人,反而西頁走向馬鞍山則較少人,亦有唔少人只係來回馬鞍山至昂平高地嘅路段,所以西貢方向出發人流會比較少。

馬鞍山郊遊徑只為一道正常過正常嘅山徑,編輯亦唔想詳談,由入口前往昂平觀景台,拾級而上,腳程約需30至45分鐘,沿路遍佈樹蔭,山路尚算寬闊,同時亦可不時回望西貢風景,亦係一道輕鬆嘅郊遊路線。

昂平高地位處馬鞍山郊野公園內,為屬沙田區草原之一,背靠大金鐘,緩緩攀登至高地後,會發現昂平擁有大片碧綠草原,亦可能會遇上牛群食草,即使見唔到牛隻亦會見到遍地牛糞。內有昂平觀景台,而昂平營地亦只係相距5分鐘步程,整個空間綠草如茵,適合放電、曬太陽,而觀景台最為人熟悉係一端有大懸崖峭壁,適合充當起跳台大玩滑翔傘,唔少滑翔傘愛好者亦趁秋風起前往玩滑翔傘,甚熱鬧。

而昂平大草原地勢甚高,頂端海拔高約400米,草地位置其實非常平坦,面積約有70米乘30米,擁有遼闊景觀,既可望西貢海域、大網仔,亦可眺望橋咀島、枕頭洲、白沙洲、鹽田仔、滘西洲,甚至萬宜水庫西壩、蚺蛇尖、清水灣半島、牛尾海、果洲群島,景色開揚。

而昂平高地上更可找尋山上獨有嘅芒草風景,雖然現時芒草數量唔多,但仍然係可以打吓卡,一樣可以拍攝置身芒草內嘅風景相,要影芒草唔一定只去大東山,其實只要係上山路段,好多山丘都可見睇到芒草,因為芒草本身就生長於山上,若配合黃昏日落會更壯麗。

馬鞍山郊遊徑可接駁麥理浩徑第4段,沿大草原背後郊遊徑落山,其餘路段可接駁大金鐘、馬鞍山山頭、石芽山、鹿巢山,不過目測馬鞍頭路段頗為陡峭,唔少行山人士都需要行山仗,甚至踎低落山。而落山路段可以折返行車路段,步程同樣約30分鐘,路段起伏唔大,亦算輕鬆,故此該路段人流會較多。

到達行車路段後,前面左邊會見到有小樓梯,為通往鞍山探索館之捷徑,穿過村巴站、寓意「平安回家」嘅平安橋後,即達鞍山探索館,門口寫有「恩光堂」。而鞍山探索人館則由基督教信義會斥資開辦同管理,以保留工業遺產、礦村遺產、宗教遺產為重點,一端以工作坊及活動推廣人文價值、自然價值,提到礦工生活、礦場價值,礦村歷史,高峯期原來曾有3000人當礦工,而場內更有一個模擬礦洞,旁邊擺放有礦石。事實上,模擬礦洞位置離真實礦洞不遠,但編輯以該路線未能搵到真實礦洞,如果有讀者搵到可以留言話我哋知呀!

鞍山探索館其實係信義會禮拜堂活化而成,旁邊為已經荒廢嘅信義學校,內裏工作坊旁邊為一間礦工Cafe,由於位置為昔日礦場,故咖啡店同樣以礦場為主題,內有精品咖啡、礦石曲奇、礦村豆腐花等,雖然編輯當日未有充足時間品嚐,但可以同大家講礦工Cafe為同路人。

更特別之處係中途部份村巴站位有三分似日本巴士站,亦可停低兩秒拍攝一個偽日本巴士站。依循馬鞍山村路走下山,會經過漁農自然謢理署馬鞍山郊野公園馬鞍山管理站、馬鞍山郊野公園燒烤場地,旁邊為馬鞍山家樂徑,附近有一道叫良友路嘅小路,然後繼續走馬鞍山村路落山,全段皆為暗斜路段,直行到底會見到馬鞍山食水配水庫,沿路落山會到達馬鞍山恆安邨,再步行10分鐘可折返新港城中心。

小編講吓嘢﹕

當日於昂平觀景台聽到一段非常有趣嘅對話……
女士A﹕嗰邊大東山嚟喎!
女士B﹕大東山喺香港㗎!
編輯好想搭嗲,大東山其實喺大嶼山。


E.A.Tips :

❶ 巴士路線92,96R,292P,792M、小巴路線1A,1S 皆可前往西貢市中心,如果直接上山,可以出翠塘花園落車,而若由西貢市中心步行折返到翠塘花園,亦只係幾分鐘步程,菠蘿輋亦有3號小巴路線。

❷ 由馬鞍山方向離開,鞍山探索館樓下有村巴路線NR84,乘搭村巴路線可以往返馬鞍山新港城、馬鞍山郊野公園,車程約為10王15分鐘,車費為$7,但班次相隔約半小時至1小時,甚至2小時,比較稀落,最好先睇睇班次時間表﹕https://www.td.gov.hk/filemanager/sc/content_4796/nr84.pdf 。

❸ 建議唔好同村民爭搭村巴,循馬鞍山村路離開,步行折返馬鞍山恆安邨約為45分鐘至1小時,反而落山全為澀青馬路,行得山亦唔怕行埋落山腳啦!

❹ 昂平高地為著名懸崖之地,係大玩滑翔傘嘅好地方,但裝備不足嘅人謹記唔好靠迎懸崖邊,免生危險。

❺ 昂平營地有偌大草地,適合露營,大多數露營或野餐人士都會由馬鞍山出發上山露營、野餐。

❻ 馬鞍山市中心至馬鞍山郊野公園車費約$40至$60,但車輛會排出廢氣,影響其他行山人士,如果搭車上山,不如就唔好行山!

❼ 從馬鞍山車路到昂平高原、由西貢大水井車路直上昂平高原,其實時間相若,皆約20至30分鐘,即能到達昂平觀景台。

❽ 如果由馬鞍山行到西貢,要面對嘅可能係搭車問題,皆因黃昏後西貢搭車通常要等候較耐,而且出入只有一條路,不時會塞車;而如果由西貢行入馬鞍山,需經過菠蘿輋、大水井,路段頗為陡峭,但馬鞍山離開時,經過MOSTown,可返回新港城,交通則較方便,可以選擇更多巴士路線。

❾ 沿途無補給點,最好於西貢市中心或馬鞍山先作補給。

❿ 謹記要帶備充足糧水上山。

❿ 嫌長氣都要講,上山後記得自己垃圾自己帶走。

❿ 兩邊上山路段皆滿佈樹蔭,僅昂平草原位置少有遮蔭,最好都係做足防曬措施。

❿ 昂平高原地帶易生危險,絕對要小心人身安全。

❿ 昂平高地草原上遍佈牛屎,要小心踩中地雷,不過唔少牛屎已經被踩扁,即使你踩中牛屎,you are not the only one。

❿ 昂平糙地為漁護署指定露營地點,有基本設施。

❿ 滑翔傘需要逆風先可以起飛,最好吹東風或偏東風先玩,同時要做足安全措施。

❿ 注意前往鞍山探索館路段有狗隻,不過只為家犬,並非野狗,只要唔挑釁,基本上可安全渡過。

昂平營地

  • 馬鞍山昂平營地
  • 24hours
  • 2134 7658

基督教香港信義會鞍山探索館 / 恩青營-鞍山探索館

  • 新界馬鞍山村上村35號/li>
  • 星期一至四休息,星期五六日 10:00–17:00
  • 3421 1436

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!