鳳鳴居
兩個人醫吓肚,  和你Taste,  港式

月前旺角設分店齊齊叫雞!上水鳳鳴居足料無味精雞湯麵濃郁可口 醉雞嫩滑+10款湯底回頭率極高

瀏覽次數: 71
個人瀏覽過





香港人對於米線、麵類都相當熱衷,碗碗不單快靚正,而且價錢低廉,故米線檔、麵檔都開完一間又一間,的而且確,能夠拍拖兩個人日日食嘅唔係西餐廳,亦唔係咖啡店,反而係呢種街坊麵檔。上水有一間小店已經開業3年,一直堅持做「雞」……係「雞湯麵」先啱,至今仍然保持水準,甚為難得。而幾個月前,呢間雞湯麵店於旺角開設分店,靠近鬧市,而當中一款雞湯麵的確係同上水店如出一轍,編輯決定慳返啖口水,毋須重複評價。

小店位處上水一角,初時由果籽介紹過,據悉由90後年輕人開設,店員都為年輕人,以醉雞米線、醉雞湯麵為主打,開業3年來於區內大有口碑,試過一次就會知道,呢碗雞湯麵的確係回頭率極高之作!

打開餐牌,不難發現店內整個List上有9成半都係以雞為主,通通為「雞湯麵」,只有一款蘿蔔清湯腩麵鶴立雞群,10款雞湯麵包括有醉香雞湯麵、姬松茸雞湯麵、蟲草花雞湯麵、芫荽雞湯麵、喇(叻)沙雞湯麵、麻辣雞湯麵、花膠雞湯麵、蕃茄濃湯雞麵、花膠醉香雞湯麵、清雞湯麵,就算你只叫一碗淨麵,亦只限清雞湯!

當中,大多數客人都會點選醉香雞湯麵醉香雞米線,於店內觀察幾秒,已經能知道該款雞湯麵有幾受歡迎。據官方引述,醉香雞屬於生滾雞,需要時間焗製方能出餐,即叫即煮,可能需要一定等候時間,不過以現場嚟睇,店舖速度如同澳牛(佐敦澳洲牛奶公司簡稱),呢頭點完餐,轉頭就上枱,故餐廳流轉度尚算快速,分別在於未有舊時澳牛最「出名」嘅服務態度。

醉香雞湯麵$50 絕對係一碗足料雞湯麵,兩間分店湯底一式一樣,保持水準,湯底濃郁可口而無味精,單單呢點已經明白點解會受到街坊歡迎。湯底既有雞殼熬煮嘅清甜,亦有藥膳感覺,甚香甜,而且滋補養生,可以見到嘅配料係紅棗、雲耳,未能見到已食得出嘅藥材味道係川芎、白芷等,濃郁可口。

雞件份量亦十足,每份約有5大舊,而且係有肉地,雞肉有鮮味,同時帶有微微花雕酒香味,質感嫩滑唔嚡口,難得在於醉雞件嘅酒香味只留於雞肉,而唔會落於藥膳雞湯內。湯底配搭麵底後,非常惹味,湯汁甚至能夠飲落肚,最後卻又無口渴感覺。

至於芫荽雞湯麵$55 就係一碗「爆荽」嘅雞湯麵,海量芫荽蓋過雞肉,係芫荽迷必點之選!雖然並非主打醉雞湯麵,但雞肉同樣大大件,味道一樣,只係湯底唔同,湯底相對前者較清淡,只係啖啖清雞湯味加上芫荽味,由於芫荽份量充足,芫荽香味亦均勻滲透湯底內。

而另一款麻辣雞湯麵$50 湯底變得紅噹噹,望落有層紅油,亦有紅紅辣椒,相對重口味,但又唔算油膩,辛辣味未算好重,不過都有小至中辣程度,整體辣度唔太高,並非死辣,較其他湯底惹味,亦幾開胃。而雞肉配搭辣湯底,比起一般招牌貨稍有分別,指嘅唔係雞肉嫩滑程度,而係似食略帶辣味嘅口水雞。

而每一碗雞湯麵都會配一小碟辣椒豉油,將雞件蘸上微辣甜豉油,更可帶出雞肉鮮味,令整體層次提升。至於飲品則加約$10,凍檸茶不過不失,凍菠蘿青檸蜜等係幾特別嘅款式,入口清爽,可中和剛才嘅濃味雞湯。




E.A.Tips﹕

❶ 巴士路線 276, 277E, 70K 皆可到達上水。

❷ 留意每日最後落單時間為22:30。

❸ 除咗雞湯麵,另有自選配搭$22起,每款配料加$6至$10,亦有飯類,如口水雞飯、沙薑雞飯,醉香雞亦可配飯。

❹ 另有外賣雞煲$230、花雕醉雞$230/隻,但需早至少一日預訂。

❺ 只需於門口撳飛攞位等候就得,注意店舖一度為區內排隊店,最好避過高峰食飯時間,等候時間可以減省少少,又或者叫外賣。

❻ 麵底可選米線、油麵、米粉、公仔麵、河粉,甚至讚歧烏冬、紅薯粉,不過比較吸附湯汁嘅係油麵、紅薯粉。

❼ 每一份醉香雞都已經分配好份量,以容人角度係唔能夠自選部位,全部Random,不過每份都有雞髀、雞胸、雞背、雞鎚或雞翼等有肉地而肉質嫩滑嘅部位。

❽ 店內無收加一服務費,但服務比收加一服務費嘅更好。


鳳鳴居

  • 上水馬會道154號地下
  • 12:00 – 22:30
  • 2726 0008

鳳鳴居

  • 旺角西洋菜南街138號地下2號舖
  • 12:00 – 22:00
  • 3188 5880

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!


長假期後人氣熱點頓變空蕩蕩巨石陣 30分鐘從炮台山日式庭園登北角後山新手路線紅香爐峰
【野餐隨行】鰂魚涌香港人高水準兩餸飯最平$32 闖北角清靜海邊公園野餐近汽車渡輪碼頭
新田加州花園保留罕見赤紅色殖民時代電話亭 英式小庭園探索圓柱形皇冠郵筒/貴族風時鐘
【野餐隨行】黃大仙近30年騎呢《西遊記》公園野餐 本土自家製熱狗店推分店限定優惠
大圍舊式茶樓客香邨現已恢復24小時營業 火鍋店616班底接手保留經典糯米包/魚翅餃
非來自台灣?本土製牛肉麵旺角/長沙灣有得食 外賣自取折後$50有找
近屯門碼頭!屯門蝴蝶灣泰國冬蔭功蝦湯奶白變橙紅 估吓一碗有幾多隻蝦?
鑽石山出發勇闖石礦場!山中秘道探索高聳東南亞樹屋 上中下三條路線直抵城市後山入口
【野餐隨行】登紅燈山觀九龍半島!何文田勝利道姊妹店廚房打通 兄弟邦x鮮丼家一舖兩用賣日式丼飯
太子人氣車仔麵湯底鹵汁混腩汁 16款麵底任揀必試低卡蒟蒻麵
薄扶林榕樹小徑驚現獨特樹洞仙境!一條路線走過殖民建築玫瑰邨+歷史古蹟伯大尼教堂/舊牛奶公司牧場
「食街」搵食遊!西貢巷弄7間夏日必去本土小食店 離碼頭僅2分鐘步程
全港7間兩餸飯專門店良心地圖!港九新界遍地開花間間平靚正低至$32!(最新消息﹕5月鰂魚涌有新店)
近天澤商場!天水圍後山矮過嘉頓山 秘道闖淋坑山賞北方黃昏景【野餐隨行】
【野餐隨行】鴨脷洲海邊歎有料車仔麵 前臨南區純白燈塔眺東博寮海峽3支煙囪 30分鐘輕鬆走完小玉桂山
油麻地香噴噴鐵板魷魚鬚惹人垂涎 廟街招牌流心芝士玉子燒香甜不膩