秘 secret chef
兩個人醫吓肚,  和你Taste,  日本菜

全港4間分店!石燒牛自己動手燒 元朗秘店真係有神秘感?

個人瀏覽過





香港曾經有一段時間大興石燒牛扒,而且係每人一份,大多數人均$100就可以享用一份石燒牛扒,拍拖兩個人食餐飯都屬預算之內,結果主打石燒牛嘅食店愈開愈多,適合一眾食肉獸,但要揀當然揀返自己人啦!

大門口明顯以大面木牆為主調,大大隻字寫住「」好奇心驅使下,自然會諗到底有幾神秘?事實上,門口已經放有餐牌同招牌菜式,一啲神秘感都無,再拉開木門,室內又唔算好神秘,地方闊落,冷氣甚大,幾乎每枱都有至少一份石燒牛扒,大概係熱石板燒令室內溫度增加。

店舖招牌之作係板燒吉列牛$118,午市套餐加$20 配秘之飯素、楓糖流心蛋,餐牌寫明選用美國安格斯牛肉,表皮為日本麵包糠,的確入口略帶鬆脆感。而熱石上有一小塊牛脂肪,可當作熱油,表皮既烘烤得更香脆,鎖緊肉汁,牛脂肪放上熱石上輕輕烘烤,時間僅需約10零秒,牛肉七成熟就夠,基本上係零失敗。

而吉列牛份量唔少,上枱呈鮮紅色,烤到七成熟左右自然變色,味道上至少有牛味,有油香,至於生熟度、軟腍度皆自行控制,肉質基本唔會嚡口,少有牛筋。牛肉原汁原味最惹味,不過牛肉醬汁則配合得恰到好處,鹹度適中。

芝士吉列豚肉$88為較經濟嘅選擇,同樣加$20有套餐,流心蛋略帶甜味,有滷過,蛋黃的確係半凝固狀態,而珍珠米軟硬適中,但飯素偏鹹,適合撈飯,內有紫菜絲、芝麻等,加啲木魚絲就變貓飯。

吉列豚肉份量充足,為厚切炸豬扒,女仔有可能食唔晒,而餐牌寫明選用保濕豬扒,全天然多水份、無豬臊味,豬隻食粟米、大豆,無抗生素或激素,可以食得健康,而且採用雞蛋、粗麵包糠,令脆炸後嘅吉列豚肉更香脆,同時仍略帶豬肉香。每份吉列豚肉都會加添特濃芝士醬汁,香濃惹味,不過切忌蘸太多,因為確真幾膩。


E.A.Tips﹕

❶ 店舖有4間分店,分別位處元朗教育路105號鴻運樓地下3號舖、荃灣享成街22號地舖、佐敦偉晴街11號地下、銅鑼灣謝斐道522號地舖。

❷ 巴士路線 234X, 235, 30X, 930, 96, 96B 皆可到達元朗朗屏。

❸ 套餐加$20可配秘之飯素、楓糖流心蛋,晚市加$38再多碗大根湯,晚市加$58就多碗櫻花金魚湯。

❹ 牛肉其實輕輕煎幾秒就可以食得,甚至唔需要加火,以溫暖熱石提供熱力,亦可以將牛肉烤熟,反而俾大火更好,唔會過龍。

❺ 吉列豚肉會配芝士醬汁,但可能會有膩感,配搭石燒牛汁效果反而不俗。

❻ 門口雖然寫有$58鰻魚飯,但應該係舊物,餐牌內並無$58鰻魚飯。








  • 元朗教育路105號鴻運樓地下3號舖
  • 12:00 – 22:00

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!