Error 19
Cafe 咖啡店,  兩個人醫吓肚,  和你Taste

Running燒姊妹店!彌敦道粉紅少女系Cafe 最Error嘅甜品係咩?

瀏覽次數: 78
個人瀏覽過





粉紅色咖啡店向來容易吸引少女慕名而至,愈Pink愈多人,恍惚裝潢以粉紅色為主調就已經足夠,旺角近月又有一間以粉紅色設計嘅典型少女系咖啡店,由大門口穿過玻璃牆身,均透視一幕幕粉紅畫面,總比砵蘭街公園採用嘅全桃紅色設計優勝。

呢間以Error 19命名嘅咖啡店,據悉係Running 燒、吞Pot雞煲嘅姊妹店,對比該2間以韓燒、雞煲為主嘅餐廳,今次就主打西餐、甜品。叫得Error 19就係19樓,甫出Lift門,粉紅色牆身、花花牆身、月亮造型韆鞦已經映入眼簾。

至於店內,亦有搶眼霓虹燈牌,包含Error19字樣、雲朵裝飾,每張雲石枱嘅座椅上亦有粉紅色蝴蝶結絲絨咕𠱸,背後有偌大窗戶透視旺角街景,加上超Pink牆身,適合少女聚會或打卡。而店內一直播放人氣男團Mirror及Error嘅歌曲,車輪轉地無間斷播放,抓緊潮流,估計店主都係Fans,都算係鏡粉、404粉可以打躉嘅餐廳。

呢種咖啡店嘅飲品大多以打卡為主,只要色調豐富就可以吸引客人,當中彩虹梳打$50 就係其一例子,一如預料味道一般,顏色有3層,頂層較淡,有士多啤梨之類味道,底層帶有酸味,如同橙味,而且最底係利賓納口味,然後再配搭梳打水,攪勻後由紅變紫紅色。至於冬瓜益力多梳打$50 就比較有新鮮感,冬瓜茶向來甜度高,而益力多更加有3粒方糖,將冬瓜茶配益力多,絕對係甜上加甜,記得一定要攪勻先好飲。而Matcha Latte $50 則比較簡單,有拉花裝飾,亦有抹茶香味,甜度唔高,似乎愈簡單嘅愈好。

套餐基本有6款,當中有南瓜藍芝士意大利飯$178、意式海鮮什燴$298,餐湯為南瓜湯,正正常常,份量唔多,尚算Creamy,蒜蓉包則略嫌烘烤過硬。意大利飯加上南瓜蓉、芝士,感覺邪惡,對比正宗意大利飯嘅硬度,飯粒比較軟腍,為港人口味;至於海鮮什燴嘅海鮮唔算太多,有1至2塊魚肉、4至5隻蝦肉、蜆肉、八爪魚腳,醬汁方面正正常常,不過似中式醬汁,尚欠一碗白飯。

其他小食有簡單加上Parma Ham同沙律菜嘅Error 19沙律尼哥斯沙律Nicholas Salad $88,後者以吞拿魚配搭沙律菜,吞拿魚只有4.5舊,煙燻過嘅吞拿魚入口爽滑,配上沙律菜都算清新開胃。另有香蒜白酒煮蜆$98、黑松露炒雜菌$48,前者蜆湯極鹹,唔建議飲用,蜆肉爽口,份量都算適中,畢竟近$100;後者以角切蘑菇為主,蘑菇份量唔算太少,有菇味,但黑松露味唔重,而且油份較多。

梳乎厘有好多款,原味最穩陣,其他口味如宇治抺茶十勝紅豆梳乎厘$95 原來只係原味梳乎厘上加上抹茶醬、紅豆,而非內餡有抹茶、紅豆,一份梳乎厘雖然有2件,但切開食都感覺份量唔多。既然以Error為主題,當然有最Error嘅甜品,講到明有404(404係人氣男團Error Fans嘅暱稱)嘅404肥仔重朱古力窩夫$78。甜品將窩夫疊高成3層,再加上超多朱古力醬、朱古力忌廉,果然夠晒肥,絕對係朱古力迷自肥嘅甜品。不過,窩夫甜品只有輕微脆感,即使有大量朱古力忌廉,入口又唔算太重朱古力味,水果有士多啤梨、香蕉點綴,並非軟爛同過酸。




E.A.Tips﹕

❶ 入口位置於旺角新行人天橋對落。

❷ 注意726號大廈有多間餐廳,食飯時間可能會有好多人,亦可能需要排隊。

❸ 食物價錢比較貴,拍拖兩個人可能要超過$300埋單,如果多約幾個朋友去Share幾樣嘢食會比較化算。

❹ 門口設有月亮形韆鞦影相位,於Lift口,並非於用餐位置。

❺ 最好先打電話Book位。

❻ 留意最後落單時間為16:15或21:15。

❼ 設有加一服務費,收Cash或Credit Card。

❽ 基本晚市套餐會配上餐湯、沙律、蒜蓉包。

❾ 生日可以加字加蠟燭,不過分別要加$20同$5。

❿ 飲品、甜品均並唔包括喺套餐內,需要俾原價。

❿ 留意部份甜品製作需時20至30分鐘。

Error 19

  • 旺角彌敦道726號19樓
  • 12:00 – 17:00、18:00 – 22:00
  • 5529 3679

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!


免加2蚊!太子親民居食屋靠近雷生春 日式料理丼飯套餐外賣抵過堂食
流浮山海鮮街酒家林立藏殖民時代皇冠郵筒 海味場旁眺后海灣日落觀60年歷史神秘建築物
【野餐隨行】九龍城人氣泰國菜皮蛋炸蝦餅x潮州粉麵上等牛坑腩 賈炳達道公園野餐大玩Crossover
西貢外賣限定英式炸魚薯條專門店 最高人氣係邊款小食?
經偽鳥居登長洲最高點北眺亭 關公忠義亭附近躲藏超隱秘殖民時代懷舊T形街牌/皇冠郵筒
【野餐隨行】牛頭角消失的後山?鱷魚山81米高隱蔽小公園眺海景 歎近50年老牌上海菜館米芝蓮正宗滬菜
後生仔主理!旺角女人街$50海南雞飯 4款口味有咩揀?
【野餐隨行】元朗人氣壽司丼飯店係驚喜定驚嚇?公園大草地野餐望姆明小屋百鳥塔
旺角點心專門店外賣自取!$56一個人點心拼盤唔使怕選擇現分歧
娛苑起步!142級樓梯登元朗後山豬黃嶺 超矮標高柱眺望雞公嶺淋坑山
樂富唯二!茶餐廳中伏食物多?尋隱藏三和砵仔蒸飯水準不俗
東梅古道起步登昂坪救援徑現代棧道 一隅400米高近距離下瞰香港赤臘角機場宛如觀景台
【野餐隨行】天水圍新北江商場消暑刀削麵 實試公園湖邊草地旁用餐到底有咩問題?
離潮流特區僅3分鐘步程!旺角砵蘭街越南河內料理必食牛柳粉 牛湯濃郁菜式地道
【土瓜灣半日遊】前馬頭圍大廈朝聖193 Cafe!香港花見小路/日系粉紅橋打卡 牛棚藝術公園探索牲口棚遺跡【野餐隨行】
免搭船!穿梭大橋徒步過海往返香港仔鴨脷洲 360度探視珍寶海鮮舫最後景象