景觀媲美汀九橋！深井歐陸風白樓打卡兼眺三橋景 270度環瞰青馬大橋全景

兩個人周末去邊好？有時候拍拖行程會令唔少男士煩惱，女生們大多鍾意影相打卡，男士可能唔想諗咁多，又或者唔想去太多人去過嘅地方，想遠離城市繁囂，以下呢個地方就可以滿足晒幾個願望。

深井海邊有一座以歐陸風格設計嘅白樓，座落深井至荃灣、雙仙灣至海美灣之間，以米白色為主調，並以單幢式設計，尤如白色城堡，適合少女打卡。位置近汀九橋公路、海美灣，前臨青馬大橋，海面左右兩端為青衣、馬灣海峽，可直視270度青馬大橋全景，而且人流稀少，清涼舒服，鮮見遊人步行而至。可以連續環瞰青馬大橋、汀九橋，回望海美灣、麗都灣，眼力好更可以遠眺汲水門大橋，海上風光一覽無遺。

呢座白樓其實係機場核心計劃展覽中心，1996年起開放予公眾，白樓鄰近汀九橋，為香港國際機場嘅《香港機場核心計劃》展覽館，白樓其實原本隸屬新機場工程統籌署，後來於1998年解散，轉為隸屬民政事務總署荃灣民政事務處。事實上，現時嘅白樓原址為霍米園（Homi Villa），由一位印度商人律敦治先生於30年代建成，當時將白樓當作別墅，附近為香港啤酒廠釀酒廠，惟後來被政府購入成公務員宿舍別墅，最終於1995年變成展覽中心，2010年被列為三級歷史建築。

白樓內有幾個展覽區文字展板，亦有相關模型，分成5個展區，都係介紹幾項核心工程，而新機場興建時大概就係香港展開玫瑰園計劃時，工程包含赤鱲角香港新機場、機場鐵路、青嶼幹線、西區海底隧道、西九龍快速公路、北大嶼山快速公路、三號幹線、東涌發展計劃、西九龍填海計劃、中環及灣仔填海工程。而由館內可步行而上天台花園觀景台，觀景台位置比樓下高一層，未有被少量樹海遮蔽風景，可以完全觀賞青馬大橋全景，甚至眺望汀九橋、汲水門大橋。

由深井步行到白樓或從白樓步行到麗都灣泳灘，腳程分別約15分鐘，麗都灣泳灘方邊有汀九休憩處，位置都可以拍攝汀九橋底部，亦可望三橋風景，無論日落景定夜景，都相當受攝影發燒友歡迎。汀九橋係世界首條三塔式斜拉索橋，由德國工程師設計，連接汀九至青衣，橫跨藍巴勒海峽。從汀九橋底部，可以回望白樓風景，原來白樓有如一座「天空之城」。

提及汀九海灣，不難發現一連有6個沙灘，包括水灣、汀九灣、更新灣、海美灣、麗都灣、雙仙灣，當中麗都灣、更新灣非常接近，而雙仙灣並非正式泳灘，其餘都為康文署正式泳灘，內含基本設施同救生員服務。

E.A.Tips :

❶ 巴士路線53, 96 , 96M, A38, 243b、小巴路線96, 96M, 96C, 302 都可以到達汀九。

❷ 由深井嘉頓廠房步行到白樓，步程約12分鐘。

❷ 機場核心計劃展覽中心入場費全免，如果唔上觀景台，就毋須經過室內，門口外面亦有影相位。

❸ 機場核心計劃展覽中心位處麗都灣至相思灣之間，離汀九橋約10分鐘步程。

❹ 可以於官網查看更多中心資料﹕https://www.info.gov.hk/archive/napco/c_exhibition.html。

❺ 中心外有約10個停車位。

❻ 麗都灣泳灘為正式泳灘，有基本設施，救生員一般當值時間為09:00至18:00，但冬季就無救生服務。

❼ 編輯當日進入時毋須安心出行app，但機場核心計劃展覽中心現時出入就切須使用安心出行，要入去就記得拎定部機啦。

❽ 前往天台花園觀景台，可於洗手間旁邊樓梯直上到頂樓。

❾ 天台花園有望遠鏡，可以觀望三橋景色。

❿ 白樓有汽水機同飲水機供應。

EATWO

Miss A