黃石碼頭 赤徑 鹹田灣 西灣
兩個人影吓相,  港島,  神秘之地

露營地全禁?赤徑藏荒廢小教堂!西貢東100%瀝青路穿越鹹田灣+西灣沙灘

瀏覽次數:1240
個人瀏覽過





秋冬時節,當然係行山季節,目前郊野公園營地仍然封閉,香港人能夠進行嘅戶外活動唯獨得返行山同去沙灘,今次編輯遊走赤徑至麥理浩徑第二段,整段山路全為瀝青路,平坦輕鬆,穿過大草地同兩個沙灘,適合拍拖散吓步。

由黃石碼頭乘搭街渡,可以直達赤徑碼頭,而赤徑係一道西頁東著名行山路線,蚺蛇尖亦位處赤徑附近。赤徑為海濱低地,但初段可找尋一間躲藏於山上、已經荒廢嘅小教堂,中段可直通鹹田灣沙灘營地,繼續依循麥理浩徑第二段走,可穿過西灣營地,位置同為沙灘,最後沿小山路步行可以返回西灣亭。

離赤徑街渡碼頭最接近嘅係香港青年旅舍協會白普理堂,轉入赤徑可以找尋赤徑口石灘同大草地,有啲人會摸蜆,但事實上摸蜆係破壞生態嘅一種活動,編輯建議最好避免。赤徑三面環山,正對赤徑口海面,海面平靜,環境優美,位置雖然並非官方露營地,設備簡陋,但石灘與紅樹林旁邊擁有大片碧綠草地,山明水秀,依舊吸引唔少遊人擇地露營。不過,赤徑其實係非官方露營地,編輯唔建議作為露營地,始終最緊要係平安。

穿過小橋後,可見赤徑村幾近荒廢,村民唔多,但盡頭仍有少量村民同攔路狗,而赤徑海旁可見赤徑村有一間又一間廢屋,頹廢感重。赤徑環境舒適,前臨海灣,背靠群山,眺望蚺蛇尖,退潮時可近觀淺水泥灘、紅樹林,不過現時赤徑內嘅泥灘、紅樹林有大量垃圾,貌似從海上飄到岸邊,實在大煞風景!編輯仔細啲睇,有好多垃圾上寫有嘅都並非繁體字,一道淺灘步道就此破壞。

由街渡碼頭落船,穿過弧形海灣,步行至士多位置約需20分鐘。大多數人都走過赤徑,但赤徑上最鮮為人知同難以找尋嘅地方,一定係山上嘅神秘教堂聖家小堂 (Holy Family Chapel)!穿過士多後,繼續前行即見赤徑村廢屋,其實赤徑村原為客家村落,現時仍舊可見村屋以青磚設計,每一間都已經人去樓空,轉個靚彎前行可見一道小樓梯,前行則有欄路狗,但可以折返北潭凹方向搭車離開。

依小樓梯上行,向左邊走,會發現小頂端有一個倒轉指示牌寫有「天主教聖家小堂」,前行即到達小教堂範圍。教堂由1867年起建立,位處大浪西區,經歷過抗日時期,背後重有一間銘新學校,但已經於1976年停辦,而教堂於1962年交予大埔堂區接管,及後於1980年取消大浪堂區,最終令教堂逐漸荒廢。現時教堂大門已被鎖上,公眾只能於門口同窗口觀察。

由教堂折返,穿過赤徑5分鐘即可返回西貢麥理浩徑2段路口,及後沿麥理河浩徑走,沿途會經過大浪坳、鹹田灣,全段皆為瀝青路,而且遍佈樹蔭,有清晰指示牌,路段清涼舒服。

前往鹹田灣基本只有一條路,中途亦有指示牌,上山路段需時約30分鐘,即達大浪坳,亦可眺望經火山岩形成、高468米、山頂奇拔尖削嘅蚺蛇尖。到達鹹田灣沙灘前,會先經過大浪村,內有廢棄土地,但完全為鄉村地形,部份村屋已經拆卸,同樣人去樓空。

西貢鹹田灣沙灘位處鹹田南邊,靠近西灣,沿路再走約30分鐘下山路,直踩到底就會見到壯觀嘅絕美沙灘,尤如沙巴海灘,甚至馬爾代夫。穿過士多後,但見一道因海水湧入而形成嘅小溪流,步上獨木橋即到達鹹田灣沙灘,否則要過水濕腳或走到較遠位置先可以穿過。秋風送爽,沙粒細滑,海水澄澈,宛如玻璃水,而左邊可見望魚角。鹹田灣本身有官方正式露營地,內有簡單設施,夜晚拍拖兩個人於營地內賞星亦非常浪漫,不過目前仍然封閉,當日編輯眼見有唔少人都只於沙灘處露營,只係位置其實都唔可以露營,若要平安就先要諗清楚。

沙灘右邊可以繼續走西貢麥理浩徑2段,路徑貫穿沙灘,前行向西灣觀星台進發,約需20分鐘步程,穿過設計奇特、奇形怪狀嘅環形觀星台,再步行約10分鐘可以到達此路段另一個沙灘,本身亦有一個官方正式營地,不過現時全部清一色封閉,仍有唔少人選擇沙灘就地作露營地,讀者應先自行考慮利弊。而西灣營地、西灣沙灘靠近西灣村,西灣又叫大浪西灣,為大浪灣「四灘一尖」嘅四灘之一,被列為「香港十大自然勝景選舉」第一名,沙灘同樣水清沙幼,似足步上一個小島嶼,夜晚亦可於沙灘上觀星。

離開沙灘繼續前行,會發現西灣村內滿佈牛隻,而村內更有一幅又一幅壁畫牆,畫中展示海邊漁村嘅特色同歷史,繼坪輋壁畫村、光板田村壁畫村、錦田壁畫村後,恍如另一個香港壁畫村。穿過壁畫村後,再行上行走,大概15分鐘會到達吹筒坳,路段基本起伏唔大,可遠觀萬宜水庫西壩、蠄蟝石頂、水徑頂、横頭墩。一直繞山而行,再步行15分鐘即可以到達西灣路西灣亭。




E.A.Tips :

❶ 乘搭巴士路線94號可以到達黃石碼頭。

❷ 於黃石碼頭乘搭渡輪,可以到達赤徑碼頭,船票約$15至$18,視乎快船或慢船,留意中途站為西貢南風灣之稱嘅灣仔,唔好落船,直到第二個站先為赤徑碼頭,詳見﹕https://www.traway.com.hk/ferry/ 。

❸ 注意黃石碼頭有兩邊街渡,一邊係來往塔門、荔枝莊,碼頭左邊先係來往赤徑嘅街渡。

❹ 赤徑草地有洗手間同垃圾桶,但最好都係自己垃圾自己帶走。

❺ 西灣村附近有唔少牛隻,記得唔好騷擾同餵食牛隻呀!

❻ 露營生火謹記要使用防火墊!

❼ 鹹田灣營地內有士多、洗手間,為官方正式營地。

❽ 西灣亭乘搭村巴29R可折返西貢市中心,車程約需30分鐘,如果乘搭的士,車費則約$90至$100,注意假日等待村巴嘅人可能會較多,每班次約需等待30分鐘。

❾ 西灣亭可眺望萬宜水壯觀景色,沿山路走,繞山而行,即可到達西灣營地。

❿ 步入西灣沙灘時,可以直接走落沙灘,但亦可以繼續沿瀝青路走,穿過小橋亦可到達沙灘。

❿ 基本上赤徑、鹹田灣沙灘、西灣沙灘都有士多可作補給,但糧水最好自備啦。

❿ 鹹田灣沙灘、西灣沙灘都並非康文署正式泳灘,但鹹田灣、西灣就係正式營地。

❿ 鹹田灣獨木橋有如平衡木般窄,只足夠一個人通過,而且非常簡陋,要注意安全,小心步行。

❿ 注意聖家小堂附近蚊蟲極多,如果要上去小教堂,最好做足防蚊措施!

赤徑

  • 新界西貢半島

聖家小堂

  • 新界吐露港赤徑村

鹹田灣營地

  • 西貢東郊野公園

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!


長假期後人氣熱點頓變空蕩蕩巨石陣 30分鐘從炮台山日式庭園登北角後山新手路線紅香爐峰
【野餐隨行】鰂魚涌香港人高水準兩餸飯最平$32 闖北角清靜海邊公園野餐近汽車渡輪碼頭
新田加州花園保留罕見赤紅色殖民時代電話亭 英式小庭園探索圓柱形皇冠郵筒/貴族風時鐘
【野餐隨行】黃大仙近30年騎呢《西遊記》公園野餐 本土自家製熱狗店推分店限定優惠
大圍舊式茶樓客香邨現已恢復24小時營業 火鍋店616班底接手保留經典糯米包/魚翅餃
非來自台灣?本土製牛肉麵旺角/長沙灣有得食 外賣自取折後$50有找
近屯門碼頭!屯門蝴蝶灣泰國冬蔭功蝦湯奶白變橙紅 估吓一碗有幾多隻蝦?
鑽石山出發勇闖石礦場!山中秘道探索高聳東南亞樹屋 上中下三條路線直抵城市後山入口
【野餐隨行】登紅燈山觀九龍半島!何文田勝利道姊妹店廚房打通 兄弟邦x鮮丼家一舖兩用賣日式丼飯
太子人氣車仔麵湯底鹵汁混腩汁 16款麵底任揀必試低卡蒟蒻麵
薄扶林榕樹小徑驚現獨特樹洞仙境!一條路線走過殖民建築玫瑰邨+歷史古蹟伯大尼教堂/舊牛奶公司牧場
「食街」搵食遊!西貢巷弄7間夏日必去本土小食店 離碼頭僅2分鐘步程
全港7間兩餸飯專門店良心地圖!港九新界遍地開花間間平靚正低至$32!(最新消息﹕5月鰂魚涌有新店)
近天澤商場!天水圍後山矮過嘉頓山 秘道闖淋坑山賞北方黃昏景【野餐隨行】
【野餐隨行】鴨脷洲海邊歎有料車仔麵 前臨南區純白燈塔眺東博寮海峽3支煙囪 30分鐘輕鬆走完小玉桂山
月前旺角設分店齊齊叫雞!上水鳳鳴居足料無味精雞湯麵濃郁可口 醉雞嫩滑+10款湯底回頭率極高