闖水浪窩夢幻森林「天空之城」觀星台!麥理浩徑第4段輕易連接西貢市中心

水浪窩可以連接榕樹澳、深涌,或者企嶺下、麥理浩徑,而事實上水浪窩亦可以輕鬆步行到西貢市中心,係一段兩個人於下午4點出發,都有足夠時間嘅拍拖閒遊路線。更特別之處係水浪窩燒烤場內,隱藏一個有如「天空之城」嘅觀星台,係全港唯一仿古天文建築物,值得去影吓相。

乘搭巴士到西沙路水浪窩站落車,前行1分鐘就會見到一個燒烤場、水浪窩停車場,對面馬路就會見到顯而易見嘅「水浪窩」木牌。依循企嶺下樹木研習徑拾級而上,2分鐘就會到達燒烤場,沿樹徑可前往企嶺下老圍方向,不過燒烤場內就隱藏一個適合攝影嘅打卡位。

水浪窩觀星台位於水浪窩燒烤場內,360度每個角落都係影相位,從燒烤場仰視,不難發現觀星台有如一座廢棄小城堡,古樸味濃,如果步行上觀星台頂,則似足站於港版「天空之城」之上,甚有氣勢。

整座觀星台高約6米,兩端分別有兩道供遊客上落觀星台嘅出入口樓梯,外形有如戰時堡壘,事實上係仿河南登封縣告成鎮嘅古代觀測台興建,畫面如同穿越時空。觀星台頂異常寧靜,確實係觀星好地方;而從觀星台俯視,全為碧綠草地,傳來陣陣草香,似足夢幻森林畫面,如果望唔到觀星台入口嘅Banner,恍惚置身英倫古堡。

位處西沙路嘅水浪窩,同時連接非常出名嘅麥理浩徑第3段同第4段,由水浪窩停車場前行,2分鐘即達另一個燒烤場,左面為第3段,右面對面馬路則為第4段。而今次編輯路線會經過麥理浩徑第4段,省卻最難走嘅路線,經過直昇機坪、水浪窩營地,唔需要攀山涉水都可以穿越到西貢市中心,路段全為瀝青路,僅少量斜路,路面寬闊,係散步之選。

依循麥理浩徑第4段走,直至到達木亭,即可轉往山寮上路,經過香港神慈秀明會,亦穿過林林總總豪宅區,頭頂可見一個又一個監視器,連接竹洋路後會逐漸環瞰西貢海景,眺望橋咀島、鹽田仔、羊洲、白沙洲,亦可清楚俯視沙下灘風景。

 步行約30至45分鐘後,可以到達西貢市中心大網仔路,回望會發現路段輕鬆,郊野景色怡人,觀星台則有如西貢後花園,折返西貢市中心亦毋須一小時。

E.A.Tips :

❶ 巴士路線 299X, 807B, 99 皆可到達水浪窩,如299X可以由沙田出發,全部於水浪窩站落車。

❷ 從巴士站落車後,前行至水浪窩停輯場,對面可見水浪窩木牌,依樹徑上行1至2分鐘即達燒烤場,再前行可去企嶺下方向。

❸ 水浪窩觀星台位於燒烤場內,相當明顯。

❹ 由水浪窩停車場繼續前行,可以去到麥理浩徑第4段,去水浪窩營地、直昇機坪,然後直穿過西貢市中心方向。

❺ 請好好保護觀星台,唔好破壞。

❻ 觀星台有入口同出口路線,要跟返上落方向,減低意外發生。

❼ 謹記自己垃圾自己帶走。

❽ 水浪窩營地設有基本燒烤爐、廁所等設施,但目前仍然封易。

EATWO
Miss A

水浪窩觀星台

水浪窩
24hours