旺角女人街新開Fusion麵店 5款無味精養生湯底配烘焙咖啡或茶

瀏覽次數：241

個人瀏覽過

旺角女人街食肆林立，最近又有一間新開業嘅餐廳，以Fusion為主打，一方面有5款特色湯麵，另一方面有烘焙咖啡或茶，有如麵檔、咖啡店兩者Crossover，似乎可以拍拖兩個人去試一試。

店名叫麵賜園，近月先開業，將Noodles、Café兩者合正為一，變成Fusion。而室內則寫有另一間店舖越興園嘅名字，原來兩間位於同一條街嘅舖頭係大有關連。門口有偌大玻璃，室內裝飾加插唔少霓虹燈牌，果然係Fusion店。

菜式上以5款湯底為主打，包括大補雞湯底、海鮮盛湯底、鮮牛骨湯底、濃豬骨湯底、素昆布湯底，寫明採用咩材料，當中大補雞湯底以雞殼加藥材熬煮，一碗好鬼補雞湯麵$88，內含濃雞湯底、花膠、魚肚、新鮮雞柳、北菇、雲腿絲，雞湯鮮甜，無乜雞油，唔會太鹹，亦唔會變成口渴狀態。花膠比較細塊，魚肚反而大塊有咬口，雞柳肉絲亦唔嚡口。麵底軟硬度適中，有彈牙感，略有掛湯力。

至於鮮牛骨湯底以牛骨、腩肉、藥材熬煮，一碗牛隊長湯麵$88，內含濃牛骨湯底、五香牛腩、蘿蔔、澳洲和牛封門柳，牛腩有如崩沙腩，肉質軟腍，封門柳則鬆軟易入口，唔會韌或嚡口，而白蘿蔔滑甜無渣，吸湯力不俗。湯底比雞湯濃厚，肉味重，甚為可口，而兩款湯底都唔會有被味精淹沒，唔會有喉嚨乾涸感覺。其他菜式有日本舞茸雜菌籠仔蒸飯，亦可一試。

店內牆身寫明咖啡係由香港人烘焙，官方稱店內有咖啡顧問，並指會炒製咖啡豆，炭培鐵觀音$15至$18，一碗麵可加$10/杯，茶底有如咖啡嘅烘焙香味，比平常濃茶有種香醇同芳香感，可去油解膩，貌似咖啡一樣有餘韻，但毋須再飲清水清清口腔。

E.A.Tips﹕

❶ 店舖為fusion菜，可以一邊買烘焙咖啡或茶，另一邊買碗麵。

❷ 枱面有悅和醬油系列嘅芝麻油、辣椒油。

❸ 麵賜園同越興園同樣位於旺角女人街，前者位處旺角通菜街36號地下，後者則位於旺角通菜街31號地下。

❹ 麵賜園為越興園旗下。

❺ 點餐需要用QR Code落單。

❻ 埋單壽櫃台就得啦。

❼ 可轉扁拉麵，或加$6轉日本稻庭烏冬、年糕。

❽ 星期一至五下午6點後、星期六日都要收加一服務費。