東歐餐廳 Ivan the kozak
兩個人醫吓肚,  和你Taste,  西式

全港唯一!中環蘭桂坊樓上東歐菜 舌尖穿越俄羅斯烏克蘭

個人瀏覽過





睇過藝人杜汶澤嘅節目「YellopenRice」嘅你,應該對呢間餐廳唔陌生,名為東歐餐廳 Ivan The Kozak 位處中環蘭桂坊內,為全港唯一以俄羅斯烏克蘭菜式為主打嘅餐廳,小店看似難搵,但其實門庭若市,拍拖兩個人去食嘅話就預早訂枱啦!

東歐餐廳 Ivan The Kozak 位處中環蘭桂芳,離中環大館不遠,係一間樓上舖,由2001年開業至今有20年歷史,店內裝潢以異國風情為主,牆上亦有烏克蘭首都風景畫,枱櫈陳設都有濃厚東歐色彩,燈光稍為昏暗,主打正宗俄羅斯烏克蘭菜式,餐牌當中更有多款俄羅斯、奧地利、捷克等紅酒,據悉菜式亦由俄羅斯當地大廚炮製傳統美食,原汁原味,充滿異國口味,甚有誠意。

招牌芝士焗牛脷盅$98 以小碗盛載,內含一塊又一塊牛脷,每一塊切好嘅牛脷浸泡於香濃芝士醬汁內,而其實小碗表面重有一塊酥皮,牛脷盅上枱後,侍應會拎起碗面一塊酥皮,再分成小塊,有如西餐嘅酥皮湯。食牛脷嘅同時,既可以食薝菇等配料,亦可以連同酥皮一齊食,略嫌酥皮唔夠酥脆,厚厚嘅牛脷沾滿芝士醬汁嘅牛脷看似邪惡,實質芝士亦可以拉絲,配搭起來極惹味!

烏茲別克雞肉餃子$88 每碟有3大粒,餃子皮較厚,內餡為雞肉,軟腍有雞肉味,餃子旁邊配有醬汁,略帶酸甜,甚為開胃。

最吸引眼球嘅應該係古法香燒豬肋骨$198,上枱時以火燒豬肋骨,火槍加上酒,隨即出現熊熊火焰,火燒之下,豬肉香味四溢,部份位置甚至被燻黑,豬肋骨雖然香口,但肉質上就較嚡口,並非軟嫩感覺,火燒場面與肉質軟嫩嘅要求難道唔可以同時出現?

而味道上比較特別嘅係古法宮廷焙鹿肉$228,熱騰騰嘅石頭鍋內裝滿鹿肉,有種食野味感覺,每一塊鹿肉仍然於醬汁內翻滾,夾起時肉質軟腍,不過亦有部份稍為嚡口,醬汁濃厚,調味方面應記一功,鹹中略帶甜味,所以有少少甜香,不過鹹味較重,味道偏濃,比較適合下飯,只可惜欠缺一碗白飯。

招牌甜品有烏克蘭風味蜂蜜蛋糕$88,係一款當地人嘅自家製鹹蛋糕,配有蜜糖香甜味,亦有Nuts口感,而蛋糕加上蜜糖後,唔會太甜,但反而並非似蛋糕,而係似港式發水麵包或蜜糖麵包。

無晒Kavass東歐Wheat Soda$68,唯有叫Mors自家製Cranberry Juice,蔓越莓汁,結果被逼同普通Cranberry Juice$48對比,$68 絲絲甜味當中加添酸味,類似檸檬、柚子之類果汁,其實係Lingoberry配搭Cranberry,而$48則反而重莓果味。


E.A.Tips﹕

❶ 位置為巴力大廈內,可由中環大館步行到底,又或者中環蘭桂坊向上步行。

❷ 必須Book位,因為人流較多。

❸ 如果有人生日,可以request加上happy birthday同candle呢!


東歐餐廳

  • 中環雲咸街63號巴力大廈1樓
  • 12:00 – 22:00
  • 2851 1193

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!