石屋家園+格仔山
九龍,  兩個人影吓相,  神秘之地

山頂加設欄杆!格仔山重修還原紅白格仔 老虎岩石屋活化探索昔日寮屋區

瀏覽次數:495
個人瀏覽過





景觀橫跨九龍仔、樂富、九龍塘嘅格仔山,一直以來色彩盡褪,但今年中格仔山被重新髹上紅白相間格仔,終於回復舊有面貌,而早年格仔山鐵絲網破損,山頂位不時有人於懸崖邊緣打卡,現時則已加設欄杆,減低危險度,兩個人前往格仔山拍拖閒遊亦可保障安全。

前往格仔山之前,會經過聯合道,不妨先到石屋家園走走,石屋家園被稱為何家園石屋,為侯王廟新村舊式民居,為昔日一個寮屋區,2010年被列為香港三級歷史建築物。事實上,石屋原為一座半歐陸式大宅,直到日治時期被拆毀,其後再興建為侯王新村,再由平房變寮屋區,易名侯王廟新村,以安置湧入香港嘅基層難民。最終於2010年活化,保存石屋建築特色,如木建築、石砌、磚塊結構,甚至屋頂、木門。

石屋樓高兩層,屬高中式平房,由花崗岩、混凝土建成,屋頂呈金字形,內含舊式鐵窗框、木樓梯、筒瓦板瓦屋頂。而近聯合道方向寫有「藍恩記」,有指位置曾為多個片場,著名影星如陳寶珠、蕭芳芳都曾經於此地拍戲,而位置亦曾為友僑片場嘅貨倉,再租予藍恩記山墳墓碑工程作墓碑廠工場,「藍恩記」招牌自始為石屋家園嘅標記。

目前,石屋由社企營運,室內改為一間50至60年代嘅懷舊冰室「石屋咖啡冰室」、文物探知中心,甚至舉辦唔同課程、展覽,旁邊含九龍城歷史詳盡介紹,如生活、飲食文化,包含模擬場景,神複製昔日面貌,尤如傳統文化歷史博物館。而石屋外更有一個以明陣花園設計嘅小空間,如同八陣圖,仿如迷你明陣迷宮,其實係還原昔日60年代嘅高空俯瞰場景。

折返香港兆基創意書院,轉入延文禮士道,前行至九龍仔公園入口,穿過九龍仔公園後,有一道秘道可直接通往樂富公園。循樓梯拾級而上,會到達樂富公園範圍,到達一個配水庫後,再向右邊走,前行至另一個配水庫位置,進入格仔山嘅小樓梯就近在眼前。

格仔山又叫九龍仔山、雷達山,甚至樂富山,海拔不足100米,山頂可180度環瞰九龍塘至九龍城,更可俯瞰九龍仔公園。山頂內有格仔山氣象站、三角測量站,而標高柱已經損毀,穿過小路可以直上格仔山山頂位置,到達昔日啟德機場13跑道降落航道必經地方。

編輯早兩年前往格仔山,顏色單調,而且無圍欄,山頂為懸崖,危險度極高;惟今年再度登上格仔山,發現山上已重新髹上紅白漆油,神還原當年紅白相間圖案標記,顏色鮮艷奪目。事實上,紅白格仔圖案係方便昔日機師導航,小山丘先會被稱為格仔山,直到後期機場關閉,避免誤導機師,故小山丘變成單調灰色,只建有一個樂富配水庫休憩花園,內含大片碧綠草地。

除咗髹上紅白格仔,山頂亦特別加設欄杆,比起昔日破爛嘅鐵絲網,安全度上升,可以放心於邊緣悠閒地觀賞山頂景色或談心。不單可俯視山下景色,既可俯視九龍仔公園、環瞰九龍塘至九龍城,甚至遠眺東九龍一帶風景,天氣晴朗時更可眺望維港景色,背後則為獅子山。此處亦係觀賞黃昏日落景或夜景嘅好地方,不過落山路段需要原路折返,裝備不足下最好於完全天黑前離開。




E.A.Tips :

❶ 乘搭巴士路線1, 10, 11D, 11K, 75X, 7B, 85, 85A, 85B, 113,891 或小巴路線13, 39M, 66S皆可到達樂富石屋家園;而想先往格仔山,可以乘搭巴士路線7,75X,85,85A,85B 到樂富富強苑,又或從樂富廣場步行至聯合道,前往樂富公園,再進入山徑入口。

❷ 石屋家園逢星期一休息,內有導賞團每團最多25人,需要預約。

❸ 進入石屋家園費用全免。

❹ 沿聯合道走向侯王古廟,正對面即為石屋家園。

❺ 若有聯合道樂富公園為起點,向上行走,直至見到分岔路口,左邊為配水庫,同時可通往樂富配水庫休憩公園大草地,而右邊則為發電站,中間有一道小樓梯,沿小路可以直接通往格仔山山頂。

❻ 若有九龍仔公園出發,穿越洋紫荊園,再穿過停車地方,稍為向上而行即可仰望已經重新髹上紅白格仔嘅格仔山,沿小路進入,即可走入樂富公園範圍,直上樓梯後,會到達配水庫位置,繼續前行亦可以找尋近盡頭嘅小樓梯入口,沿小路而走可直上格仔山山頂。

❼ 雖然現時已經加設欄杆,但仍要小心安全,勿為打卡做危險動作。

❽ 前往格仔山嘅必經小路有一定危險度,部份路段過於狹窄,亦有懸崖小路,所以亦要一步一驚心。

❾ 謹記自己垃圾自己帶走。

❿ 格仔山並無洗手間或補給點,需要於山下解決,如樂富公園或九龍仔公園。

石屋家園

  • 九龍仔聯合道133號
  • 08:00–18:00,星期一休館
  • 2325 0111 /2325 0131 (Café)

格仔山

  • 九龍仔
  • 24hours

樂富公園

  • 老虎岩富安街
  • 24hours
  • 2304 5585

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!


【野餐隨行】黃大仙近30年騎呢《西遊記》公園野餐 本土自家製熱狗店推分店限定優惠
大圍舊式茶樓客香邨現已恢復24小時營業 火鍋店616班底接手保留經典糯米包/魚翅餃
非來自台灣?本土製牛肉麵旺角/長沙灣有得食 外賣自取折後$50有找
近屯門碼頭!屯門蝴蝶灣泰國冬蔭功蝦湯奶白變橙紅 估吓一碗有幾多隻蝦?
鑽石山出發勇闖石礦場!山中秘道探索高聳東南亞樹屋 上中下三條路線直抵城市後山入口
【野餐隨行】登紅燈山觀九龍半島!何文田勝利道姊妹店廚房打通 兄弟邦x鮮丼家一舖兩用賣日式丼飯
太子人氣車仔麵湯底鹵汁混腩汁 16款麵底任揀必試低卡蒟蒻麵
薄扶林榕樹小徑驚現獨特樹洞仙境!一條路線走過殖民建築玫瑰邨+歷史古蹟伯大尼教堂/舊牛奶公司牧場
「食街」搵食遊!西貢巷弄7間夏日必去本土小食店 離碼頭僅2分鐘步程
全港7間兩餸飯專門店良心地圖!港九新界遍地開花間間平靚正低至$32!(最新消息﹕5月鰂魚涌有新店)
近天澤商場!天水圍後山矮過嘉頓山 秘道闖淋坑山賞北方黃昏景【野餐隨行】
【野餐隨行】鴨脷洲海邊歎有料車仔麵 前臨南區純白燈塔眺東博寮海峽3支煙囪 30分鐘輕鬆走完小玉桂山
月前旺角設分店齊齊叫雞!上水鳳鳴居足料無味精雞湯麵濃郁可口 醉雞嫩滑+10款湯底回頭率極高
油麻地香噴噴鐵板魷魚鬚惹人垂涎 廟街招牌流心芝士玉子燒香甜不膩
【野餐隨行】落雨有瓦遮頭!西灣河隱藏式街坊小廚 碼頭海旁公園野餐賞雨景
柴灣街坊風味酸辣粉現小重慶 分5種辣度微辣BB辣溫和易入口