5間中式酒樓點心(沙田富東閣海鮮酒家+青衣龍門點心廚房+觀塘豪隍點心工房+太子徐記廚房點心+524沙田石門蒸廬)

全港5間本土「一盅兩件」中式酒樓 沙田富東閣超抵食點心下午茶 邊間雞札重有火腿魚肚?

要數中式酒樓,大多都係連鎖式酒樓,能夠安心幫襯嘅酒樓少之又少,今次編輯就找尋全港市區3間中式酒樓,方便大家都可以隨時去拍拖兩個人「飲啖茶,食個包」,歉返「一盅兩件」,而下午茶時間點心更加抵食!

(1)沙田富東閣海鮮酒家

沙田瀝源邨內嘅富東閣海鮮酒家係最為人知嘅黃金酒樓,當中下午茶更有特價點心,比午市更平,點心落單並非採用電腦飛,而係傳統點心紙,而每籠點心低至$12,大部份都係$20內,分大點、中點、小點、頂點、特點,當然有少數點心超過$20,炒粉麵則$48起,價錢嚟講的確幾抵食,確實係一間區內街坊茶樓。值得一提,酒樓內碗碟都以高溫滾水持續消毒,總算可以放心使用。

每份點心即叫即蒸,煎虎皮尖椒$15、香煎黃金糕$15都為最早上枱嘅點心,前者煎得香口,後者則啖啖煙韌。柴魚花生粥$12 質感軟綿,粥底內有花生粒粒、柴魚碎,暖胃而有輕微飽肚感,至少唔係落味精。

傳統點心款款以竹籠熱焫焫上枱,當中有鵪鶉蛋燒賣$18、花膠灌湯餃$26,鵪鶉蛋圓潤有蛋香,燒賣紮實飽滿,蝦肉充足,爽口彈牙。而灌湯餃稍為失色,做法並非傳統灌湯餃,而係湯灌餃,大餃子浸於熱湯內,而非傳統做法熱湯灌入大餃子內,不過餃子亦甚飽滿足料,湯內有兩片小花膠片,清湯味道不過不失。

正常點心有什醬蒸鳳爪$19、四寶滑雞札$25,雞腳都有分藥膳、沙薑、什醬三種口味,不過較為傳統嘅係用醬汁,質感黏稠,較為濃味。而雞杞內有雞髀肉、冬菇、魚肚、蟹柳,雖然欠缺傳統嘅火腿,但配上魚肚而非採用豬皮已經值得一讚。

甜品有杞子桂花糕$12 質感較軟,稍嫌唔夠挺身,杞子份量充足,桂花味則稍輕,甜度唔算高,可以一試。

富東閣海鮮酒家

沙田瀝源街6號瀝源廣場1樓5號舖
07:00 – 23:00
2699 8333

(2)觀塘豪隍點心工房

第二間係唯一位處九龍區嘅豪隍點心工房,位置為觀塘工業區,由工廈後門進入,並非如富東閣一樣為傳統酒樓,但就以酒店大廚炮製點心,店內反而以西日式設計,帶有時尚感,但就講到明提供懷舊點心,點心分為小點$23、中點$25、大點$28之餘,亦有頂點$30、特點$34、超點$38、皇點$50,類別係3間當中最多。點心上枱比富東閣點心更熱焫焫。

點心當中以豪陸蝦餃皇/2粒(中)、蝦仁燒賣皇/2粒(中) 為招牌之作,雖然數量上係比一般酒樓少一半,但每粒顆頭飽滿圓潤,蝦餃表皮稍厚,但蝦肉尚算通透,餡料實在,蝦肉份量超多,而且爽口彈牙,燒賣如是,豬肉亦有手剁質感。

新式點心亦應有盡有,例如蒜蓉芝士長春卷(特)等炸物,有幾分驚喜,春卷長度比酒杯、筷子長,表皮香脆,蒜蓉味唔重,蝦肉餡料則充足,並非空心;但甜品則稍為失望,以蜂蜜黑糖糕(小) 為例,貿感有如黃金糕與馬拉糕嘅混合體,甜度未至於高,但蜂蜜配黑糖似乎較為一般。

傳統點心方面則甚為可取,尤其係四寶雞札(頂),除咗雞髀肉、芋頭、腐皮,難得地包含火腿、魚肚,餡料充足,比起好多酒樓為慳成本價錢而以蟹柳、豬皮取代好得多,而且魚肚爽滑,腐皮入味,火腿經典,芋頭條軟滑,雞肉亦嫩滑。至於五香金錢肚(特)、香茜牛肉腸(中) 亦係不過不失嘅傳統點心,略嫌牛肚稍韌、膠粉皮稍厚。

值得一讚嘅地方係盅飯質素,一份鳳爪排骨飯(特) 雖然並非以盅盛載,但飯粒黏滑,肉汁滲透飯底,白飯由淡而無味變得略帶鹹味,排骨、鳳爪入味之餘亦份量適中,質素有傳統酒樓盅飯感覺,而且好夠飽肚。

豪隍點心工房

觀塘敬業街65-67號敬運工業大廈1樓A室
08:00 – 21:00
2562 5668

(3)青衣龍門點心廚房

位於青衣嘅龍門點心廚房,身處有「冬菇亭」之稱嘅熟食亭內,編輯當日下午茶時間去到已無點心供應,所以只能提供有限度實地資料。店內點心皆為傳統款式,分為小點、中點、大點,價錢為$15、$20、$24,係唯一只分大、中、小點,並無特點、頂點等嘅茶樓。而除咗點心,亦有炒粉麵供應,店內相對富東閣、豪隍點心工房較為地踎、簡陋,的確係傳統屋邨茶樓,比富東閣更似一間街坊茶樓,下晝時間已無茶客,估計真係早茶時間先有較多年長茶客,所以店方下晝兩三點已有準備落場休息嘅狀態。

龍門點心廚房

青衣青康路12號長康邨熟食檔熟食檔9-12號
07:00 – 23:00
3426 2203

(4)太子徐記廚房點心

(5)沙田石門蒸廬

E.A.Tips :

❶ 富東閣下午茶供應時間為13:30至15:30,收加一服務費,茶芥為$9/位,炒粉麵星期六日假期每碟加$5;而豪隍點心工房則無下午茶時間,茶芥$6/位;至於龍門點心廚房茶芥則為$5/位,全日免收加一,茶市一般為06:00至16:00,但15:00已無點心供應。

❷ 沙田瀝源巴士總站對上就係富東閣位置。

❸ 來往觀塘巴士路線有219X, 42C, 641, 671X, 88X, T277。

❹ 來往青衣嘅巴士路線有41,42,42A,43,43A, 43B,43C,241X,242X, 243M,249M,249X,A32, E32,N41X,N241,NA32,X42C。

❺ 沙田富東閣流轉度較快,觀塘豪隍點心工房等候時間比較長,不過一般都只係等約15分鐘,至於青衣龍門點心廚房就係較地踎式街坊茶樓,人流較少,不過提供點心嘅時間亦相對較短。

❻ 青衣龍門點心廚房嘅幾個網絡地圖都係錯誤,建議先找尋康祥樓,再找尋康祥樓熟食檔,就會搵到天橋旁邊嘅冬菇亭,於青康路、涌美路交界會比較容易搵到。
EATWO
Miss A

在〈全港5間本土「一盅兩件」中式酒樓 沙田富東閣超抵食點心下午茶 邊間雞札重有火腿魚肚?〉中有 2 則留言

留言功能已關閉。