自己友 Buddy Cafe
Cafe 咖啡店,  兩個人醫吓肚,  和你Taste,  港式

赤柱唯一!市集背後街坊小店 每日推出限時午餐益自己友

個人瀏覽過





提到赤柱,最近唔少人都只識找尋一間以粉紅歐陸風格、意式烘焙為主嘅赤柱打卡餐廳,但據連登認證,赤柱區內只有一間餐廳為可支持商家,絕對係One And Only,兩個人搵食謹記要睇清楚啲啦!

於赤柱拍拖吃喝玩樂,不外乎到美利樓、海旁打卡,或暫於赤柱市集行逛,甚至到赤柱沙灘曬吓太陽兼玩吓水,但搵食呢?大多數餐廳都並非自己友,今次編輯就帶大家去隱藏於赤柱市集背後嘅街坊餐廳,完全係自己友。

黑板上只有3個餐點,事實上每日唔同,想試就要留意官方Facebook每日公佈,不過每日3個餐大致上都係以西餐為主要菜式,服務對象為赤柱街坊,絕對係一間名副其實自己友嘅餐廳。當街坊與店主關係良好,甚至會預留餐點予街坊,飲品亦會較大杯,而街坊與店主嘅話題亦圍繞鄰里之間或區內之事,充滿人情味,的確非常「街坊」,恍惚走入赤柱一個小角落。

當日3款午市套餐為美式燒鴨配沙嗲汁$49、椰汁葡式雞$49、紐西蘭西冷牛扒配黑椒汁$64,皆以西式為主,感覺簡單,無乜特色,而且下晝1點半只餘下美式燒鴨可供選擇,甚至只可配搭黑椒汁,但可選配飯或意粉,估計店主與街坊關係良好,每日有固定容人幫襯。

美式燒鴨意粉上枱後,白色膠碟配上舊式格仔餐枱布,有如本地舊有港式餐廳,感覺有懷舊味道,港式西餐名副其實。無期望之下,意粉甚有驚喜,爽滑彈牙,軟硬適中,可以輕鬆將整碟意粉食完。燒鴨肉質唔嚡口,而黑椒汁、燒鴨亦互相配合,相信比原先沙嗲汁更好,黑椒味稍濃,但可融入燒鴨,亦可混合意粉。


E.A.Tips﹕

(1) 由赤柱市集轉上小路即會搵到小店,由赤柱市集向海旁方向走,近最後一個路口轉左即達,並非到盡頭分岔路口。

(2) 注意門口寫有早餐時間為07:00至10:30,午餐時間為11:30至14:30,下午茶時間則為14:30至16:30,但事實上只有午餐,而且賣完就無。

(3) 午市最低消費$42,座位唔多,需要人齊先入座。

(4) 巴士路線6,6X皆可由中環交易廣場前往赤柱,但巴士路線260為特快路線,車程會更快到達赤柱。

(5) 官方Facebook會每日公佈當日午餐餐點,想預先知道可以直接查看一下,皆因小店客人僅以街坊為主。

(6) 注意小店逢星期一休息,避免摸門釘。

(7) 午餐配有飲品,冷熱飲同價。

(8) 凍檸茶較有茶味,凍檸蜜味道稍淡。


自己友 Buddy Cafe

赤柱赤柱大街10-12號地下A-D及G舖
星期一全日休息;星期二至日 07:00 – 10:30、11:30 – 16:30
9206 2600

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!