2021-10-21

90分鐘船程享無遮擋日落景!途經沙螺灣村/馬灣涌村/赤鱲角機場 左右兩岸風光如畫 大澳至屯門假日遊船河路線人均$27!

大澳至屯門船程1小時遊船河

個人瀏覽過





提到遊船河,大多數人都會諗到西貢出發嘅船P(船上派對),如果想兩個人更切身感受海上風光,不妨挑選另類路線,無需要落水都可以於船上觀賞兩岸風景,今次推介連接屯門至大澳嘅航線,拍拖每人$25至$30即可以於1小時內享受海上景觀,左右兩岸皆風光如畫,風景方面比西貢出發更壯麗,而當中日落限定嘅航線更加係拍拖兩個人非搭不可!

由大澳折返市區,唔少人都會挑選乘搭大嶼山巴士折返東涌,今次編輯選定於大澳渡輪碼頭乘搭渡輪航班,由大澳前往屯門需時1小時,事實上以船程嚟計同巴士相距唔大,而現時乘搭巴士出入不時要大排長龍,倒不如反其道而行,以渡輪代步。當中一個船班次更加係編輯推介,暫時稱為日落船次,不單可以觀賞兩岸風光,更可欣賞壯觀黃昏日落景色,是次船班次一端享金黃色鹹蛋黃靚景,另一端則有激罕本地極光景色,絕對蔚為奇觀。

乘搭渡輪航線極簡單,只需要於大澳海濱長廊旁邊嘅碼頭附近找尋持票人,憑票留位,上船繳付船費,而大澳至屯門航線會途經沙螺灣、東涌,可以隨時上落船。事實上,呢條航線於青馬大橋落成前都已經有航線來回大澳、沙螺灣、東涌至屯門,分別係街渡、油麻地小輪。

渡輪碼頭位置近大澳海濱長廊,而海濱長廊欄杆被髹成粉紅色,連綿通道頓時增加少女感。而海濱長廊兩岸風景亦優美,一邊可回望大澳漁村,亦可觀望紅樹林,另一邊則可望無盡大海,遠端則為澳門半島、氹仔、珠海,位置更可賞無遮擋日落。

由大澳渡輪碼頭上船,途經沙螺灣渡輪碼頭、東涌新發展碼頭,最後到達屯門客運碼頭,船程約60至90分鐘,享海陸空風景,1小時船程比起乘搭大嶼山巴士折返東涌更有驚喜,減去45分鐘巴士車程嘅沉悶感,同時免卻等待上巴士嘅人龍。

大澳對岸為澳門、珠海,從大澳前往沙螺灣,可回望大澳漁村風光,亦可仰望將軍石、虎山觀景台,前行亦可眺望岸邊大嶼山東澳古道,甚至極近距離望本地有份斥鉅資興建嘅大白象工程港珠澳大橋。由於位處本港最西面,汪洋大海當中嘅黃昏日落景色一覽無遺,而且係完全無遮擋享盡日落景色。

    

當船前行至沙螺灣,一端可眺望沙螺灣村,唔少人都會選擇沙螺灣作行山或露營地;另一端則可近距離直視赤鱲角機場,包括近年著名嘅日落賞景地機場維修區,可仰望飛機升降,亦可算係感受本地偽旅行嘅一個行程,不過有機會愈望愈心嗡。

離開沙螺灣碼頭,左邊仍為機場範圍,仍可見機場降落跑道,然後即會進入東涌灣,右邊則可見馬灣涌村,而位處東涌嘅馬灣涌村亦屬一個小漁村。其後,則可仰望昂坪纜車,一架又一架行駛中嘅纜車車廂橫越空中,亦為另類風景。經過東涌海濱長廊,即會到達東涌新發展碼頭,位置離東涌纜車站、市中心有一段距離,比較接近東涌北公園、東梅古道。

由東涌再出發,即可前往屯門方向,左邊仍為赤鱲角機場,前行可眺望亞洲國際博覽館,亦可見人工島。而另一端則為北大嶼山方向,經過屯赤隧道時,亦可遠眺大小磨刀海岸公園。渡輪繼續前行不久,即會到達終點站屯門碼頭,結束1小時遊船河路線。


E.A.Tips :

(1) 來往大澳、沙螺灣、東涌、屯門嘅渡輪航線為富裕小輪,要預先到達碼頭取票留位,建議預早至少15分鐘取票,皆因係以先到先得形式排隊憑票上船,所以謹記一定要排隊,而且係早排早揀位!而上船之後以八達通或現金繳付船費,不設退款,各渡輪時間及班次表可參考官網PDF

(2) 留意部份航班係唔停留中途站沙螺灣、東涌。

(3) 於大澳渡輪碼頭前行1分鐘就會到達上船位置,靠近大澳海濱長廊,附近可見派票嘅負責人,而渡輛載客量亦有限,如果渡輪滿座就要等候下一班船。

(4) 如果懸掛3號或以上風球,渡輪會停止服務。

(5) 以普通渡輪計算,由大澳至屯門船程約90分鐘,而大澳至東涌船程約40分鐘,至於東涌至屯門船程則為45分鐘;而以快速船計算,大澳至屯門船程約55分鐘,而大澳至東涌船程約30分鐘,至於東涌至屯門船程亦約25分鐘。

(6) 渡輪船費以成人計算,星期一至六全程為$20至$25,而星期日及公眾假期全程則為$25至$30。

(7) 編輯推介觀賞日落嘅航班為大澳出發嘅18:00航班,屬快速船;另一邊廂屯門出發嘅17:00航班,則屬普通船。唯日落時間會受日照影響最佳觀賞月份為每年9-10月 。


(8) 留意貨物、寵物亦需要收費,每1立方米收$80,而單車、釣魚用具亦需要各取1張船票。

(9) 來往大澳至東涌另可乘搭大嶼山巴士11號,車費為$11.8至$19.2;而來往大澳至梅窩則可乘搭大嶼山巴士1號,車費為$10.7至$17.7,車程均為45分鐘至1小時,凌晨1點亦有班次,不過未計排隊輪候時間。

(10) 注意途經嘅東涌碼頭並非舊碼頭,而係東涌新發展碼頭,雖然有巴士路線,但離市中心基本上有一段距離,步程大約為15分鐘。

(11) 渡輪僅為中小型船,分為上、下兩層,下層有冷氣供應,而上層則可觀景,座位並唔算多,每層約廿零人。


(12) 注意上船要好好保管個人物品,千祈唔好跌落地下,因為上層地下係無遮掩,隨時會跌落海,跌嘢就唔好搵唔好執啦。


大澳公眾碼頭

石仔埗街
18:00前

大澳公眾碼頭至沙螺灣渡輪碼頭﹕

沙螺灣渡輪碼頭

大嶼山沙螺灣

沙螺灣渡輪碼頭至東涌新發展碼頭﹕

東涌新發展碼頭

大嶼山東涌海濱路

東涌新發展碼頭至屯門客運碼頭﹕

屯門客運碼頭

屯門湖翠路148號

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook啦!

ΔPlease Like & Follow & Subscribe /
歡迎讚好、追蹤、訂閱


【3低本地遊】周末穿梭舊工廠/壁畫村兼上山探險打卡 荃灣西海旁歎咖啡睇日落 $650行程包早午晚餐下午茶
隱藏版藍田後花園打卡 穿梭五桂山茅湖山直通將軍澳
赤柱唯一!市集背後街坊小店 每日推出限時午餐益自己友
【3低本地遊】錦田慢活文青遊 必食2間街坊店 探訪城中古村連2日1夜懶人露營地
大角嘴定食版海南雞飯 霓虹燈牌現4款招牌菜式
【3低本地遊】原為客家村落? 秘道探索柴灣戰時遺跡 體育館藏迷你定食屋
【3低本地遊】小西灣前身有料到? 百呎小店有水準 闖入軍事建築遺址
【3低本地遊】何文田歎平價和牛丼 連走4條山徑超簡單路線 邊條路線先係紅燈山?
【3低本地遊】油麻地激厚蛋吐司早餐/石燒牛晚餐 上空中花園兼漫遊紅磚屋打卡
全港5間本土中式點心酒樓 沙田富東閣超抵食「一盅兩件」下午茶 邊間有加大版糯米雞?邊間雞札重有火腿魚肚?
厚切魚生款式眾多 太子日式丼飯外賣店離始創僅1分鐘步程
【3低本地遊】曾擠身全球最型格社區3甲!深水埗歎高水準健康跑友餐 探索草根小區兼輕鬆上山睇日落
岩石媲美東平洲馬屎洲!暢遊荔枝莊地質步道+攀登雞麻峒/蛇石坳 深涌閒遊全港最大草地打卡 兩條路線任揀!
山頂加設欄杆!格仔山重修還原紅白格仔 老虎岩石屋活化探索昔日寮屋區
新蒲崗廣場泰日餐廳Crossover 隨時邊食丼飯邊歎冬蔭公
躲藏大角嘴舊商場 微舖獨沽一味只賣越南包

撰文﹕Miss A ;攝影﹕Mr E, Miss A;設計﹕Mr E

View all posts by 撰文﹕Miss A ;攝影﹕Mr E, Miss A;設計﹕Mr E →