3低本地遊,  兩個人旅吓行,  和你Taste

【3低本地遊】踩單車去水壩 大美督訪無人沙灘兼多肉植物店

個人瀏覽過





提到大埔大美督,一般人大多會諗到踩單車去水壩,甚至一班朋友一齊去BBQ燒嘢食,盡頭亦單車舖、食肆林立,的確係拍拖兩個人嘅休閒好去處,除咗水壩,其實重有唔少地方值得一遊。

到底應該叫大尾篤、大尾督、大美篤定大美督呢?原來早期因位置為大埔東部邊緣,加上靠近八仙嶺龍脈末端,所以叫做大尾篤,尾同篤都指最後,後來村民覺得意思有不詳之感,所以改稱為大美篤、大美督、大尾督,直到2007年地政總署《香港憲報》正名為大美督,意指美麗。雖然好多指示牌、地圖都統一寫為大美督,不過大多數人寫法都仍然係大尾督、大尾篤、大美篤,甚少人寫大美督。

第一站﹕白石角海濱長廊+藍色時空隧道

由大圍或大埔踩單車入大美督水壩,沿海邊踩單車,風光如畫,一般單車路線都會經過科學園、白石角海濱長廊,兩個人踩吓單車的確幾浪漫。白石角其實暗藏一道藍色隧道,該隧道內構圖好有時空交錯感,配合天然光線更有從黑暗走向光明之感,不妨落車打吓卡啦!

延伸閱讀﹕白石角海濱打卡 天藍色時空隧道由黑暗走向光明

第二站﹕大埔汀角東海岸沙灘

入大美督除咗踩到入水壩仲有咩睇?適逢夏天來臨,當然要去吓沙灘啦!但龍尾灘個人工泳灘8年都未起好,不妨去隔離個沙灘啦。汀角東海岸沙灘位置比較隱蔽,正正位處龍尾灘隔離,對比其他一到夏天就人山人海嘅沙灘,汀角東海岸狀似一個無人沙灘,既可兩個人散步、影相,又可以觀賞自然生態。天氣晴朗時,泥灘水氹會有蟹仔、海星、螺仔等生物,附近仲有全港第四大紅樹林。

延伸閱讀﹕大埔激罕無人沙灘 發掘大自然生態靚景

第三站﹕Mr Cardigan

由汀角東海岸行過對面對面,會發現一間超有放空感嘅Cafe,Mr Cardigan由白色貨櫃改裝,放滿綠色植物,並以多肉植物為主,隔離仲有農地可以租用,滿滿田園風。Cafe內嘅露天茶座係文青打卡點,周末唔少拍拖情侶、一家大細都去Chill吓,環境舒適,有幾分世外桃源Feel。Cafe主打只係花茶、梳打水、輕食,擺盤精緻,花茶超靚,梳打水亦可以DIY,絕對IG-able!

延伸閱讀﹕大埔白色貨櫃露天茶座 周末限定文青打卡熱點

第四站﹕大美督水壩

休息完可以繼續踩入大美督,船灣淡水湖、水塘水壩出名係踩單車熱點,通常去到大美督水壩作結,碧海藍天下踩單車追風的確係周末極佳活動,黃昏更可以喺空曠地方睇日落。主壩附近景觀遼闊,藍天白雲下嘅湖光山色,狀甚優美,可於周末感受片片寧靜氛圍。單車路亦不時可以賞花,包括上月見到嘅雞蛋花,即使錯過咗3至4月賞花季,都可以繼續賞花,而大尾督單車路嘅雞蛋花比坊間大,雖然係白花黃心,並非正宗嘅紫紅色雞蛋花,但黃色嘅優雅感較重。

延伸閱讀﹕大尾督單車路賞花 5月雞蛋花優雅現身



Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!