by 
個人瀏覽過
何文田一帶向來多住宅，如何文田山道、窩打老道山，而加多利山、嘉道理道更綠意盎然，西式別墅林立，目前的確係一個優質居住地方。何文田除咗住宅區，其實有咩特別呢？
第一站﹕御勝牛
由紅燈山行返落山，可以落返窩打老道附近搵食，而何文田勝利道就有好多間食肆，當中有一間微舖主打和牛，價錢竟然100蚊內！御勝牛位處勝利道地舖，空間唔大，但出品一流，招牌勝牛和牛丼成份套餐上枱，和牛丼份量充足，和牛粒好香，肉質軟嫩又juicy，油脂分佈均勻，入口滿滿油脂香，牛油香溢出時極滋味，和牛味好濃郁，粒粒入口即溶，珍珠米香軟煙韌，中和和牛肥膩感。和牛黑白熱狗更加只係學生餐價錢，竹炭麵包有幾分輕脆，芝麻香十足，和牛粒作餡好吸引。
延伸閱讀﹕何文田高質和牛丼 入口即溶碗碗足料
早於19世紀末，該區其實人煙稀少，僅少量居民會居住，清代嘉慶年間亦未有為該地命名，相傳有一個講法係一位居民陳何文為該地擁有者，所以該地就叫何文田，即為陳何文嘅田地，而另一個講法就係該地係屬於姓何、姓文、姓田三個姓氏所擁有。
第二站﹕ 京士柏上配水庫遊樂場
何文田有4個配水庫遊樂場，依山而建，可以一條路線走完，而且不出1小時就可以完成，路段輕鬆，最啱拍拖兩個人散吓步，尤如空中花園，當中最出名嘅係紅燈山，但路線並唔係由紅燈山開始。食飽飯後，可以步行到京士柏上配水庫遊樂場 ，內有舊式配水庫倉門。
廣華醫院曾於1911年喺何文田興建一座油麻地痘局，給予天花病人作院舍，該地亦曾被醫院申請安葬天花死者之用，惜於未夠10年即停用。何文田一地租俾台山電光炮廠，最終炮竹廠火藥庫爆炸釀成32死56傷，30年代前，何文田香港培正中學位置為日治時期嘅亂葬崗，其後後山被剷平。直到60年代時，該地為中國大陸難民嘅徙置區，近代先發展成住宅區。
第三站﹕ 東何文田配水庫遊樂場
到達紅燈山之前，先要經過東何文田配水庫遊樂場，內有大草地，曾經為棒球練習場，附近有緩跑徑，位置已經可望維港景色，不過一端較多屏風樓。
第四站﹕ 何文田上配水庫遊樂場 / 紅燈山
繼續前行即可以到達文田高地食水配水庫，既叫紅燈山，亦叫採石山，高約106米，啟德機場未封閉時，山上會發出紅色訊號燈，以防飛機撞山，整個路程可以極短時間完成，而紅燈山係較上述2個配水庫近民居，同時可俯視何文田新舊樓房，眺望土瓜灣市景、獅子山、舊機場跑道，甚至九龍東至九龍灣方向風景。
延伸閱讀﹕避山上人群！ 反其道而行登市區山 15分鐘到紅燈山山頂
第五站﹕ 馬頭圍配水庫遊樂場
最後一個何文田區內嘅配水庫遊樂場係靠近土瓜灣嘅馬頭圍配水庫遊樂場，靠背壟山，亦近民居，可見山坡、土瓜灣市景，景觀方面同紅燈山一樣，可眺望啟德、觀塘方向。
Budget（以兩個人計算）﹕
御勝牛 ——————————————— $130
馬頭圍配水庫遊樂場 ——————————————— $0
何文田上配水庫遊樂場 ——————————————— $0
東何文田配水庫遊樂場 ——————————————— $0
京士柏上配水庫遊樂場 ——————————————— $0
總數﹕ ——————————————— $130
Δ 版權為E.A.Two 兩個人醫吓肚所有，歡迎轉貼連結，勿全篇文章轉載
Δ 如果覺得我哋嘅介紹啱睇，就Like吓我哋Facebook啦！
ΔPlease Like & Follow & Subscribe /
歡迎讚好、追蹤、訂閱
