太子樓上悠閒咖啡室神秘蒲點 超驚喜法式肉凍+煙韌麻糬窩夫
身處太子繁華鬧市，要找尋平靜空間稍有困難，難以估到新世紀廣場旁邊隱藏一間悠閒樓上咖啡室，以有水準嘅意式、法式料理為主打，而下午茶環境更清靜，都算係區內一個神秘蒲點。
位處太子洗衣街嘅Jimmy’s Coffee & Kitchen，若唔刻意尋找，大概唔會步上呢幢商住大廈，室內地方唔大，裝潢上就係一間典型咖啡店。而店內有U形開放式廚房，乾淨企理，一邊有幾張餐枱，而窗邊則有一排高枱櫈，窗外望街道風景，都算係鬧市中一片寧靜，可歎個下午茶或一杯咖啡，安靜用餐而無人打擾。
據悉，店舖以低溫慢煮方式炮製美食以保留原汁原味，不過晚餐就真係晚餐價錢，悠閒下午茶有7款，價錢比較相宜，由Egg Benedict到Beef Tartare，雞翼、焗薯到牡蠣，今次編輯揀兩款比較吸引嘅款式，一款係法式凍批，另一款係麻糬窩夫，即使拍拖得兩個人去食都可以試勻鹹甜點。
叫得Mr E當然係揀E餐，為法式豬肉凍批$108，英文為France Pork Terrine，而Terrine就有法式凍批意思。以沙律菜、自家製麵包作伴碟，麵包外形略似法國小麵包，但麵包較軟熟，有咬口，發酵度充足，內裏塗有牛油，令麵包滲透出牛油香味。而法式豬肉凍批則係一款開胃前菜，凍批狀似果凍，入口冰涼而有膠質，將高湯凝結後就變成晶瑩剔透果凍狀，以半透明質感呈現餡料。果凍狀高湯內有豬肉絲，亦有紅蘿蔔絲，增添色彩同質感。
叫得Miss A當然係揀A餐，為朱古力雪糕配麻糬窩夫$88，英文為Waffles with Movenpick Chocolate Ice-cream，可轉雲呢嗱雪糕，擺盤打卡度十足。兩件窩夫上放有圓咕碌雪糕球，表面再淋上少量朱古力醬點綴，旁邊有水果沙律作點綴，包含木瓜、紅肉火龍果，都算巧花心思。格仔麻糬窩夫下午茶份量只有兩件，烘烤得有輕脆感，中間為煙韌麻糬，蛋香唔重，脆皮配麻糬心咬入口層次豐富，頂端有香甜Movenpick雪糕球，亦伴有一小杯蜜糖，相當甜蜜，而水果粒粒則帶出清新感。
每個餐兩個人配有兩杯飲品，可挑選餐湯或花草茶，當中花草茶表面份量唔多，但實際上足夠食完一份下午茶。Mint Jasmine為薄荷茉莉花茶，茉莉花味唔太重，但薄荷味十足，清涼而消滯：而Bathing Beauty則直譯作出水芙蓉，狀似沖涼用嘅沐浴球，茶味狀似紅茶多於綠茶，味道特別，一開始係清水狀，味道較清淡，但浸得愈耐味道愈濃，茶味帶甘。
E.A.Tips﹕
❷ 小店位於耀昌大廈內，正對伊利沙伯中學斜路入口。
❸ 留意上樓有鐵閘，需要撳門鐘，記得先按樓層，再按單位，即撳完1字再撳203，待確認後可以進入。
❹ 店內有最低消費，6點前$50，6點後$100兼加一。
❺ 一般下午茶供應時間12:00至17:00，免收加一服務費，配有是日餐湯或香草茶Herbal Tea，加$12配熱飲，加$18配凍飲，但唔包括手沖咖啡。
❻ 午餐有7款可擇，配有飯、意粉、馬鈴薯， 亦有是日餐湯或香草茶Herbal Tea，加$12配熱飲，加$18配凍飲，同樣唔包括手沖咖啡，供應時間12:00至17:00，免收加一服務費。
❼ 而晚餐於6點前會送香草茶兼免加一，但6點後就會收加一服務費，主菜加$48有沙律、湯、甜品、香草茶。
❽ 小店只收現金，記得帶足夠Cash啦！
耀昌大廈上樓 門口有咖啡店招牌 入閘後步行上樓梯 按1樓 出Lift轉左 留意有最低消費
Jimmy’s Coffee & Kitchen
- 太子洗衣街203號耀昌大廈1樓203室
- 星期一全日休息、
星期二至四 17:30 – 22:30、
星期五至日 12:00 – 22:30、
公眾假期 12:00 – 22:30
- 2380 2387
