太安樓起家！筲箕灣東大街人氣雪糕班戟暖笠笠法式甜品配涼浸浸雪糕球歎埋消暑雪頂茶飲啖啖舔舔脷

港島平價小食區嚟講，除咗西灣河太安樓，就係筲箕灣東大街，云云街頭美食匯集於小區內，當中東大街旁邊就有一間人氣甜品小店，即使店內有唔同款式甜品、小食，單靠一款已經俘虜唔少拍拖情侶甜品迷，小店將一款暖笠笠法式甜品配搭冰涼雪糕，再以班戟皮包裹，即管實試冰火交融嘅感覺，可以為夏天消消暑，不妨兩個人去探索吓。

呢間目前位處東大街旁小巷內嘅甜品店，原本於西灣河太安樓起家，結業後於2018年再搬到現址，繼續提供招牌甜品小食，包括多款口味嘅平價雪糕、千層蛋糕、雪糕班戟，更有茶飲等，鹹甜班戟應有盡有，以西式甜品為主，早已經於網絡爆紅，有指係來自日本原宿嘅焦糖燉蛋班戟。

店內最愛歡迎之作要數焦糖燉蛋雪糕班戟$32，齋睇已經知道打卡一流，頂端放置一件法式甜品焦糖燉蛋，底部預先放有一球雪糕，再以班戟皮包裹雪糕、焦糖燉蛋，的確係可以同一時間有多重口感，一羹羹放入口層次豐富。而雪糕口味可以自由選擇，當中豆腐味雪糕甜度唔高，比較配合偏甜嘅焦糖燉蛋，雖然雪糕食到一半會開始溶化，但至少唔係未食完燉蛋就溶晒。

暖笠笠嘅焦糖燉蛋配上涼浸浸嘅雪糕，冷熱交融，頂端焦糖面脆卜卜，帶有香甜味，燉蛋嫩滑，質感Creamy，有蛋香；而雪糕則相對黏身、軟滑，豆腐味甜度唔高，比較配合甜度較高嘅焦糖燉蛋，可中和吓味蕾；再加上日式班戟皮，啖啖煙煙韌韌，唔太厚底，班戟皮同燉蛋、雪糕中間好似有層忌廉之類嘅質感，不過班戟皮食到底會沾滿溶化嘅雪糕，三份一最後會濕晒，只係包裝紙無滲漏，成舊加埋其實幾邪惡。