來來美食
兩個人醫吓肚,  和你Taste,  小食甜品

大角嘴50呎微舖賣本土自家製特色街頭小食 必揀創意冬蔭公碗仔翅/香蔥酥餅

個人瀏覽過





大角嘴美食小店眾多,大多數舖面都有100呎以上,但當中就有一間樓底高而只有50呎左右空間嘅小食店,一方面售賣本土街頭小食,另一方面亦有創意小食,款式方面其實幾有誠意,值得拍拖兩個人去試一試。

呢間來來美食位於博文街,同旁邊舖位比較,面積特別細,粗略估計只係得約50呎空間,地方一眼睇晒。不過樓底就頗高,可以分作兩層,上層為老闆擺放雜物地方,下層就係炮製食物嘅地方,只係靠一道小梯分隔。

小食款式眾多,既有傳統燒賣、魚蛋、腸粉,亦有唔少特色小食,當中最難得嘅係現時比較少見嘅陳皮魚蛋,陳皮味香濃,配搭咖哩汁更惹味,腸粉則不過不失,腸粉套餐$15包3條腸粉、5粒魚蛋或燒賣,價錢都算平民。每個禮拜更會有唔同款式嘅飯、意粉,每份約$25至$45,都算係經濟型開飯之選。

特色小食可算用心製作,有韓式肉碎炒粉絲$30、泡菜煙肉卡邦尼洞庭烏冬$38、煎雞軟骨餃子$16/4隻、吉列炸蠔$18、炸燒賣$10/6粒、鰻魚串$15等等,更有自家製香蔥酥餅$35,當中編輯對日本帶子花膠冬蔭公碗仔翅$38 較有興趣,皆因完全無諗過泰式冬蔭公可以同港式碗仔翅二合為一。碗仔翅足料,配搭冬蔭公後變得辛辣,內有椒絲等配料,略有冬蔭公味,唔算好重,但就明顯有辛辣味,適合嗜辣之人。

其中一款自家製冰凍飲品有雪梨蘋果無花果水$15,標榜無糖,可有美顏、潤肺作用,相當健康,上手確實冰涼,底部有粒粒雪梨、蘋果,亦有無花果籽,入口清甜,可以解渴,夏日炎炎幾解暑。


E.A.Tips﹕

(1) 小店離奧海城只係約5分鐘步程,位置靠近西九匯,位於主打台灣菜嘅餐廳抬槓對面。

(2) 餐牌有中英文對照。

(3) 小食都係即叫即製,所以等候時間會較耐。


來來美食

大角嘴博文街7號地下A號舖
星期一至五 08:00 – 19:00;星期六 09:00 – 19:00;星期日全日休息
9799 8940

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!


Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!