【落雨好去處】雨天打亂Schedule？ 免費遊港九新界博物館打卡 做真藝文青認識歷史兼感受藝術文化

[sig_post_pv label=””] 個人瀏覽過

下雨天，往往都係打亂本來嘅Schedule，天氣轉差，缺乏藍天白雲嘅風景，行山泡湯，出海玩水又要取消，所有戶外活動都去唔成，只能諗諗拍拖遊走室內好去處，但兩個人落雨可以去邊？夏日炎炎，以最低成本嚟講，可以輕鬆逛逛嘅地方，除咗商場、超級市場，就係博物館、市集，夏天可以消暑，雨天亦可避雨，今次就講吓港、九、新界嘅展館，每一個基本上都可以免費入場，而部份於特定日子先有得免費入場，編輯提吓大家呢幾個落雨都可以去嘅地方啦！

九龍區﹕

香港歷史博物館

做一個偽文青好容易，只要睇吓藝術、文化最表層就已經係，而目前偽文青數量日益增多，大多數都係缺乏歷史範疇認知，要做一個真藝文青，應該要同時認識歷史、藝術、文化，三者絕對缺一不可，而且每一個範疇都要有深入了解。位於尖沙嘴嘅香港歷史博物館就可以認識吓本地歷史，包含部份考古發現、珍貴文物等資料，而香港歷史博物館前身就係香港博物美術館，其後將歷史、藝術分拆，最終香港歷史博物館由1998年正式開放，展館免費入場。當中 「香港故事」 為館內常設展覽，涵蓋香港歷史變遷、昔日民間風俗，內有文字介紹，亦有眾多展品、生動嘅立體造景，甚至多媒體劇場，Timeline由史前香港到90年代末，包括漢朝到清朝長遠歷史、香港割讓、開埠早年發展、日佔時期、香港被回歸後嘅現代發展，望住館內歷史記錄，最好要有個人獨立思考能力。

香港科學館

靠近香港歷史博物館嘅香港科學館，頂部有圓錐體塔、半球形塔，地方偌大，90年代初由英國雅麗珊郡主主持落成典禮。以科學為主題，趣味較多，比較適合小朋友進場，館內有眾多科學展品。當中科學館有唔少常設展覽，包括生物多樣性展廳、鏡子世界、地球科學廳、食品科學、能量穿梭機等。香港科學館一般係需要購票入場，人均$20，不過逢星期三就免費入場。

香港文物探知館

位處九龍公園內嘅香港文物探知館，內有古物古蹟辦事處，主要用作展示各種考古文物，不時有工作坊或講座，加深公眾對本土文物認識，館內免費入場。香港文物探知館前身為威菲路軍營S61及S62座，早於九龍公園興建年份，有過百年歷史，大門口銅門就來自拆卸重建前嘅第三代香港滙豐總行大廈。館內既有專題展覽，亦有常設展覽，包含保育文物嘅文物探索之旅，內有考古篇、文物建築篇，歷史可追塑至遠古時候。而香港文物探知館藏於九龍公園內，建築設計有英式風格，有如一個避暑山莊，外連一個戶外森林系露天茶座。

香港太空館

而香港太空館就靠近尖沙嘴鐘樓，香港文化中心，以天文展覽為主，外觀就以蛋形建築為標記，早期更狀似菠蘿包。館內宇宙展覽廳、太空探索展覽廳為常設展覽，香港太空館係需要購票入場，人均$10，而進入天像廳就需要$12至$24，但香港太空館逢星期三亦免費入場。

香港藝術館

至於香港藝術館就係近年比較多偽文青進入嘅展館，位置毗鄰香港太空館，館內本來藝術作品豐富，有藝術畫作、本地藝術家創作，以至古代文物、書畫古玩等，亦不時有唔同藝術展覽，可以免費入場，但部份展覽就需要購票入場。香港藝術館其實係來自香港博物美術館，該美術館其後將歷史、藝術分拆，最終演變為香港歷史博物館同香港藝術館，而香港藝術館於港島亦有一分館，碌埋落去話你知。編輯同Photog都依稀記得，早年遊覽香港藝術館嘅人都係好Pure好True，但目前遊覽香港藝術館嘅人都係以打卡為主，編輯有所疑惑，未知展館係咪為咗配合進場嘅觀眾，將展覽設計同展品都變得IG-able。

講到打卡，最多人拍攝嘅地方就係一整排正對維多利亞港嘅偌大玻璃牆身，既可睇幻彩詠香江鐳射燈光音樂匯演，亦可俯瞰望180度全海景。此外，館內頂層洗手間對出有一個地方大排長龍，唔知以為排隊去洗手間，事實上大多數人只係為咗一張以雪白雲朵設計嘅櫈，白雲櫈背後亦係偌大玻璃窗，亦可享維港海景，引得一眾偽文青入場純為打卡，但連一張櫈都要排隊影相，其實會唔會有啲荒謬？編輯本身都係支持影相打卡，一直以來都有帶大家去唔同地方影吓相、打吓卡，但影相同時應該要了解當中嘅事物，並非膚淺地Po上IG就算。

真人真事，編輯當日行逛上層其中一個展覽，展品頂頭寫有一個年份，而展品則為殯儀物品，打算思考點解奠之物品為放置於急救箱內，同年份、死亡有無關係，正於思考當中時被打斷，皆因旁邊突然有人坐低咗，以一個眼神望向編輯，而對面亦有人木口木面舉住手機等候，編輯恍然大悟，原來對方係要打卡，最後只能敗退，先離開現場讓人打卡。及後，編輯有所懷疑，何解係睇展品嘅人要讓路打卡嘅人，到底係睇展品嘅人阻礙打卡，定係打卡嘅人阻礙睇展品呢？剛才思考嘅問題，被打斷後已經不知所蹤。

港島區﹕

香港新聞博覽館

港島區中最值得留意嘅博物館要數香港新聞博覽館（Hong Kong News-Expo），於2018年尾落成，為免費入場，包含香港開埠至2017年嘅新聞媒體發展，包括早期報業，以致網絡媒體，但就未見有2018至2021年嘅後續事件。而新聞內容更包括2014年「雨傘革命」、2019年「反送中事件」，慶幸參觀之時仍舊為中立語句。博物館內更有互動專區，而地面嘅金句節錄亦值得深思。建築物則採用包浩斯風格，即係Bauhaus，已經被列為三級歷史建築。

延伸閱讀﹕Bauhaus風格豈止中環街市？ 中上環博覽館活化必列啫士街街市 直上半山探索童話式大宅

中環大館－古蹟及藝術館

位於中環荷李活道嘅大館－古蹟及藝術館，前身係中區警署，大館連毗鄰嘅域多利監獄、前中央裁判司署都為免費入場嘅香港法定古蹟，建築設計古典，當中前中區警署大樓就有3層樓高，而營房大樓拱形設計就有西方古典味道。活化後，公眾可以步入大樓、檢閱廣場、立方、洗衣場、審判室等，甚至監獄鐵窗內貌、監獄操場，曾於2019年獲得聯合國教科文組織亞太區文化遺產保護獎卓越獎項殊榮。而館內嘅17座F倉連接賽馬會藝方螺旋狀樓梯就係唔少公眾嘅影相位，事實上館內係經國際知名建築師事務所赫佐格和德默隆設計， 用作現代藝術展覽、藝術空間。

PMQ 元創坊

上環PMQ元創方係近年一個創意藝術中心，前身係荷李活道已婚警察宿舍 ，被列為香港三級歷史建築，歷史遺跡經過活化而變成現時嘅藝術地帶。PMQ中央有通道連接2座大樓，每層兩端都設有洗手間，場地不時舉辦展覽活動，免費入場，而每個小房間亦有唔少本地藝術家租用。PMQ建築設計古舊，包含石級、石牆、石柱，而窗門以鐵為主，樓梯更採用鋼架，一般人更可以去4樓平台作休憩地。PMQ位處中上環，可以乘搭中環至半山扶手電梯，再沿士丹頓街走，較為減省腳骨力，最好行完大館先去PMQ。

孫中山紀念館

離上環PMQ元創坊不遠處，可以找尋一間童話式大宅，而事實上港島區半山位置就隱藏呢座帶有古典風格嘅英式建築物，係一座紀念一代革命家、中華民國國父孫中山嘅孫中山紀念館。而大宅以愛德華時代建築風格設計，古典味十足，有如時空穿梭，屬香港法定古蹟，前身為何東胞弟何甘棠嘅住宅甘棠第。館內有歷史見證，常設展覽為孫中山與近代中國、孫中山時期的香港，可免費入場。而室內保留有迴旋柚木樓梯、壁爐、扶欄，樓梯旁邊亦有彩繪玻璃窗，弧形設計嘅露台相當有特色，可外望堅道風景，拱形木門配搭復古瓷磚，加上希臘巨柱，同大廳內嘅金碧輝煌感覺構成對比。距離孫中山紀念館僅5分鐘步程，可以到達香港醫學博物館，但人均需要$20入場費，館內有大量醫學知識、病毒介紹、醫學歷史發展。不過，入場需要注意展品係唔可以拍攝，步入每個大廳時謹記要收起相機功能呀！

延伸閱讀﹕上環愛麗絲城堡花園旁尋逾百年殖民時代建築 醫學博物館連中藥園尋寶 紅磚牆小巷穿越澳門巷弄

延伸閱讀﹕遊走中上環只識行大館？ 帶你去半山童話式大宅 一條路線睇三種古典建築

茶具文物館

至於茶具文物館就係剛才提到嘅香港藝術館分館，前身其實係駐港英軍三軍司令官邸，被稱為旗桿屋，位處香港公園內，為一個免費入場嘅展館。茶具文物館採用希臘復興式建築風格設計，帶有西式風格，屬香港法定古蹟。茶具文物館內展出各種茶具、茶藝文物，包含唐代至今嘅茶具，甚至中式陶瓷，館內不時有茶藝活動、展覽，推廣茶藝文化，當中茶具文物館內就有一座羅桂祥茶藝館，為愛好飲茶嘅情侶拍拖好去處。館內展品可以拍攝，因為展品係屬於分館，不過樓梯、走廊位就唔可以拍攝，記得留意啦！

香港電影資料館

以港島區博物館嚟講，香港電影資料館係離上述幾座博物館較遠嘅地方，資料館位處港島東近西灣河，4層樓高展館保留本地電影資料，當中有修復、保存、展覽，包含小型電影院、展覽廳、資源中心/圖書館、冷藏片庫、修復室。而館內更有保留唔少電影劇照、劇本、海報、原聲唱片、影片特刊、合約文件、電影獎座、道具等，方便香港人回憶返舊時嘅港產片，一般入場係免費，但如果租用影片就需要付費，分為日費、年費。由90年代初經市政局籌備到成立至今，曾加入成為國際電影資料館聯盟（FIAF）成員，同其他國家交流、分享保存、修復經驗。館內有小型戲院、圖書館，不時更有電影藝術展覽，電影迷可以去睇一睇。

新界區﹕

南豐紗廠

講到南豐紗廠，已經係一個經歷晒熱潮同冷卻嘅地方，場內由藝文空間變成遍佈偽文青嘅地方，再講已經只係一粒微塵，編輯都已經有啲唔想再打落去。南豐紗廠位處荃灣，原為一間生產力高嘅紡織廠，其後變成貨倉，最後於2014年進行活化工程，2018年變成文代藝術區，工作、休憩並重，唔少初創企業、本地藝術家都曾租用，包含本地小店，場內免費入場。活化後，保留有紗廠特色建築，包括綠色油漆髹成嘅牆身，古舊鐵框窗戶、鐵閘、樓梯，甚至洗手間外嘅紅白格磚牆都吸引唔少人打卡，另增設玻璃幕牆，而門口南豐紡織有限公司字樣亦粉飾過再保留，曾獲得多個建築獎項。記得走入南豐紗廠時，開一開良心地圖睇睇，幫襯返自己覺得優良嘅小店呀！

香港文化博物館

最後走到位於沙田嘅香港文化博物館，一程巴士即可以從荃灣去到沙田市中心，相對其他展館，內容上涵蓋範圍較廣泛，同時有歷史、文化、藝術，有足足12個展覽館，為全港最大博物館，而香港鐵路博物館、三棟屋博物館、上窰民俗文物館都為香港文化博物館嘅分館，基本上香港文化博物館可以免費入場，但部份展館需要$10入場費，逢星期三就免費入場。館內唔同展覽活動，當中常設展覽就有瞧潮香港60+、金庸館、兒童探知館、粵劇文物館、徐展堂中國藝術館、趙少昂藝術館，甚至武‧藝‧人生──李小龍展館。

---

---

---