新蒲崗廣場泰日餐廳Crossover 隨時邊食丼飯邊歎冬蔭公

[sig_post_pv label=””] 個人瀏覽過





新蒲崗雖然係一個小區,但其實潛力幾高,從編輯個人記錄嘅地圖可見,餐廳小店比比皆是,每間都係街坊價錢,但又有水準,參差嘅小店唔多,即使係水準唔高嘅餐廳亦可以接受,當中新蒲崗廣場就有一間二合為一嘅店舖,一次過滿足同時想食日本菜、泰國菜嘅朋友。

同一間舖頭內,一邊係好運泰國美食,另一邊則為拾う月,貌似風馬牛不相及,但其實兩間小店係共用空間,由年輕人主理,平常人可以同時點選日本餐或泰國餐。如果拍拖情侶對食乜有唔同睇法,兩個人想食唔同菜式,走入呢種餐廳就Fit晒。

最吸睛嘅地方係門口有一個超大魚缸,養有一群熱帶魚,有海底奇兵伴食,別有一番風味。一邊有日本風格裝飾,包含日本傘、櫻花佈置,另一邊則有大象、泰王掛畫、泰式裝飾。店員同時遞上兩張餐牌,一邊寫住魚生丼、親子丼、雞扒丼、鰻魚丼、燒肉丼、海鮮丼,每碗$62起;另一邊就有泰式海南雞飯、香葉肉碎飯、泰式船河,菠蘿炒飯等,尚算平民價錢。

當中泰式濕粉河$66,配料可選豬、牛、雞或海鮮,份量唔少,茨汁濃稠,配料充足,包含芥蘭、秀珍菇、紅蘿蔔等,表面有麵豉粒,河粉順滑入味,牛肉稍有韌度,但可入口,味道其實唔錯,不過珠玉在前,濕炒牛河都係錦田嗰間泰國菜餐廳最惹味。



冬蔭公湯粉$59 則可選擇蝦、豬肉丸、牛肉丸、雞、豬頸肉或海鮮,另可揀河粉或金邊粉,金邊粉不過不失,辣度有小辣、中辣、大辣,小辣口味都唔算小,皆因係愈食愈辣。冬蔭公味略帶酸甜,酸辣味稍重,有秀珍菇、小蕃茄、芫荽,豬頸肉肉質較乾柴,但唔肥膩。冬蔭公口味並非完全正宗,反而係貼合港人口味嘅冬蔭公,而非泰國正宗冬蔭公般重香料味。

其中一款小食有泰式炸蝦餅$24/4件,香脆度唔高,只係輕脆,擺多陣會淋,略嫌厚粉,蝦味比較少。而秘製特飲為香茅檸檬茶,有香茅味,有檸檬味,茶味就無乜,反而檸檬味帶出嘅清香味似洗杯後嘅味道。


E.A.Tips﹕

(1) 由新蒲崗廣場乘扶手電梯上2樓,轉右,向後邊走,兩間店舖都位於角落位置。

(2) 可以同時叫日本菜同泰國菜,唔會有衝突。


好運泰國美食

新蒲崗祟齡街33號新蒲崗廣場2樓C38號舖
12:00 – 22:00
2369 0738

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!