港島海逸君綽酒店下午茶

環瞰270度全海景添情調! 北角海逸君綽酒店歎限定龍蝦主題四重奏下午茶

[sig_post_pv label=””] 個人瀏覽過





港女下午茶愈來愈多,由酒店到茶餐廳,都推出三層架下午茶,目的為吸引少女們邊食邊打卡,但事實上識揀嘅人唔係太多。如果心血來潮想食酒店級港女下午茶,身為本地人就當然要做一個識得揀「好味」嘅酒店,以下呢間北角酒店最近就推出咗一款四重奏下午茶,亦係一間可支持商家,酒店更有270度無敵大海景,無論拍拖去食定同閨蜜去Girls’ Talk都好適合!

位於北角嘅港島海逸君綽酒店,室內樓底極高,完全零壓逼感,最近有一款四重奏下午茶 Quartet Afternoon Tea Set,鹹甜點合共有10款,今次港女下午茶有別於平常嘅三層架下午茶,反而將所有鹹甜點平放於枱面,食嘅時候更方便。

餐廳位處頂層,主要嘅兩邊用餐地方可享逾180度全海景,另一邊亦外連露台,合共有3面環形偌大玻璃窗,坐擁270度無敵大海景!從一面面寬闊大窗戶觀望,可享維港靚景,由啟德跑道公園環瞰至尖沙嘴方向,更可眺望九龍山景,如獅子山,從九龍東望到香港島,俯視整個維多利亞港,景觀極遼闊,坐到5點左右可以觀賞埋日落紅霞,絕對係一間食靚景多於食餐點嘅酒店下午茶,感覺悠閒。

四重奏下午茶以龍蝦為主題,Savories 鹹點比較出色,大部份均都配有龍蝦肉,餡餅點心有4款,配搭魚子醬、草莓、芒果等,有指為提供4倍滿足感。鹹點包括有鱘魚魚籽醬配蒸蛋蟹腳沙律煙三文魚配蛋白鬆餅鱘魚魚籽醬配酸忌廉龍蝦草莓沙律杯炸龍蝦球配黃薑蛋黃醬,當中最搶眼係另外上枱嗁龍蝦草莓沙律杯,底部有草莓粒、蒟蒻粒,少量醬汁帶酸甜味,幾開胃,杯內有大隻龍蝦鉗,賣相一流,龍蝦肉算大隻飽滿,有蝦肉鮮甜味。而煙三文魚配蛋白鬆餅則比較簡單直接,頂端有魚籽醬,煙三文魚底下為pancake,非常的骰,似足finger food;鱘魚魚籽醬配蒸蛋蟹腳沙律頂端有蛋白、魚籽醬,中間為蟹肉沙律,下面為餅底,略有驚喜;最後有炸龍蝦球配黃薑蛋黃醬,香脆度唔算太高,但底部有青瓜減膩,餡料佈滿龍蝦肉,蘸上蛋黃醬幾滋味。

至於Sweets 甜點有6款,包含芒果忌廉泡芺草莓瑞士卷提子鬆餅草莓芝士蛋糕芒果意式奶凍杯芒果杏仁撻,當中最吸睛、最有少女心嘅係粉紅色草莓瑞士卷、鮮紅色草莓芝士蛋糕,前者質感軟腍,甜度唔高,後者則較精緻,內有芝士香,質感軟綿,伴有士多啤梨香甜味,兩者頂端重有士多啤梨點綴。而芒果系列有芒果意式奶凍杯芒果忌廉泡芺芒果杏仁撻,其中芒果杏仁撻、芒果忌廉泡芺都唔錯,唔太甜膩,泡芺內隱藏芒果粒幾有創意;而芒果意式奶凍杯就較一般,雖然最多芒果粒,但水份較多,唔夠立體。



而Afternoon Tea必備之物要數Scone鬆餅,今次鬆餅為提子鬆餅,鬆餅內有提子粒,表面有一層厚朱古力醬,帶有香甜味,不過就比較奇怪,似乎同英式鬆餅唔太配合。鬆餅稍為遜色,比較乾身,不過配有Clotted Cream之餘,亦有2款果醬,一款為士多啤梨味,另一款為柚子味,前者味道麻麻,後者則較清香。

每人可配即磨咖啡或茶,比較配合英式下午茶嘅係Earl Grey,即伯爵茶,紅茶中有啖啖柑橘香,熱茶可幫助解膩,令鹹甜點更容易消化,熱茶為TWININGS茗茶茶包,絕對唔意外。


E.A.Tips﹕

(1) 下午茶供應時間為15:00至17:00。

(2) 於KKDAY預購港島海逸君綽酒店Harbour Grand Hong Kong四重奏下午茶可享有85折優惠,一個價錢兩位用,換領日期為2021年5月1日至7月31日,只可當日時間兌換,逾期失效。而下午茶有指延長至9月,最好事前先打電話確認一下。

(3) 原價為$338/1個人,而星期一至五為$538/兩個人,星期六、日及公眾假期則為$588/兩個人;而85折後星期一至五為$458/兩個人,星期六、日則為$500/兩個人,另收加一服務費,但10%服務費就食完埋單先俾。

(4) 一如往常只有咖啡或茶,加$175有香檳一杯。

(5) 其他方式預訂可以致電2121 2693或電郵到le188@hghkcatering.com。


(6) 港島海逸君綽酒店離油街實現只係1分鐘步程。


(7) 歎下午茶適合飲熱茶,比咖啡好,一來解膩,二來可無限添茶。


(8) 酒店餐廳職員服務好好,可以放心Book枱。


Le 188° 餐廳及酒廊

北角油街23號港島海逸君綽酒店41樓
12:00 – 14:30、18:30 – 22:30
2121 2693

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!


Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!


在〈環瞰270度全海景添情調! 北角海逸君綽酒店歎限定龍蝦主題四重奏下午茶〉中有 1 則留言

留言功能已關閉。