禮頓山古典復興教堂登一級歷史建築銅鑼灣鬧市秘道通往避風塘

[sig_post_pv label=””] 個人瀏覽過

銅鑼灣鬧市不單止係購物中心，又或係美食區，其實識搵一樣可以都搵到鬧市中嘅淨土，先睇吓一座古典復興教堂，再找尋秘道通往海旁，感受鬧市中避風塘，適合拍拖情侶到鬧市散步，順道兩個人去打吓卡。

先由銅鑼灣前往跑馬地禮頓山，於銅鑼灣考過車牌嘅朋友相信對禮頓山唔陌生，而一座充滿古典復興主義嘅聖瑪加利大堂就離樂活道電車站只有1分鐘步程，電影《天若有情》曾於教堂取景拍攝。聖瑪加利大堂為天主教教堂，現時係一級歷史建築，亦係首座教堂以聖女瑪加利大為名。

教堂建築設計出自意大利設計師，採古典復興主義，教堂內有哥德式石柱、拱形天花，盡頭有半圓形聖所，旁邊有彩繪玻璃窗、螺旋石級。而今年初教堂教堂捲入是非當中，教堂神父因捐款問題責備年青人後輩坐享其成，受到大眾爭議。

折返銅鑼灣，找尋世貿中心於告士打道嘅出口，然後轉左，會見到有一道小巷，第一個門口寫有「此梯只通往B2車場」，而再前面嘅門口就寫住「前往午炮或香港遊艇會」，由此門口向下行，穿越地底白色隧道，經過B1停車場，沿指示牌朝午炮、香港遊艇會方向走，一直走到盡頭，通道人流較少，指示牌寫有「怡和午炮」，到達盡頭後上樓梯，就可以到達銅鑼灣避風塘。

事實上，銅鑼灣避風塘係維多利亞港中一個重要避風塘，經歷多次本地填海，靠近維多利亞公園，而避風塘對出有唔少船艇，包括香港遊艇會嘅遊艇。而銅鑼灣避風塘全盛時期最出名係曾提供避風塘炒蟹，其中一艘為海上天后廟漁船，而一般人可以乘搭舢舨、街渡往來天后廟或前往銅鑼灣燈塔，前往防波堤堤壩。

銅鑼灣避風塘東面為東區走廊，沿岸亦係觀賞日落晚霞嘅好地方，從水平線觀望避風塘海景，有別於俯視角度，而避風塘位置人流唔多，只係間中有釣魚客，冷冷清清，但既可望維多利亞港、灣仔會展、中環IFC，亦可眺望尖沙嘴、紅磡，夕陽斜照，海面船隻添上暮色，呢個鬧市中神秘漁港可算為逆境中一個避風港。

E.A.Tips :

(1) 乘搭跑馬地方向電車可於樂活道落車，離聖瑪加利大堂僅1分鐘步程，而巴士路線1, 117, 19, 30, 967X 亦可到達聖瑪加利大堂。

(2) 銅鑼灣避風塘位置偏僻，需穿過小隧道，只需找尋世貿中心於告士打道嘅出口，然後轉左，會見到有一道小巷，第一個門口寫有「此梯只通往B2車場」，而再前面嘅門口就寫住「前往午炮或香港遊艇會」，由此門口向下行，穿越地底白色隧道，經過B1停車場，沿指示牌朝午炮、香港遊艇會方向走，一直走到盡頭，通道人流較少，指示牌寫有「怡和午炮」，到達盡頭後上樓梯，就可以到達銅鑼灣避風塘。

(3) 如要去銅鑼灣燈塔，需要乘街渡前往，每人$15/程，船程約5分鐘，需向舢舨船家示意。

(4) 若前往燈塔，離開時可經香港遊艇會離開，可以唔使坐船，然後折返世貿中心，但去程則會被看更截停。