2021-08-03

上水安圃村季夏搶眼小黃菊花海 原野羊群恍如港版清境農場 直闖日式藤原豆腐店打卡兼遊新田魚塘觀鳥睇日落【2021賞花地圖】

上水安圃村季夏搶眼小黃菊花海 原野羊群恍如港版清境農場 直闖日式藤原豆腐店打卡兼遊新田魚塘觀鳥睇日落【2021賞花地圖】

個人瀏覽過





唔係「爆菊花田」,係「爆菊.花田」。最近改篇自日本作品嘅本地劇集《大叔的愛》風靡一眾觀眾同網民,就連傳統幾百部電視機計算出嚟嘅收視率都節節上升,恍惚愈來愈多人鍾意食「菊花黃瓜飯」(有BL之意),電視機有爆紅嘅菊花之戀,現實中大家一樣可以喺香港搵到一大片「爆菊」花海,今次編輯就帶大家找尋呢片爆紅菊花啦!

踏入7月季夏,到戶外走走兼親親大自然的確可以解除悶熱狀態,新界山野間就有一片鮮黃色小野菊花海,一朵朵野菊花靜悄悄生長,正於盛開狀態,並非如平常街邊狹縫中嘅野菊花般只有寥寥數朵,而係遍佈田野之間異常密集,位置有足球場咁大,恍如小仙女置身仙境當中。

由上水廣場乘搭巴士路線77K可直達粉錦公路安圃村村口,附近可見香港高爾夫球會球場,由村口沿鄉間小路走,直至到達松仔園花田位置,步程只係約15分鐘,而松仔園本身係由於早年種植馬尾松而得名。若由上水廣場直接步行前往松仔園,步程就需要約30分鐘,路段自由選擇。

小黃菊向來繁殖快速,而且生命力強,鮮黃花田配合大草原後,色調黃黃綠綠,鮮艷奪目,低開小黃花亦可構成花海,充滿田園風,置身花海場景更夢幻,離遠望點點黃菊配合藍天白雲更唯美,漫天黃花似足日本宮崎駿動畫內嘅場景,非常震憾。

黃色野菊花雖然好搶眼,最啱打卡,但編輯覺得比小小菊花更吸睛嘅係草原間有四五十隻羊群於村內草原間遊走,數目恍惚數之不盡。雖然安圃村內嘅羊群係草羊而唔係綿羊,但場面完全唔似香港地區,有如台中清境農場,羊群當中有黑羊、白羊、暗黃羊,甚至黑白相間嘅斑馬羊,草羊遍佈田野間,配合小黃菊花海絕對係期間限定之作!

      

離開松仔園黃菊花田,前往寶石湖邨、彩蒲苑方向,轉乘巴士路線76K前往新田購物城,找尋神還原日本藤原豆腐店嘅經典動漫及電影《頭文字D》場境,而側邊更有投幣式汽水機,像真度十足,有如拍攝旅行照片,可以打卡。而藤原豆腐店不時有唔同新車,係唔少車迷嘅朝聖地,店內並非賣豆腐,而係賣雪糕,甚至攝影服務,不過幫襯與否就…自己諗啦。

現場所見,電影內藤原拓海經典賽車AE86毫無影蹤,令場景大為失色,絕對要扣分,反而藤原豆腐店旁旁有大量小朋友駕駛電動車放電,有如迷你版《頭文字D》,甚有趣。不過,電動車店只限星期三至日,皆因逢星期一、二休息,只有星期六、日先會見到大人版、小朋友版《頭文字D》場景同時出現。

新田購物城位置較為偏遠,靠近落馬洲公共交通轉車站,故目前人流較少,但內裏仍有少量店舖。而由新田購物城側門離開,可以轉而前往新田魚塘睇吓日落,魚塘地方偌大,同時可以作觀鳥用途。而當魚塘放水時,池水褪去,加上陽光曝曬下,會令魚塘底部出現龜裂般嘅菠蘿包紋理,有如隕石坑,配合對面一幢幢摩天大樓更會尤如未來城市。不過,呢個放水乾塘場景僅為期間限定,編輯當日見到魚塘滿佈池水,未能拍攝乾塘畫面。

新田魚塘環境清靜,地方偌大,一河之隔為深圳城市,人跡罕至,雀鳥飛翔,可以觀鳥,亦可以睇日落。魚塘旁邊有幾間水上棚屋,亦有池邊椰子樹,可作拍攝素材,比拍拖散步更適合嘅係兩個人踩單車去。


E.A.Tips :

(1) 上水松仔園菊花田位置靠近安圃村,由村口一直向內行,走到近盡頭位置就會見到一片片花田。

(2) 乘搭巴士路線77K於安圃村落車,會往來粉錦公路(丙崗)至元朗(鳳翔路),經過哥爾夫球場後就可以撳鐘準備落車,由上水起步,車程僅約10分鐘,從巴士站折返,安圃村村口離巴士站只係半分鐘步程;而乘搭小巴路線57K則於瑕公地站落車。

(3) 由村口步行約5至10分鐘,經過安圃村公廁、蝦公地、汽車維修中心,好快就可以見到有菊花田,不過編輯建議繼續向內走,盡頭可以搵到更大嘅菊花田,步程約15分鐘,位置可見松仔園指示牌。

(4) 入村無需入場費,而村民亦算和藹,容許大家入村,不過每一塊花田都有無數白底紅字告示牌,寫明「不准進入」、「勿隨處亂拋口罩及垃圾」,謹記唔好踩入花田範圍,其實花田之間有石屎路可以行走。

(5) 松仔園花田好大,隨意走一圈可以環繞花田,唔需要刻意睇地圖搵邊個影相位,隨心拍攝,同時謹記愛惜花草,唔好採摘、破壞,自己垃圾自己帶走。

(6) 花田遍佈小野菊,蚊蟲較多,草蚊繁多,注意會有蚊釘蟲咬,最好穿著長袖衫褲,勿穿露趾鞋,預先做足防蚊措施。

(7) 由上水廣場為起點,亦可以步行到安圃村松仔園,穿過彩蒲苑、粉嶺公路,經粉錦公路,沿丙崗方向走,會經過北區醫院,由保健路轉入丙崗路,經過祥龍圍邨、風采中學,前行約15分鐘,最後到丙崗村、丙崗兒童遊樂場,經過丙崗村公廁,就會直接去到松仔園最大嘅菊花田。

(8) 山草羊並非經常出沒,大概下晝1點半,會見到牧羊人放羊,帶住羊群散步、食草,場面比花田更壯觀。

(9) 藤原豆腐店位處新田購物城內,可進入門市購物,亦有攝影套餐,不過就毫無立場。

(10) AE86車似乎唔係成日喺藤原豆腐店門口,目前所見已經換走咗,編輯覺得唔係太值得前往打卡。

(11) 網上有報道話由新田購物城前往新田魚塘只係行2分鐘,實際上2分鐘係車程,若步行而至,至少10分鐘。沿新田村路走,唔好前行至惇裕路,繼續沿新田村路走,地圖上有魚塘藍屋,但實際上左邊路段係被圍封去唔到,只能睇右邊魚塘。

(12) 無論安圃村松仔園附近,定新田魚塘,都有惡犬(至少對怕狗嘅編輯嚟講係),所以要特別小心,盡量只走到適當地方就好停止,免生意外。


(13) 至於幾時係拍攝小黃菊花田嘅最佳時間,朝早光線較柔和,而下晝同黃昏就較金黃,純粹睇個人喜好。


(14) 小黃菊較低開,與人合影唔太容易,一係Top Shot,一係人蹲低拍攝。


(15) 新田購物城每小時泊車$10,而買滿$100有3小時免費泊車優惠。


安圃村

上水

藤原豆腐店 Fujiwara Tofu Shop

新田購物城C17號鋪
星期一至五休息,星期六、日 10:00-19:00

新田魚塘 Fujiwara Tofu Shop

新田村路

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook啦!
ΔPlease Like & Follow & Subscribe /
歡迎讚好、追蹤、訂閱

       

深水埗大南街咖啡店共享空間 設計藝廊真係值得睇?
【英國偽旅行】本地4個必去英式庭園 英國文學作品場景/海拔最高公園/法定古蹟遍佈港九新界
【美國偽旅行】穿越邁亞密探索海量棕櫚樹 港版千島群島景觀開揚 爽歎美式口味漢堡Comfort Food
【歐洲偽旅行】本地挪威式小花園/城堡打卡 歐式別墅前臨靜謐沙灘 無敵海景盡曬日光浴
青馬橋底睇日落!青衣西草灣賞景打卡秘地 細山步行徑近三支香談心好地方
【意大利偽旅行】穿越「東方威尼斯」 感受香港水鄉小島風情 兩大賞景地眺黃昏夕陽
錦田高埔村天空之城離市中心僅1公里 No Boundary姊妹店HOLA Chill住歎加料厚多士
【澳門偽旅行】迷你葡萄牙羅卡角海岬/倒模路環彩虹屋打卡 歎地道澳門豬扒包兼暢遊黑沙海灘
【泰國偽旅行】港島迷你泰式小屋打卡 海邊恍若峇里島度假 歎過江龍正宗船麵
驚現男團Mirror/Error主題月餅!中秋黃金月餅巡禮2021最完整名單!即睇港九新界連網店月餅預訂攻略!
【台灣偽旅行】遊走新界3大壁畫村 歎地道肉焿湯/台式牛肉麵
【日本偽旅行】全港5個本地「日式庭園」 秒到鳥居/神社/繪馬/動漫場景打卡
超隱秘!素肉骨茶湯底!荃灣巷弄素食車仔麵$50有找 24款純素/蛋奶素車仔餸任揀
消失的「萬壽無疆」? 旺角懷舊東方色彩工業風咖啡店五金味重
入場有限制!大埔慈山寺偽旅行驚現仿日本神社御手洗 必睇全球第2高巨型純白觀音像
瞰鋼線灣景色!穿梭山頂至薄扶林水塘尋港版《千與千尋》場景 新哥德式風格大學堂/伯大尼教堂打卡 薄扶林村都有秘地?