西貢小黃屋前身係村校 1小時遊客家小島鹽田梓？ 15分鐘船程訪碩果僅存曬鹽場

[sig_post_pv label=””] 個人瀏覽過

踏入初夏，氣溫上升，汗流浹背嘅行山路線理應需要減少，隨之而來嘅係拍拖到小島遊覽同海上活動，而西貢就有多條路線通往多個小島，船程只需15分鐘嘅客家小島鹽田梓就係其中之一。相對長洲、南丫島，鹽田梓人流比較少，可以兩個人到訪全港碩果僅存嘅曬鹽場、教友村，有指鹽田梓係可以極速走完一圈嘅小島，今次編輯實試由每日最後一班船次出發，睇睇網上資訊係咪真係咁準確？

延伸閱讀﹕推介即切新鮮火腿！西貢隱藏版麵包店屹立逾10年拳頭Size鬆餅連高水準麵包件件紮實超飽肚（不斷更新～）

到達西貢碼頭之前，不妨先探訪一下市中心內一間小黃屋，全座建築物以黃色為主調，內裏操場石礜繪有少量壁畫。建築物上寫有「萬宜灣村文娛康樂中心」，但門口舊牌坊上寫住嘅係「西貢萬宜灣鄉立學校」。

原來原址的確係一所村校，只係現時已改為「萬宜灣村文娛康樂中心」，村校於1963年建立，由西貢爛泥灣村搬到西貢墟，校內環境清幽，遍佈綠林，惟最終於1995年被殺校。而西貢萬宜灣鄉立學校最終與育賢學校、西貢公立學校、新聯學校、魚類統營處西貢小學聯乘，將5間西貢區村校結合，創立西貢中心李少欽紀念學校，該校校徽有堅毅、與時代並進、自由、高贍遠矚、海闊天空任翱翔之意。

從西貢公眾碼頭旁邊街渡碼頭乘搭街渡，可前往鹽田梓，內有鹽田梓村，島上最特別之處除咗擁有全港全港碩果僅存嘅曬鹽場，全村村民均為天主教教徒，所以外界一直稱鹽田梓村為「教友村」。坊間對「鹽田梓」有多個講法，官方紀錄、Google地圖稱之為「鹽田仔」，而今次「鹽田梓藝術村2021」活動又寫為「鹽田梓」，英文譯音一般為「Yim Tin Tsai」，而更特別之處係街渡上嘅英文譯音則為「Yim Tim Tsai」。有指係由於陳孟德夫婦稱為「鹽田梓」，而「梓」有鄉里意思，但其客家話口音則被村民聽錯為「鹽田仔」。

搭正3點，於西貢每日最後一班往鹽田梓嘅官方街渡，15分鐘即到達鹽田梓碼頭。落船後，穿過一排彩色風鈴可到達鹽田梓辦事處、鹽光保育中心，已經有負責人告知鹽場已到最後一節，最終編輯未參觀其他地方前就先急急腳前往鹽場。鹽田梓本來就係一個有鹽田嘅漁村，村民以曬鹽工作為生，高峰期有1200人居住，但1998年後已無人居住，小島歷史可追溯至逾300年前。

先從鹽場觀賞鹽田、了解曬鹽工序，得悉昔日村民自設鹽田、水閘，控製海水進出，利用天然地理環境製造曬鹽好地方，有興趣亦可以到碼頭附近嘅辦事處購買本地製造海鹽呢！而鹽田梓內保留有唔少建於50年代嘅客家村屋，現時已經荒廢，島上雖然人去樓空，但可以從充滿歷史痕跡嘅客家村屋窺探舊日風景。

離鹽場不遠處有一座改建為「鹽田梓文物陳列室」嘅「澄波學校」、「聖若瑟堂」，當中聖若瑟主座教堂更加係鹽田梓嘅地標，以羅馬式建築設計，純白牆身實而不華，內有彩繪玻璃窗、聖母像等，莊嚴肅靜，現為香港二級歷史建築；而澄波學校原為村內唯一學校，由1846年建立至1997年停止辦學，目前轉為展覽室，展出舊有課室、工業、農業、日常生活，可以找尋舊日足跡，了解昔日客家文化。

鹽田梓海拔最高僅約37米，經過活泉井後，繞圈而走可以到訪全黃色雙子亭，涼亭為鹽田梓最高點，一邊望滘西洲高爾夫球場、另一邊望西貢景觀，夏天時更可以觀望從西貢出發遊船河嘅男男女女，甚有趣。

然後前往連接滘西洲嘅玉帶橋，構圖獨特，將大海分成兩邊，有如摩西分紅海，海岸位置亦可望紅樹林沼澤景觀。雖然近3年都舉行「鹽田梓藝術節」，以天、地、人為主題，感受藝術、大自然，包括鹽場旁邊嘅《鹽光之所》等，不過編輯對島上嘅藝術裝置無乜感覺，反而更欣賞真實嘅大自然風景，以及玉帶橋上嘅真正木材工具。

另外，鹽田梓內有一座香港女童軍總會專用露綺莎渡假營，內有燒烤場；而碼頭附近更有少量餐廳、茶座，可以品嚐客家茶粿、柴火土窰雞；唔少人更會專程前往鹽田梓大玩獨木舟、趴艇。不過今次實試發現3點出發嘅船次其實係唔足以走完鹽田梓每一處地方，而且每個地方都唔能夠停留太耐，網上資料確實不能盡信。如果要認真環島遊，絕對唔可以乘搭最後一班船次，除非你只想以走馬看花方式打個卡。

E.A.Tips :

(1) 於西貢碼頭乘搭街渡可以往返鹽田梓碼頭，一般有好幾間選擇，但官方街渡為鹽田梓街渡售票處，就靠近洪記海鮮酒家，每位$60，會包含來回街渡船飛，憑票可參觀曬鹽場、文物室、聖若瑟小堂、亦有島上地圖，若純入場費就要人均$20。而其他街渡只係$50，但就只限船飛，同時要捐$20參觀費以作營運之用。

(2) 從西貢碼頭乘搭街渡到鹽田梓碼頭，船程僅約約15分鐘。

(3) 留意官方船期時間表，由西頁碼頭開出嘅街渡每小時會有一班船，每日由朝早10:00至15:00都有；而從鹽田梓碼頭返回西貢碼頭，每日船次時間為12:20、14:20、16:00、17:00，除非人流眾多，先會加開班次。

(4) 由2019年起至今年7月16日，都會有「鹽田梓藝術節」，為期3年，詳情請參閱官方網站。

(5) 由彩虹邨對面搭乘綠色小巴路線1A，可以到達西貢市中心，車程大概為30至40分鐘。

(6) 留意鹽場為有限度開放時間，星期一至五限11:30、14:30、15:30，而星期六、日、公眾假期則限10:30、11:30、13:30、14:30、15:30。

(7) 去到小島，謹記自己垃圾自己帶走，即使只係一張紙巾或一個口罩，都唔好留低於小島上。

(8) 15分鐘可以從碼頭步行入村，1小時至1.5小時以走完一圈，而且全程為石屎路，但都要注意準備充足糧水。