大潭廢堡+赤柱廣場沙灘

勇闖港版吳哥窟尋大潭廢堡「天空之城」 20分鐘輕鬆折返赤柱沙灘

[sig_post_pv label=””] 個人瀏覽過





疫情陰霾籠罩下,香港人未能出外旅行,令本地遊成為熱潮,唔少人幻想力變得豐富,一個又一個香港景點搖身一變成為偽國外景點,今次編輯亦前往赤柱大潭,位置係李小龍經典電影拍攝場地,可從此秘地找尋當中嘅「港版吳哥窟」,荒野堡壘隱藏於石灘背後,有如「天空之城」!

由柴灣前往曼克頓花園或浪琴園,可到達大潭區域,折返浪琴園後,步行到最盡頭處,沿護土牆小樓梯向下行,於旮旯位可穿過少量可能需要手腳並用嘅小山坡、排水渠秘道,從而可通往石灘位置,你大概估唔到住宅地背後竟然有一處山海之間嘅香港秘景。

石灘位處浪琴園背後崖邊,事實上亦係李小龍經典電影《龍爭虎鬥》嘅取景地,為登岸上船小碼頭。到廢堡之前可以先欣賞吓石灘上嘅岩石、海蝕洞、迷你瀑布,海水亦清澈,石灘對岸則為鶴咀,亦可遠眺港島南邊小島。

從石灘背後一道小樓梯拾級而上,斜坡稍有陡峭,同入口處一樣需要手腳並用,入口處有唔少雜物,向上而走會有唔少亂石、浮沙,前行至分岔路後可180度轉頭,大潭廢堡即映入眼簾,路段需要特別注意安全,量力而為。

大潭廢堡位處山野叢林、石灘之間,面朝大海,廢堡為戰時軍事防禦堡壘,望落有如英式堡壘,但頹垣敗瓦感覺更似柬埔寨吳哥窟其中一處古堡遺跡,細心觀察會發現似足石灘上一個「天空之城」,適合拍拖兩個人打卡。



歲月侵蝕之下,被榕樹包圍嘅大潭廢堡逐漸損耗,其中一面牆身已成大窟窿,屋頂亦甚破舊,而裏裏外外亦被畫上大量塗鴉作品,亦可見有雜草、藤蔓纏繞,不過一磚一瓦仍尚算保存完整,帶有幾分滄桑,有如經過歷練嘅感覺。從堡壘破爤窗口觀望,可見剛才嘅石灘風景,有如小西灣黑角頭碉堡「大電視」,由上而下俯視更有美感。

折返浪琴園入口,沿赤柱方向大潭道步行約20分鐘後,即可返回赤柱沙灘,先經過大受外藉遊客歡迎嘅夏萍灣泳灘、赤柱正灘,即可以到達赤柱市集、赤柱廣場、海濱長廊、海旁酒吧街,感受度假感覺,當中特色建築物包括有充滿維多利亞色彩嘅美利樓、可前往蒲台島嘅卜公碼頭、屬香港三級歷史建築嘅赤柱黃屋The Boathouse。


E.A.Tips :

(1) 於柴灣公共交通文匯處乘搭小巴路線16M,16X,而巴士路線14號可於柴灣道、西灣河、筲箕灣上車,,都可以去到赤柱大潭道,小巴可以直接於浪琴園落車,而巴士可於曼克頓花園、美國會所站落車,再折返浪琴園。

(2) 浪琴園左側會有一道小樓梯,只需沿小路進入,內有絲帶,跟住絲帶路行就得,不過入口會比較陡峭,需要手腳並用而走,絕對要注意安全,量力而為。

(3) 穿過小路、引水道後,5分鐘可以去到極少人嘅石灘,而石灘後面有一道樓梯,可以直上大潭廢堡。

(4) 最好輕便裝上陣,著運動鞋、行山鞋等唔易跣腳嘅鞋。

(5) 由石灘上大潭廢堡,同樣需要手腳並用,畢竟為小山路,部份路段比較危險同陡峭,要小心安全。

(6) 大潭廢堡有大量蚊蟲,而且係惡蚊,謹記事前一定要預先做足防蚊措施,最好著長袖衫褲,編輯認為惡蚊比皇后山印度廟更嚴重。

(7) 大潭廢堡另一端亦有入口,為一道樓梯,但細心留意會發現落到底係需要攀上繩索,再沿繩索落返石灘,所以最好都係原路離開。


(8) 記得自己垃圾自己帶走,唔好遺留荒野。

(9) 大潭廢堡有可能日久失修,要注意個人安全。


(10) 石灘上以堆滿小石頭,凹凸不平,要小心行走。


大潭廢堡

赤柱大潭道38號浪琴園會所旁
24hours

赤柱廣場Stanley Plaza

赤柱佳美道23號
08:00–23:00

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!