[sig_post_pv label=””] 個人瀏覽過
沙田禾輋邨內良心小店唔多，最近就有一間新開業嘅餐廳，屬屋邨商場內嘅街坊餐廳，價錢普遍比較低，最大特色係以葡國菜為主打菜式，拍拖兩個人唔使過大海都可以歎地道澳門菜，必食之選係澳門豬扒包。
以藍鳥為主題嘅葡國菜餐廳，翻查資料原來係有認證，大概只係形容雀鳥翱翔姿態。室內裝潢簡潔，燈光充足，座位唔似普通茶記風格，但整體感覺就似街坊茶記，凍檸茶亦有茶記感，有足夠茶味、檸檬味。
菜式以葡國菜為主，如椰香燴葡國雞、葡萄牙燴鴨、甜辣醬烤豬仔骨、馬介休炒飯、葡式雞翼等，當中有洋蔥煎焗走地雞髀扒飯，可選牛骨汁或咖哩汁，下午茶價錢為$42，雞扒亦算大塊，切開都好有肉感，雞肉滑嫩，唔乾身，雞皮只係間中稍有微脆感，大多被咖哩汁浸軟，咖哩汁同配菜都適宜撈飯，但咖哩味道就似乎偏向帶甜味風格，無乜辛辣味。
至於東望洋芝士鮮茄焗豬扒飯$52 嘅等候時間比較長，即焗豬扒飯溫度夠熱，除咗飯底奇怪，醬汁、豬扒都可接受，醬汁唔多，飯底比較乾身，豬扒則算軟腍。不過，總比連鎖店嘅焗豬扒飯好。
最值得推介嘅係澳門經典豬扒包$38，良心店嘅豬扒包比較難搵得到，編輯最欣賞嘅係盛載豬扒包嘅小碟，小店於微細地方亦採用澳門當地小店嘅葡式風格餐碟，確實有澳門食豬扒包嘅感覺。豬扒包內有大大塊厚切豬扒，相對焗豬扒飯嘅豬扒明顯煎得香口，入口軟腍，有肉汁，內餡亦有蕃茄、生菜、沙律醬，而麵包則烘烤得夠脆口。
E.A.Tips﹕
(1) 巴士路線48X,81,83P 都可到達禾輋巴士總站，步行1分鐘即達禾輋廣場。
(2) 餐廳網上顯示營業時間為07:30至22:00，但門口寫有11:00至21:30。
(3) 下午茶時間為14:00至18:00，一般比午市套餐平約$10。
(4) 門口有自助水吧，可自行斟水。
(5) 豬扒包無單叫，只有套餐，必須連嘢飲。
(6) 餐廳無加一服務費。
藍鳥葡國餐廳
沙田德厚街3號禾輋廣場2樓251-252號舖 
07:30 – 22:00 
2386 8883 / 9882 8116
在〈沙田新開葡國菜街坊店 屋邨商場歎脆脆澳門豬扒包/雞髀扒飯/焗豬扒飯〉中有 1 則留言
留言功能已關閉。