抬槓有意思!湯底鹹中帶甜 大角嘴小巷台菜半筋半肉牛肉麵

[sig_post_pv label=””] 個人瀏覽過





大角嘴美食多多,單單台灣菜都至少有兩間,有一間經常大排長龍,而另一間就位於小巷一隅,值得拍拖兩個人去食吓飯。

小店以台語「抬槓」命名,但抬槓到底係咩意思呢?抬槓指以不切實際論據去論證或爭論問題,雙方你一言、我一語,但無關係,最終得出最錯誤嘅結論,演變成帶幽默效果嘅藝術形成,而愛做呢種論辯嘅人叫槓頭、槓精。

店內、店外都有黑板寫有餐牌,透明度高,室內燈光稍為昏暗,座位唔算太多,但最特別之處係採用唔少貓味裝飾,一隻隻小貓陪伴用餐,可愛非常。

講到最出名嘅台灣菜式,當中一定有台灣牛肉麵,抬槓牛肉湯可配麵或飯或餃子,連飲品套餐為$63。麵底有別於一般台式麵,麵質比較幼身。而牛展肉偏厚切,份量有3至4大舊,有半筋半肉感覺,入口稔身,幾鬆化,有牛肉味。而湯底則帶少辣,鹹中帶微甜,幾有水準。



鹽酥雞肉燥飯$59 則並非套餐,飯量充足,飯粒比較軟身,肉燥亦非少量,足夠撈飯,肉燥味道濃而不鹹。至於鹽酥雞炸成金黃色,椒鹽味唔太重,炸粉唔厚而雞肉稍厚,表皮酥脆香口,唔太鹹,有少量粟米作伴食。

泡沫紅茶、苿香綠茶以小杯盛載,綠茶似足啤酒一樣,苿香味充足,而紅茶則較淡身,兩者配合較鹹嘅台灣菜亦好適宜。


E.A.Tips﹕

(1) 小店位於博文街一隅。

(2) 電話或Whatsapp可以叫外賣,可能會有送餐服務,詳請問返小店。


抬摃

大角嘴博文街4號地舖
11:45 – 21:00
2488 0908

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!


Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!