【2021賞花地圖】荃灣赤橙色隧道頓變港版千本鳥居海濱逾10棵雞蛋花燦爛盛開

[sig_post_pv label=””] 個人瀏覽過

到咗5至6月，又係雞蛋花盛開嘅季節，今次帶大家行吓荃灣海旁，一邊可以拍拖賞花，另一邊亦可以去到搖身變成「港版千本鳥居」嘅赤橙色隧道，有如兩個人穿越日本京都伏見稻荷大社千本鳥居！

荃灣西海邊種植咗大量雞蛋花，一棵棵矗立單車路旁，燦爛盛開時色調搶眼，而海邊雞蛋花同時有兩個品種，包括以紫紅色為主調嘅雞蛋花，重有花心呈黃色嘅雞蛋花。

雞蛋花一般於3至9月開花，其後結果，需要有陽光照射，亦需要通透而肥沃嘅泥土，現時雞蛋花遍佈鹿角形樹椏上，朵朵清麗脫俗。大多數人對雞蛋花嘅認知都係白花黃心，事實上呈紫紅色至粉紅色嘅雞蛋花先係正宗嘅雞蛋花，原產自墨西哥到委內瑞拉及西印度羣島，比較稀有。而鮮紅色則為雜交品種，暗紅色雞蛋花、白花黃心雞蛋花都屬園藝栽培品種。

觀賞完雞蛋花，可以繼續沿海濱長廊走，一般望海邊景色，遠眺青荃橋、汀九橋，更會輕易發現不遠處有一道赤橙色天橋或隧道嘅物體。最難以想像、最容易忽略嘅係，呢道赤橙色竟然恍如京都著名景點伏見稻荷大社內嘅千本鳥居！

香港人走到日本京都，必定會去吓伏見稻荷大社千本鳥居，但暫時未能離港，以致幻想力比以前更豐富，將香港每個角落都幻想成國外地方，穿過呢道「港版千本鳥居」赤橙色天橋隧道，有如走入時空隧道，總會以為從入口走到出口後會行到京都，其實只係油柑頭碼頭，只能望向藍巴勒海峽，繼續前行只係汀九灣。

伏見稻荷大社中央參道有無數座鳥居，構成千本鳥居，而呢道赤橙色隧道甚壯觀，幾何結構形成鳥居畫面，隊道沿海而建，一邊可望海景，可算獨一無二。

E.A.Tips :

(1) 兩種雞蛋花位置近海興路入口，亦近荃灣公園3期。

(2) 沿荃灣西海濱長廊走，由海興路轉入海安路，沿荃灣西約海濱長廊走，經過麗城花園，赤橙色隧道位置近荃灣西約體育館，由海之戀起步，腳程約為15至20分鐘。

(3)赤橙色隧道入口近麗城花園，出口則近青山公路荃灣段至汀九段。

(4) 愛惜花卉，唔好任意採摘雞蛋花。

(5) 沿海濱長廊單車路走，都可以直接去到赤橙色隧道。

(6) 小心車輛，注意安全，唔好隨意於赤橙色隧道內橫過馬路。

(7) 乘搭巴士路線48P,53,234B, 234C,234D,A38, N252、或小巴路線96,96C,96M 均可直接到達灣景花園旁嘅赤橙色隧道。

(8) 下午拍攝赤橙色隧道時陽光會比較好，亦可同時影埋黃昏日落、暮色、晚霞。