大埔秘境！深山泰國寺藏百年樹屋林村尋覓打卡熱點大菴古窰

[sig_post_pv label=””] 個人瀏覽過

泰國佛教寺廟粗略估計有逾3萬間，而單單一個曼谷就有逾400間寺廟，建築設計特別，非常優雅，大多離BTS不遠，可惜目前香港人仍然未能到訪泰國。不過，香港其實亦有唔少傳統泰國寺廟，大埔區內就有兩間，其中一間靠近太和市中心，而泰國寺背後更有一座神秘樹屋，值得拍拖兩個人打卡。走訪太和泰國寺後，更可到訪近月位於大埔林村附近嘅人氣影相地點大菴古窰。

太和區內嘅泰國寺藏於深山，係全港3間泰國佛教公會及泰皇認可佛寺之一，屹今有廿幾年歷史，遊走本地都可以有旅行感覺，此寺廟敬佛禮佛，同時以修行為主，寺內大師不時會出外化緣。太和泰國寺於5月就有「Visakha Bucha Day」，中文譯名為「維莎迦普差節」，為佛教創始人釋迦牟尼佛誕生、成道、入滅（涅槃）嘅紀念節日，至今約有2564年，東南亞地區佛教徒於該月首個月圓之日就會有盛大慶祝活動，而該日子有佛陀德智圓滿、福慧具足、證悟清淨、平等、光明之意。

從太和邨起步，穿過太和廣場，通往竹園區神召會大埔堂、神召會康樂中學方向，橫越錦和橋，沿錦石新村方向走，穿過錦山村石鼓壟露天停車場，走到最尾可以去到太和泰國寺小路入口。

沿小路直行，會一直見到一個又一個「Thai Temple 」太和泰國寺指示牌，通過小橋流水嘅同時，仰天而望可見吐露港公路。沿綠色欄杆走完，再沿黃色欄杆走上微斜階梯，僅為少量上山路段，大約5至10分鐘步程，到達入口之前會先見到供養泰國僧人嘅「慈雲法宇」別苑，1分鐘後繼續前行即可以到達「Wat Makthumvanaram」，中文譯名為「咩咖探嘩哪啉寺」，現時新任主持為瑪烈法師。

佛教本身起源於印度，但其實有分北傳、南傳佛教，比如中日韓等地為前者，而東南亞地區則為後者，有唔同教義、守戒，呢座泰國寺就為南傳佛教寺廟。寺內有大雄寶殿，露天有大佛像、小佛像，亦有供奉四面佛，附近平房均有唔少泰國裝飾，有如一秒穿越泰國，所以泰國寺廟係唔少居港泰國人、泰傭嘅假日好去處。

穿過泰國寺，可以搵到隱藏於背後嘅小靈山百年樹屋，樹屋位於溪邊，穿過小橋可通往1953年建成嘅「小靈山靈顯法院」，左邊即可見到樹屋背面，直行到底可達溪邊石澗，編輯認為由下而上拍攝樹屋正面會比較壯觀。

現時可見「靈顯法院」樹屋已經荒廢，被大榕樹包圍，只隱約睇到少量狀似紅色硃砂嘅字句，從下而上觀望，樹屋稍有傾斜，屋頂更明顯地已經倒塌，只見少量柱同樹根，所以要注意可能有安全問題。

延伸閱讀﹕鑽石山出發勇闖石礦場！山中秘道探索高聳東南亞樹屋上中下三條路線直抵城市後山入口

睇完神秘樹屋，折返原路，可先返回太和邨，然後乘搭巴士或小巴路線前往林村方向，可以找尋另一處有逾150歷史嘅人氣景點「大菴古窰」。

近月，大埔林村內嘅「大菴古窰」忽然成為熱門之地，從瓦窰內部觀望，構圖獨特，吸引唔少人前往打卡，而走入「大菴古窰」有幾條路線，例如「大菴古道」，今次編輯就帶大家走一道最安全、最簡單，而又最少人走嘅路線啦！

於坪朗站或大菴站落車，沿林錦公路前行至大菴路，前面會見到陳森記士多，只需沿「大菴」指示牌走，轉入大菴路，2分鐘左右會見到坪朗遊樂場，繼續前行2分鐘可達大庵村公廁，再前行1分鐘會見到偌大停車場。

從分岔路口可離遠見到代表張姓客家村嘅張氏宗祠，沿路直行1分鐘可見已經荒廢嘅六德書室，旁邊則為育賢書室，兩者都為兩層樓高，前者為三級歷史建築，後者目前已經轉為民居。折返原路，於停車場左邊小路進入，穿過少量村屋，左邊可見一片綠油油草地，沿小泥路走，由書室起只需5至10分鐘，即可以見到大菴村村後嘅歷史建築物「大菴古窰」。

走到依山而建嘅「大菴古窰」，可見瓦窯佈滿藤蔓，但似乎被修剪過，入口已經破爛成一個比人更高嘅大洞穴，但並無被遮掩，地上有一塊塊紅磚，一般人可從微斜下行黃泥路進入瓦窯。

從瓦窯內部仰天而望，紅磚舖砌而成嘅瓦窯頂頭有一個呈圓拱形嘅小洞，構圖獨特。瓦窯有指最初係用作燒瓦用途，例如青磚等產品，甚至村屋瓦頂，而頂部圓洞有指用作通風之用，附近有小洞作為入燃料，約1910年起停止瓦窯用途。

E.A.Tips :

(1) 乘搭巴士路線64K,64P,73,73A, 73B,74D,264R,307P, 907B,907C,N73 , 71K,72,74A,271P, 273C,273P 可以抵達太和廣場；而小巴路線22K可以抵達錦山路錦石新村。

(2) 尊重宗教地方，謹記保持安靜，勿騷擾寺內其他人，始終好多人係到寺廟參拜。

(3) 太和泰國寺入口會有狗吠聲，但有圍欄，謹記唔好挑釁狗隻。

(4) 登上太和泰國寺上山路段遍佈樹蔭，唔算太辛苦。

(5) 太和泰國寺背後向左走，會見到有一道樓梯，直行到底即可抵達樹屋位置。

(6)太和泰國寺樹屋附近有唔少樹木草叢，惡蚊繁多，最好穿著長袖衫褲，上山前預先噴定蚊怕水。

(7) 除咗穿過錦山村石鼓壟露天停車場可以到達太和泰國寺小路入口，其實更直接嘅方法係從錦和橋轉右，直行約2分鐘，轉入小路，可以更快到達停車場小路入口，而且可減低穿過停車場嘅危險度。

(8) 入口可見一張告示，指太和泰國寺「守護神犬」Pepsi 近月突然神秘失蹤，呼籲大眾留意。

(9) 往太和泰國寺時，揸車可以停泊於錦山村石鼓壟露天停車場；而往大菴古窰，亦可見有部份時租停車位，但留意唔好駛入私人停車場內。

(10) 由太和邨走到太和泰國寺，全程只需步行約20分鐘。

(11) 謹記自己垃圾自己帶走。

(12) 巴士路線64K、小巴路線25K均可從太和市中心前往林村方向，可到達大菴村。

(13) 有幾條路線都可以到達「大菴古窰」，但另一端比較複雜，甚至崎嶇不平，反而編輯所選嘅呢條路線就比較簡單，路段平坦易走，時間方面亦較短。

(14) 好好保護歷史建築，唔好有任何破壞行為。

(15) 「大菴古窰」亦係草叢繁多嘅地方，最好穿著長袖衫褲，進入之前要做足防蚊措施。

(16) 大菴村內有村民居住，前往「大菴古窰」路段亦不時有村民出入，謹記要保持安靜，勿騷擾村民。

(17) 若從「大菴古窰」繼續前行，可見茂密草叢，路段唔算簡單路線，所以最好原路折返。

(18) 「菴」字可讀閹或掩，記得唔好錯讀為庵或盦啦，所以係讀大「閹」古「搖」，搭「和你的」都要識同司機講啦。

(19) 雖然「大菴古窰」保存尚算完整，但要小心可能會有磚塊掉落。