[sig_post_pv label=””] 個人瀏覽過
香港人出名「好鍾意返工」，日日夜夜工作忙碌，要煮一餐飯都唔容易，近年愈開愈多住家菜餐廳，大角嘴就有一間小店就打造港式便當套餐，以平靚正為主打，既適合懶煮飯嘅拍拖情侶，適合本地打工仔，兩個人$100有找。
室內座位唔多，僅有約10個座位，可以從開放式廚房窺探煮食過程，透明度高，據知大廚曾經係米芝蓮三星中菜館主廚。每份便當飯盒$48，包含前菜、主菜、藜麥紅米飯、餐湯或餐飲，似無味精住家菜，現時前菜為中華沙律，而白米飯粒軟綿，藜麥、紅米有咬口。纖維豐富，健康之餘可減肥。
而菜式有10款任揀，當中泰式檸檬雞份量亦充足，舖滿便當盒，分成兩層放置。雞肉原為煎雞，表皮灑有香口嘅白芝麻，但淋上醬汁後，雞皮浸軟，口感上稍為遜色。不過泰式醬汁重檸檬味，帶有酸甜味，蘸上醬汁後幾開胃。
是日養生燉湯為蟲草花圓肉烏豆，可滋補肝腎、祛濕養顏，一小碗份量唔算多，湯內可見大量蟲草花、烏豆、肉碎，亦有少量圓肉，呷口湯可暖胃，視覺、味道上都幾足料。
E.A.Tips﹕
(1) 小店位於富多來商場地下，留意係一期，唔係二期，亦唔需要走入商場內，位置正對新九龍廣場。
(2) 菜式雖然少有變動，但燉湯會不時轉換款式，幾有新鮮感。
(3) 留意外賣要加$2。
(4) 加$10可以另加甜品，如腰果露。
鮮餸便當
大角嘴櫸樹街20號富多來商場地舖 
星期一至六 11:00 – 20:00；星期日全日休息 
2889 8188
