2021-08-03

夏日路線!屯門李小龍電影拍攝地現七色彩旗秘境穿越西藏 走訪屯赤隧道「港版邁阿密」人氣景點

屯門 夏日路線 西藏 七色彩旗

個人瀏覽過





近期,屯門赤鱲角隧道大受歡迎,更被稱為「港版邁阿密」、「港版加州」,一個荒蕪地方瞬間成為人氣景點,唔少人都爭相到屯赤隧道打卡;但事實上,屯門又豈止一個神秘地方值得打卡?今次編輯順道帶大家找尋另一處更神秘嘅地方,既係法定古蹟,亦遍佈色彩繽紛嘅彩旗,可以拍拖兩個人感受一秒穿越西藏!

一道屯門赤鱲角隧道公路,以下稱為屯赤隧道,可以連接屯門至赤鱲角,係繼青嶼幹線後另一道連接機場嘅公路,本來只係一個人跡罕至嘅地方,僅有少數釣魚客、單車客。走入浩和街,會發現豈止似「港版邁阿密」,更有幾分似「港版沖繩」;但目前人煙稠密,垃圾遍地,雖然擁超大草地,但感覺即將會變成狀似柬埔寨垃圾山嘅「港版垃圾山」。

浩和街海旁坐擁一片碧綠大草坪,從海邊超長堤壩可享盡270度無際海景,有幾分似西九文化區海旁,亦可遠眺赤鱲角機場,係屯門一個後花園。而屯赤隧道重點為附近有海量棕櫚樹,配合猛烈陽光或黃昏日落時,椰林樹影,似熱帶地方,的確有如置身外國,對於未能去旅行嘅香港人嚟講,難怪屯赤隧道通車後,呢個荒涼之地隨即成為打卡熱點。

屯赤隧道浩和街近堤壩盡頭位置會見到一個白色燈塔,純白色燈塔亦有幾分日系感覺,黃昏時配合夕陽斜照,即使只係剪影,都會好容易拍攝偽旅行相片。

走入屯赤隧道之前,可以先到屯門近市中心嘅一處神秘之地,位置為青山東麓,被稱為「青山禪院」嘅「青山寺」。位於青山寺徑嘅「青山禪院」早於1985年已被評為一級歷史建築,當中包含大雄寶殿、香海名山牌樓、山門、護法殿、地藏殿,後來青山禪院更被評為香港法定古蹟文物。

而青山寺於2009年更耗資3000萬,獲得世界文化遺產保護獎專家特地為本地作最大型古寺復修工程。而青山寺既係佛教開端,亦係現時代表香港佛教嘅重要角色,前任港督金文泰爵士不單到訪青山禪院,更為寺院牌樓提上「香海名山」大字。

屯門青山寺歷史悠久,被稱為「千年古剎」,東晉末年已存在,曾被稱為「青雲觀」、「杯渡寺」等,而青山禪院內亦有「杯渡岩」,為杯渡禪師居住之地,更有刻上「高山第一」嘅石碑,附近則有「青雲觀」。到達青山禪院時,可見入口牌樓刻有「香海名山」,背面則為「回頭是岸」,繼續向前走,會見到山門有對聯,寫住「十里松杉藏古寺,百重雲水繞青山」。

步入山門,會見到中央有「大雄寶殿」,包含釋迦牟尼佛像、「阿彌陀佛」像、「藥師佛」像,旁邊有「功德堂」用作供奉歷代住持、法師等神位,滿滿莊嚴感覺。

而另一端可以走入「李小龍事蹟紀念徑」,可得知李小龍經典電影《龍爭虎鬥》曾於青山寺內拍攝。當中會經過「方丈室」,但目前已倒塌,門口石柱有副對聯寫有「淨土何須掃,空門不用關」,後半段已被摧折,園地內牌樓寫有「杯渡遺蹟」,另一邊為「不二法門」。

      

再沿樓梯直上,可以去到一處神秘地方,目的地為三層「時輪金剛佛塔」,屬較高建築群。位置有海量七色彩旗,每支彩旗上都內寫有梵文,一支支彩旗交織下,隨意形成完美構圖,有如步入西藏一樣。加上唔少建築都寫有梵文,亦有圓盤裝飾,充滿異國風情。青山禪院整體環境古樸味濃,人煙稀少,異常寧靜,佛教清靜地的確令人有脫俗之感。

事實上,青山禪院內亦有「青山十景」,除咗「香海名山牌坊」、「青雲觀」、「杯渡像」、「高山第一」、位於山下嘅「挹曉亭」,亦有「韓陵片石亭」、「龍骨巖」、「和合山門」、「魚骨墦」、「一線天」、「物轉星移」,不過現時可以找尋到嘅大概只係前面頭五景。


E.A.Tips :

(1) 巴士路線57M, 66M, 66X, 258D, 258X, A34, E33P, N260 皆可以到達聖彼得堂;小巴路線47S, 48S 亦可到達輕鐵青雲站。

(2) 以屯門職業訓練局香港專業教育學院為起點,前行至聖彼得堂分岔路口,一條路線直上青山禪院僅需約20分鐘。

(3) 只需沿山腳「青山古寺」木牌直上就得,中段會見到「挹曉亭」,青山禪院路後唔太陡峭,而且遍佈樹蔭,適合夏天散步。

(4) 彩旗位置於大雄寶殿後面,直上青雲觀後,可於大雄寶殿後面小路繼續前行,亦可以從入口轉左大路直上樓梯,然後一直向上行。

(5) 屯赤隧道嘅海景公園靠近貨櫃碼頭,前往屯赤隧道最好踩單車或自駕進入,Call車亦可以,由蝴蝶灣計約1.2公里。而公共交通工具基本上最近方法只有巴士路線K52,於望后站落車,約20分鐘腳程可以到達浩和街。不過,亦可乘搭A33,A33X,A34, E33E,33P,NA33於屯門赤鱲角隧道轉車站落車,30分鐘內亦可到達浩和街。

(6) 謹記帶備充足食糧、防曬用品、防蚊用品,青山禪院比較多惡蚊,而屯赤隧道旁草地就無遮擋,陽光比較猛烈,而浩和街直入有少量汽水機。

(7) 唔少人都會企長堤邊打卡,但其實係無任何圍欄,唔建議做危險動作;沿途小路為駕駛路段,唔好隨意走出馬路,要注意安全。

(8) 編輯萬二分提醒,自己垃圾記得要自己帶走,現場見到有大量垃圾遺留草地同街道上,千其唔好貪方便亂丟垃圾,要玩爛一個地方可以唔使一個月。皆因編輯當日親眼見到一位少女將一袋垃圾隨手丟棄路邊,好彩係後面佢嘅男性友人尚且有意識地將裝住垃圾嘅紙袋拎返起,否則路邊又多一袋垃圾。

(9) 望后石附近本身係工作場地居多,有大量貨車,要特別小心車輛出入,免生意外。


(10) 青山禪院為寺廟地方,謹記要保持安靜,勿喧嘩叫囂。

(11) 唔好喺草地上踩單車,而大草地同海旁長堤之間有唔少小草,記得要愛惜植物,要盡量避開唔好踩落去,最好沿石屎路或海旁水渠走。


青山禪院位置﹕

青山禪院

屯門青雲路
06:00 – 18:00
2441 6666

屯赤隧道浩和街位置﹕

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook啦!
ΔPlease Like & Follow & Subscribe /
歡迎讚好、追蹤、訂閱

       

深水埗大南街咖啡店共享空間 設計藝廊真係值得睇?
【英國偽旅行】本地4個必去英式庭園 英國文學作品場景/海拔最高公園/法定古蹟遍佈港九新界
【美國偽旅行】穿越邁亞密探索海量棕櫚樹 港版千島群島景觀開揚 爽歎美式口味漢堡Comfort Food
【歐洲偽旅行】本地挪威式小花園/城堡打卡 歐式別墅前臨靜謐沙灘 無敵海景盡曬日光浴
青馬橋底睇日落!青衣西草灣賞景打卡秘地 細山步行徑近三支香談心好地方
【意大利偽旅行】穿越「東方威尼斯」 感受香港水鄉小島風情 兩大賞景地眺黃昏夕陽
錦田高埔村天空之城離市中心僅1公里 No Boundary姊妹店HOLA Chill住歎加料厚多士
【澳門偽旅行】迷你葡萄牙羅卡角海岬/倒模路環彩虹屋打卡 歎地道澳門豬扒包兼暢遊黑沙海灘
【泰國偽旅行】港島迷你泰式小屋打卡 海邊恍若峇里島度假 歎過江龍正宗船麵
驚現男團Mirror/Error主題月餅!中秋黃金月餅巡禮2021最完整名單!即睇港九新界連網店月餅預訂攻略!
【台灣偽旅行】遊走新界3大壁畫村 歎地道肉焿湯/台式牛肉麵
【日本偽旅行】全港5個本地「日式庭園」 秒到鳥居/神社/繪馬/動漫場景打卡
超隱秘!素肉骨茶湯底!荃灣巷弄素食車仔麵$50有找 24款純素/蛋奶素車仔餸任揀
消失的「萬壽無疆」? 旺角懷舊東方色彩工業風咖啡店五金味重
入場有限制!大埔慈山寺偽旅行驚現仿日本神社御手洗 必睇全球第2高巨型純白觀音像
瞰鋼線灣景色!穿梭山頂至薄扶林水塘尋港版《千與千尋》場景 新哥德式風格大學堂/伯大尼教堂打卡 薄扶林村都有秘地?