大角嘴大啖便當炸雞韓式浪漫神秘韓文霓虹燈牌到底係咩意思？

[sig_post_pv label=””] 個人瀏覽過

本土風氣盛行之前，韓風大行其道，唔少本地人都曾一度追求韓式美食，而呢間將韓風同本土結合嘅小店，就同時包含韓式少女風同本土設計，拍拖兩個人可以邊打卡邊撐枱腳。

小店室內裝潢唯美，採韓式花系設計，天花舖滿白色櫻花，以粉色、白色為主調，亦有鳥籠燈陪襯，一隅亦以各式花朵佈置，環境充滿少女風，點上小清新。餐牌上菜式以韓式為主，大多為Fusion菜，將西式餐點同韓式混合，營造新派美食。

講到韓式美食，必然要數韓式炸雞，一份韓式便當配3件炸雞$78，便當飯量驟眼睇唔多，實際上係壓扁咗，鐵碟上有太陽蛋、青瓜絲、蘑菇粒、粟米粒、紫菜絲，拌勻就食得，似韓式拌飯。炸雞呈金黃色，酥香脆口，炸粉大部份唔少厚，只有少部份比較厚粉，唔太均勻，而雞肉尚算稔滑，稍有鬆軟感，脂肪唔多，質感唔算嚡，包含雞翼、雞髀、雞胸肉。炸雞可以配上6款醬汁，包含原味、蒜香蜂蜜、甜辣、卡邦尼、芝士醬，而+$10亦可試黃金鹹蛋，蒜香蜂蜜醬汁比較黏稠，蒜味比較輕，蜂蜜香甜味較重，令雞肉鹹中帶甜。

其他菜或有意粉、薄餅等，唔少都係將西式同韓式結合，形成Fusion菜，如韓式牛肉飯、泡菜鍋等，以卡邦尼煙肉泡菜意粉$72 為例，以卡邦尼煙肉意粉為基底，於醬汁上加入韓式泡菜，令賣相上變成橙紅色，忌廉汁質感依舊Creamy，泡菜帶有香辣味，意粉順滑彈牙，可掛汁。

最潮嘅韓式飲品通常唔係牛奶類就係水果類，其他飲品如蜜桃烏龍茶$30 則比較中規中矩，果味香甜，較為清爽，整體味道反而唔太突出。但見餐牌上有一款焦糖爆谷拿鐵$33，將香甜焦糖爆谷放置一杯Latte之上，即食爆谷可以感受其脆口感覺，而當焦糖爆谷逐漸融化，焦糖自然融於Latte內，等同為Latte加入少量砂糖，令Latte整體帶上少許甜味，不過融化後嘅爆谷質感比較奇怪，軟得似紙皮，一杯Popcorn Latte混合得幾特別，至少可以打卡。

眾所週知，店面My Ahjussi嘅意思係「我的大叔」，來自韓國著名歌手及演員IU所主演嘅劇集「My Ahjussi」，據悉老闆係受劇集啟發而捐助有聽力障礙嘅人，支持弱勢社群。店內更有另一組霓虹燈牌，但編輯不諳韓文，只能仔細翻查霓虹燈牌上韓文字嘅意思，對返每個韓文字，頭兩個字輕易得出結論係代表「香港」，再查之下得知霓虹燈牌上寫嘅係韓文版「香港人加油」。學歷不足、言語不通嘅人大概未必知牆上寫嘅係咩字，所以大家低調地懲罰就好啦！